ءبىر بالالار فۋتبول الاڭىن سالۋعا قانشا قارجى قاجەت

استانا. KAZINFORM - ەلىمىز بويىنشا 1489 بالالار فۋتبول الاڭى جەتىسپەيدى. بۇل جايىندا تۋريزم جانە سپورت مينيسترلىگىنەن ءمالىم ەتتى.

- جەرگىلىكتى اتقارۋشى ورگانداردىڭ اقپاراتىنا سايكەس، ەلىمىز بويىنشا 6926 بالالار فۋتبول الاڭى جۇمىس ىستەيدى. ونىڭ ىشىندە 1335- ءى جوندەۋ جۇمىستارىن جۇرگىزۋدى تالاپ ەتەدى. رەسپۋبليكا بويىنشا جالپى قاجەتتىلىك – 1489، جوسپار بويىنشا جەرگىلىكتى بيۋدجەتتەر مەن جەكە ينۆەستيتسيالار قاراجاتى ەسەبىنەن سالىناتىن بالالار فۋتبول الاڭىنىڭ سانى – 698، - دەدى مينيسترلىكتەن اگەنتتىكتىڭ ساۋالىنا وراي.

سونىمەن قاتار مينيسترلىك ءبىر بالالار فۋتبول الاڭىنا شامامەن قانشا قارجى كەتەتىنىن اتادى.

- ءبىر بالالار فۋتبول الاڭىنىڭ قۇنى الاڭنىڭ اۋدانىنا (شاعىن فۋتبول الاڭىنىڭ مولشەرى ورتا ەسەپپەن 40*20 مەتر، ەڭ تومەنگى مولشەرى 25*15 م، ەڭ جوعارى مولشەرى 25*42 م)، قۇرىلىمىنا، قورشاۋدىڭ بيىكتىگىنە، الاڭدى جابۋ ماتەريالىنا جانە شىعىستارعا بايلانىستى 7 ميلليون تەڭگەدەن 20 ميلليون تەڭگەگە دەيىن قاراجاتتى قاجەت ەتەدى، - دەدى ۆەدومستۆودان.

مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءتورتىنشى وتىرىسىندا الداعى ەكى جىلدا ءاربىر وبلىس، اۋدان ورتالىعىندا، كەنت پەن اۋىلدا بالالارعا ارنالعان فۋتبول الاڭى بولۋعا تيىستىگىن تاپسىرعان ەدى.

تۋريزم جانە سپورت مينيسترلىگى وسى تاپسىرمانى ورىنداۋ جونىندەگى ءىس-شارالار جوسپارىن 2026 -جىلدىڭ جەلتوقسان ايىن ورىنداۋ مەرزىمىمەن بەكىتپەك.

بۇعان دەيىن ەلىمىزدىڭ قاي وڭىرىندە جاڭا ستاديون سالىنىپ، ەسكىلەرى جاڭارتىلاتىنىن جازعان ەدىك.

اۆتور

مارلان جيەمباي