عارىشقا شىعارىلاتىن تۇركى ەلدەرىنىڭ بىرلەسكەن سپۋتنيگى تانىستىرىلدى
تاشكەنت. KAZINFORM - بۇگىن تاشكەنتتە تۇركى مەملەكەتتەرى ۇيىمىنا (ت م ۇ) مۇشە ەلدەر بىرلەسىپ قۇراستىرىپ جاتقان CubeSat سپۋتنيگى تانىستىرىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى.
بۇل كۇندەرى تاشكەنتتە Space Technology Conference كونفەرەنسياسى ءوتىپ جاتىر. ونىڭ اياسىندا ت م ۇ-عا مۇشە ەلدەر عارىش اگەنتتىكتەرىنىڭ جەتەكشىلەرى باس قوستى. كەزدەسۋدە ماماندار 12U CubeSat سپۋتنيگىن قۇراستىرۋ جانە ونى كوسموسقا شىعارۋ ماسەلەلەرىن تالقىلادى.
ءىس-شارادا العاش بولىپ ءسوز العان تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ كەزدەسۋدىڭ ماڭىزىنا توقتالا كەلە، قازاقستاندىق دەلەگاتسيا وكىلدەرىنە العىس ءبىلدىردى.
- كەزدەسۋلەرگە تۇراقتى قاتىسىپ، بىرلەسكەن كۇش-جىگەرلەردى ىلگەرىلەتۋگە ۇلەس قوسىپ كەلە جاتقان بارشا تاراپقا ريزاشىلىعىمدى بىلدىرەمىن. اسىرەسە، ءبىزدىڭ نەگىزگى باستامامىز - 12U CubeSat سپۋتنيگىنىڭ مودەلىن اكەلگەنى ءۇشىن قازاق باۋىرلارىمىزعا العىسىمىز شەكسىز، - دەدى ۇيىمنىڭ باس حاتشىسى.
كۋبانىچبەك ومۋراليەۆ ت م ۇ-عا مۇشە ەلدەر بىرلەسىپ كوسموسقا ۇشىراتىن جەرسەرىكتى قۇراستىرۋ جۇمىستارى اياقتالۋعا جاقىن ەكەنىن اتاپ ءوتتى.
- بۇل جەتىستىك ءبىزدىڭ تەحنيكالىق مۇمكىندىگىمىزبەن قاتار، ۇجىم رەتىندەگى قارىم- قابىلەتىمىزدى كورسەتەدى. وسى رەتتە مەن قازاق تاراپىنان CubeSat سپۋتنيگىنىڭ جوباسى ءۇشىن حالىقارالىق اۆياتسيا كوميتەتىنەن راديوجيىلىكتى ۇيلەستىرۋ رۇقساتىن الۋ ءىسىن جەدەلدەتۋدى سۇرايمىن. سىزدەر كاسىبي مامان رەتىندە قۇرىلعىنى تىركەۋ جانە ول بويىنشا بارلىق تەحنيكالىق مالىمەتتەردى جەتىك بىلەسىزدەر، - دەپ ءمالىم ەتتى كۋبانىچبەك ومۋراليەۆ.
كونفەرەنسياعا قازاقستاندىق دەلەگاتسيانى باستاپ كەلگەن اەروعارىش كوميتەتى ءتوراعاسىنىڭ ورىنباسارى قۋاندىق شۇلەنبايەۆ سپۋتنيكتى قۇراستىرۋ كەزەڭدەرىنە توقتالىپ، ءار ەلدىڭ ۇلەسىن اتاپ ءوتتى.
- بۇل جوبانى نەگىزىنەن ءبىز ىسكە اسىرىپ جاتىرمىز. سونداي-اق وعان باسقا دا تۇركى مەملەكەتتەرى تارتىلعان. ماسەلەن، ءبىر ەل قارجىلىق قولداۋ كورسەتسە، ەندى ءبىرى قۇرىلعىنىڭ قوزعالتقىشىن قۇراستىرىپ جاتىر. اتالعان جەرسەرىكتى 2027 -جىلى عارىش كەڭىستىگىنە شىعارۋ جوسپارلانعان، - دەدى Kazinform ءتىلىشىسىنىڭ ساۋالىنا جاۋاپ بەرگەن قۋاندىق شۇلەنبايەۆ
ونىڭ ايتۋىنشا، 12U CubeSat نانوسپۋتنيك سانالادى. ول عارىشتا 5 جىلعا دەيىن زەرتتەۋ جۇرگىزۋگە قاۋقارلى.
- جەرسەرىكتى پايدالانۋ مەرزىمى شامامەن 3-5 جىل. ماسەلەن، KazEOSat-1 جانە KazEOSat-2 ءىرى سپۋتنيكتەرى كەڭىستىكتە 7 جىل قىزمەت ەتەدى. ەگەر قۇرىلعى زاقىمدالماسا، ونداعى وتىن كولەمى جەتكىلىكتى بولسا، جەرسەرىكتى قولدانۋ مەرزىمىن ۇزارتۋعا بولادى. بۇكىل الەمدىك تاجىريبەگە ساي، سپۋتنيك 7-8 جىلدىق ەسەپپەن ۇشىرىلادى، ءبىراق كەيبىر قۇرىلعىلار 15-20 جىلعا دەيىن جۇمىس ىستەيدى، - دەپ تۇيىندەدى كوميتەت باسشىسىنىڭ ورىنباسارى.
ەسكە سالايىق، جاقىندا كوسموسقا اتتاناتىن تۇڭعىش وزبەك عارىشكەرىنە قويىلاتىن تالاپتار جاريالاندى.
قوسا كەتسەك، بيىل وزبەكستان مەن قىتاي عارىشقا جەردى قاشىقتىقتان زوندتايتىن سپۋتنيك ۇشىرۋدى جوسپارلاپ وتىر.
سونداي-اق، وزبەكستان 2028 -جىلى «Mirzo Ulug’bek» سپۋتنيگىن عارىش كەڭىستىگىنە شىعارادى.
