عاسىردىڭ تاڭداۋلى اڭگىمەلەرى: عاجايىپ ونەر
استانا. قازاقپارات - تەلەارنا جۇرگىزۋشىسى كۇندەگىسىنشە جاڭالىقتاردى وقي باستادى، ءبىراق ول ءوز ەركىنەن تىس، بەتالدى تىركەستەردى سويلەپ الا جونەلدى: «كەلەسى حابارىمىزدا كورەتىندەرىڭىز، ءىرى كولەمدەگى جەمقورلىق وقيعاسى تىركەلدى.
«ك» كاسىپورىنى جاۋاپتى رەسمي ورگاننىڭ جوعارى لاۋازىمدى باسشىلىعىنا ۇلكەن كولەمدە پارا بەرگەن...حابار وقىلىپ بولعان سوڭ، تەلەارنانىڭ ىشكى بولىمىندە ۇلكەن ايعاي-شۋ بولدى. ءبىرى ودان: «ءتۇپ نۇسقا حاباردا ونداي ءماتىن جوق، سەن ونى قايدان تاۋىپ الدىڭ؟»، دەپ سۇرادى. «ەسىڭ دۇرىس پا؟ ەندى ەلدىڭ بەتىنە قالاي قارايمىز؟ ولار ۇستىمىزدەن شاعىم تۇسىرەدى ءالى. وسىلاي بولا بەرسە، بۇل تەلەارنانىڭ ابىرويى ايرانداي توگىلەدى.
تەلەارنا قىزمەتكەرلەرى قورىققاندارىنان ءۇرپيىسىپ قالدى. ديرەكتور دا ءوزىنىڭ قىزمەتتەن قۋىلۋىن كۇتىپ وتىردى. ءبىراق، عاجايىپ وقيعا تۋىلدى. ولارعا ەشكىم دە تەلەفون شالىپ، بۇل تاراتقان اقپاراتتارى جايلى سوگىس بەرگەن جوق.
كەرىسىنشە، ولارعا مىناداي جاڭا حابارلاما كەلىپ ءتۇستى: «سىزدەر حاباردا اتتارىن اتاعان جوعارى لاۋازىم يەلەرى وزدەرىنە تاعىلعان بارلىق ايىپتى مويىنداپ، وزدەرى كەلىپ بەرىلدى، ءارى قىزمەتتەرىنەن بوسادى. ەستۋلەرگە قاراعاندا، وسى حابارعا سەنەر-سەنبەسىن بىلمەگەن قارجى پوليسياسى «ك» كاسپورىنىنا بارىپ ءتىنتۋ جۇرگىزگەندە ولاردىڭ پارا بەرگەنى جايلى فاكتىلەر تەز ارادا قولعا ءتۇسىپ، قىلمىستى تۇلعالار تۇرمەگە قامالعان.
تەلەارنانىڭ جاعدايى مۇلدە جاڭا سيپاتقا وزگەردى. الگى جاڭالىقتار جۇرگىزۋشىسىنىڭ مۇنداي توسىن وقيعانى ءبىرىنشى بولىپ حابارلاعانى مويىندالىپ، ەندى ونى ماداقتاۋ مەن ماراپاتتاۋ باستالىپ كەتتى.
«شىنىمەن سۇمدىق جاعداي بولدى! ايتقانىڭنىڭ ءبارى راس ەكەن! مۇنى قايدان ءبىلىپ قويدىڭ؟». «ءوزىم دە بىلمەيمىن، تەك وسى ويلار ميىمدا جارق ەتتى دە، تىلىمنەن ءسوز بولىپ اعىلدى»، - دەدى جاڭالىقتار جۇرگىزۋشىسى ولارعا.
«بۇل عاجايىپ ونەر بولۋى مۇمكىن. سەنىڭ قالتارىستاعى، زاڭعا قايشى ىستەردى بايقاي الاتىن ەرەن ونەرىڭ بار ەكەن. وسىدان كەيىن بۇل قابىلەتىڭدى بارىنشا ساۋلەلەندىرگەيسىڭ، ءبىزدىڭ تەلەارنانىڭ رەيتينگىسى ءبىرجولا كوبەيەتىن بولدى»، - دەپ قۋانىستى تەلەارنا باسشىلىعى.
