ءبىر بەلدەۋ، ءبىر جول: قازاقستان - قىتاي ينۆەستيتسيالارىن ەڭ كوپ تارتقان ەل
استانا. KAZINFORM - «ءبىر بەلدەۋ، ءبىر جول» باستاماسى اياسىنداعى قىتاي ينۆەستيتسيالارى رەكوردتىق دەڭگەيگە جەتتى. بۇل تۋرالى اۋستراليانىڭ گريففيت ۋنيۆەرسيتەتى مەن بەيجىڭدەگى جاسىل قارجى جانە دامۋ ورتالىعىنىڭ بىرلەسكەن زەرتتەۋ ەسەبىندە ايتىلعان.
2025-جىلدىڭ قاڭتارىنان ماۋسىمىنا دەيىن قىتايلىق كومپانيالار جالپى قۇنى 124 ميلليارد دوللار بولاتىن 176 جاڭا ينۆەستيتسيالىق جانە قۇرىلىس كەلىسىمشارتىن جاساستى. بۇل كورسەتكىش بىلتىرعى جىلداعى جالپى سومادان ($122 ميلليارد) اسىپ ءتۇستى.
- بيىل قىتايدىڭ بەلسەندىلىگى پاندەميادان كەيىنگى تۇراقتى ءوسۋ اياسىندا ەرەكشە اسەر قالدىردى. 2025-جىلدىڭ ەرەكشەلىگى - بىرنەشە مەگاينۆەستيتسيالىق كەلىسىمدەردىڭ قاتار جۇزەگە اسۋى. ولاردىڭ ءارقايسىسىنىڭ قۇنى $10 ميللياردتان اسادى، - دەدى زەرتتەۋ اۆتورى كريستوف نەدوپيل ۆان.
ونىڭ ايتۋىنشا، قىتاي ەكونوميكاسىنداعى ءوسىمنىڭ باياۋلاۋى مەن جاھاندىق ساۋدا شيەلەنىسىنىڭ ارتۋى قىتايلىق كومپانيالاردى شەتەل نارىقتارىنا بەلسەندىرەك شىعۋعا يتەرمەلەدى. ال كوپتەگەن ەل بۇل باستاماعا قاتىسۋدى قىتايمەن بايلانىستاردى نىعايتۋ مۇمكىندىگى رەتىندە قاراستىرىپ وتىر.
ەسەپتە 2025-جىلى قىتاي ينۆەستيتسيالارىنىڭ باسىم بولىگى ەنەرگەتيكا سالاسىنا باعىتتالعانى ايتىلعان. ينۆەستيتسيا كولەمى بويىنشا كوش باستاعان ايماقتار: افريكا - $39 ميلليارد جانە ورتالىق ازيا - $25 ميلليارد.
قازاقستان باستاماعا قاتىسۋشى ەلدەردىڭ اراسىندا كوش باستاپ، 2025-جىلدىڭ العاشقى التى ايىندا $23 ميلليارد ينۆەستيتسيا تارتقان. سالىستىرۋ ءۇشىن ايتا كەتسەك، لاتىن امەريكاسى ەلدەرى سوڭعى ون جىلداعى ەڭ تومەنگى ينۆەستيتسيا مەن كەلىسىمشارت كولەمىن كورسەتكەن.
بۇعان دەيىن قىتاي حالىق رەسپۋبليكاسىنىڭ ءتوراعاسى شي جينپيىڭ قازاقستانعا رەسمي ساپارى اياسىندا قازاقستان ەنەرگەتيكا مينيسترلىگى، قىتايدىڭ CNPC كورپوراتسياسى، «قازمۇنايگاز» ۇلتتىق كومپانياسى» ا ق جانە اقتوبە وبلىسىنىڭ اكىمدىگى اراسىندا كارباميد زاۋىتىنىڭ قۇرىلىسىن كوزدەيتىن ينۆەستيتسيالىق جوبانى ىسكە اسىرۋ جونىندە نەگىزدەمەلىك كەلىسىمگە قول قويىلدى.
