ءبىلىم سالاسىندا سوڭعى ءبىر جىلدا نە وزگەردى

ۇكىمەتتىڭ باسپا ءسوز قىزمەتى مەملەكەت باسشىسىنىڭ سايلاۋالدى باعدارلاماسىن ىسكە اسىرۋ اياسىندا ق ر ۇكىمەتىنىڭ ءبىلىم جانە دەنساۋلىق ساقتاۋ سالالارىن دامىتۋ بويىنشا ءبىر جىل ىشىندە اتقارعان جۇمىسىنا شولۋ جاسادى.

1-قىركۇيەكتەن باستاپ قازاقستاندا اي سايىنعى مەملەكەتتىك شاكىرتاقى كولەمى: باكالاۆريات ستۋدەنتتەرىنە - 20 پايىزعا، ماگيستراتۋرا مەن دوكتورانتۋرادا وقيتىندارعا - 15 پايىزعا، ت ج ك ب ستۋدەنتتەرىنە - 50 پايىزعا ارتتى.

جالپى، 2025 -جىلعا قاراي ستۋدەنتتەر شاكىرتاقىسىنىڭ مولشەرى 2020 -جىلعى دەڭگەيدەن كەزەڭ-كەزەڭمەن 2 ەسەگە وسەدى.

ج و و-لار مەن كوللەدجدەردىڭ جاتاقحانالارىندا ورىن تاپشىلىعى ءبىر جىل ىشىندە 3 ەسەگە جۋىق، 2022 -جىلعى 62,8 مىڭ توسەك-ورىننان بيىلعى قازان ايىندا 23,9 مىڭعا دەيىن قىسقاردى.

2023 -جىلى 10,9 مىڭ ورىندىق 44 جاتاقحانانى ىسكە قوسۋ جوسپارلانعان، ونىڭ ىشىندە 25 جاتاقحانا پايدالانۋعا بەرىلدى.

جىل سوڭىنا دەيىن تاعى 19 جاتاقحانانى پايدالانۋعا بەرۋ جوسپارلانىپ وتىر.

1-قىركۇيەكتەن باستاپ رەسپۋبليكاداعى بارلىق 1-4-سىنىپ وقۋشىلارى ءۇشىن تەگىن ىستىق تاماق ۇيىمداستىرىلدى. 1,4 ميلليون بالا قامتىلدى. جەرگىلىكتى بيۋدجەتتەن 25 ميلليارد تەڭگە ءبولىندى.

سونداي-اق حالىقتىڭ الەۋمەتتىك ءالسىز توپتارىنىڭ 5-11-سىنىپتاردا وقيتىن 200 مىڭنان استام وقۋشىسى تاماقتانادى.

سونىمەن قاتار مەكتەپكە دەيىنگى ءبىلىم بەرۋ ۇيىمدارىندا اتالعان ساناتتاعى 97 مىڭنان استام بالا تەگىن تاماقپەن قامتاماسىز ەتىلدى.

ازاماتتاردىڭ جوعارى بىلىمگە قول جەتكىزۋىن قامتاماسىز ەتۋدىڭ قوسىمشا تەتىگى بولاتىن «كەلەشەك» ەرىكتى جيناقتاۋ جۇيەسىن ازىرلەۋ باستالدى.

بيىل از قامتىلعان وتباسىلار مەكتەپ كيىمدەرى مەن كەڭسە تاۋارلارىن ءوز بەتىنشە ساتىپ الۋ ءۇشىن ءار بالاعا كەمىندە 40 مىڭ تەڭگە الدى.

بارلىعى 463 مىڭ بالا قامتىلىپ، 19 ميلليارد تەڭگە بيۋدجەت قاراجاتى جۇمسالدى.

«جايلى مەكتەپ» ۇلتتىق جوباسىن ىسكە اسىرۋ باستالدى. 2026 -جىلعا دەيىن 740 مىڭ ورىندىق 369 جاڭا فورماتتاعى مەكتەپ سالىنادى.

جالپى، عىلىمنىڭ 2023-2025 -جىلدارعا ارنالعان بيۋدجەتى الدىڭعى ءۇش جىلدىق كەزەڭمەن سالىستىرعاندا 3,3 ەسەگە ءوسىپ، 643 ميلليارد تەڭگەنى قۇرادى.

اۋىل تۇرعىندارىنا مەديتسينالىق كومەك كورسەتۋ دەڭگەيىن ارتتىرۋ ماقساتىندا «اۋىلدىق دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى بەكىتىلدى.

بۇگىنگى تاڭدا جوبا شەڭبەرىندە 13 العاشقى مەديتسينالىق-سانيتاريالىق كومەك وبەكتىسىنىڭ قۇرىلىسى اياقتالدى.

تاعى 86 وبەكتىنىڭ قۇرىلىسى ءجۇرىپ جاتىر.

بۇدان بولەك، قوستاناي، سولتۇستىك قازاقستان جانە تۇركىستان وبلىستارىندا 4 كوپسالالى ورتالىق اۋداندىق اۋرۋحانالاردا كۇردەلى جوندەۋ جۇمىستارى جۇرگىزىلۋدە.

 

اۆتور

جانات قاپالبايەۆا