«اپىراي، ءبىراق، ءبارى ءساتتى بولا بەرە مە، كىم بىلەدى؟!»، - دەدى ول.
ەرتەسى كەشكى جاڭالىقتاردا الگى جۇرگىزۋشى تاعى دا بەتالدى سويلەي جونەلدى: «وتكەن جىلى سالىقتان جالتارۋدا كوش باستاعان ون ءىرى الپاۋىتتى اتاپ كورسەتەيىك. ءبىرىنشىسى...»
ىلە ۇرلانعان سالىقتىڭ كولەمى، سالىقتى قالاي ۇرلاعانى ەگجەي-تەگجەيلى باياندالدى. بۇل رەتتە ونىڭ ايتقانى تاعى دا ءدوپ كەلدى.
سالىق مەكەمەسى دەرەۋ اتتانىسقا كەلىپ، كوپ اۋرەلەنبەي-اق قىلمىس فاكتىلەرىن قولعا ءتۇسىردى.
سونىمەن، وسى تەلەارنانىڭ جاڭالىقتارى بارلىق جۇرتتىڭ القاۋىنا يە بولدى. تىڭدارماندار مەن كورەرمەندەر ارت-ارتىنان تەلەفون شالىپ: «جارايسىڭ، قاراپايىم حالىقتىڭ دوسى ەكەنسىڭ! عاجايىپ ونەرىڭمەن اناۋ زاڭنان اتتاپ، قالىڭ حالىقتى زار جىلاتقان بۇزاقىلاردىڭ جازاسىن بەردىڭ! وسىلايشا ءبىزدىڭ جانىمىزدى جاي تاپتىرعايسىڭ!»، - دەسىپ، اۋىز جاپپاي ماداقتاستى.
جۇرگىزۋشى تەلەارنا عيماراتىنا قونا جاتىپ، كۇنىنە ءۇش رەت كوگىلدىر ەكرانعا شىعىپ، حالىقپەن جۇزدەسىپ تۇردى. ول ءار رەت ءبىر توسىن حابارمەن جۇرتتى ءدۇر سىلكىندىرەتىن ەدى. ونىڭ اتاعى دا اسقاقتاي بەردى.
الايدا، بىرنەشە كۇننەن سوڭ ونىڭ دەنساۋلىعى سىر بەرە باستادى. ول اپتا سايىن امالىن تاۋىپ رۇقسات الاتىن بولدى. ول ۇيىنە قايتقىسى كەلىپ تۇراتىندى شىعاردى. ءبىراق، ول ۇيىنە بارا جاتقان جولدا كەزدەسكەن جانداردىڭ ءبارى ودان ات-تونىن الا قاشاتىن ەدى.
بۇلار ءوز جۇمىس ورىندارىنىڭ ءىس ساپار قاراجاتىن قىمقىرعان، ەرەجەگە قايشى كولىك جۇرگىزگەن نەمەسە وتىرىك اۋىرىپ قالىپ قىزمەتتەرىنەن قاشقان، وقۋشى كەزىندە ەمتيحاندا قارالىق جاساعان، ايەلىن الداعان دەگەندەي بارلىق جۇرتتىڭ سىرت ادامدار بىلە بەرمەيتىن ءبىر شيكىلىكتەرى بار بولسا كەرەك. ولار تەلەارنادا اتاعى شارىقتاپ تۇرعان وسىناۋ جۋرناليستكە جاقىنداعىلارى كەلمەيتىن ەدى. ولار وزدەرى جاسىرىپ جۇرگەن ىستەرىن ونىڭ بارشا حالىققا جاريالاپ جىبەرۋىنەن قورقاتىن ەدى.
ول قاتتى جابىرقاپ، ۇيىنە زورعا جەتتى. ءبىراق، ايەلى ۇيىندە بولماي شىقتى. سۇراستىرىپ كورىپ ەدى، بىرنەشە كۇن بۇرىن زاتتارىن جيناپ بۇل جەردەن تايىپ تۇرىپتى. ول دا مۇنىڭ عاجايىپ ونەرىنەن ۇرەيلەنسە كەرەك.
پياۋ شىنگي (جاپونيا)
massaget
