عارىش قوقىسىنىڭ قاۋپى زور

ۇشاقتاردىڭ عارىش قوقىسىمەن سوقتىعىسۋ قاۋپى جىلدان جىلعا ارتىپ بارادى. كانادالىق عالىمدار وسىلاي دەيدى. ەر ماڭىنداعى وربيتادا 2 مىڭنان اسا پايدالانىلعان زىمىران بولىكتەرى بار. بۇل مەتالل زاتتاردىڭ سالماعى جۇزدەگەن كەلىگە دەيىن جەتەدى. ۋاقىت وتە كەلە ولار جەرگە قۇلاۋى مۇمكىن.

سولتۇستىك امەريكا مەن ەۋروپادا ۇشاقتار ءجيى قاتىنايتىن ايماققا زىمىراننىڭ پايدالانىلعان بولىكتەرىنىڭ قۇلاۋ ىقتيمالدىعى 26 پايىزعا تەڭ. كانادالىق عالىمداردىڭ زەرتتەۋ ناتيجەسى وسىنداي. ولاردىڭ ەسەپتەۋىنشە، نەبارى 1 گرامدىق زىمىران سىنىعى ۇشاقتىڭ قوزعالتقىشىنا نە الدىڭعى اينەگىنە تيسە، سوڭى اپاتقا اكەپ سوقتىرۋى مۇمكىن. عارىش نىساندارى قالدىقتارىنىڭ ادامدار تۇراتىن ايماقتارعا قۇلاعان كەزدەرى بولعان. 5  جىل بۇرىن قىتايلىق زىمىراننىڭ سىنىقتارى باتىس افريكاداعى كوت- د’يۆۋار مەملەكەتىنىڭ اۋماعىنا ءتۇسىپ، بىرنەشە عيماراتتى بۇلدىرگەن. 4 جىل بۇرىن ءۇندى مۇحيتىندا دا ۇقساس وقيعا بولعان. عالىمدار مۇنداي جاعدايلاردى بولدىرماۋ ءۇشىن ەسكى جەر سەرىكتەرىنىڭ وربيتاسىن وزگەرتىپ جاتادى. ءبىراق سونىڭ وزىندە عارىش قوقىسىنان ارىلۋدىڭ ءتيىمدى ءتاسىلى ءالى ويلاپ تابىلعان جوق.

 زىمىران بولىكتەرىنىڭ عارىش ايلاعىنا ورالۋىن قامتاماسىز ەتەتىن تەحنولوگيالار بار. ءبىراق بۇگىندە ونىمەن زىمىرانداردىڭ تەك 35 پايىزى عانا جابدىقتالعان. سولاردىڭ قاتارىندا امەريكالىق سپەيس يكس تە بار. بىلتىر يلون ماسكتىڭ كومپانياسى ۇشىرعان زىمىران بولىكتەرى العاش رەت عارىش ايلاعىنا قايتىپ قونعان. ءبىراق كوپ جاعدايدا ولار ىستەن شىققان جەر سەرىكتەرى، زىمىران-تاسىعىشتارىنىڭ بلوكتارى، ءتىپتى عارىشكەرلەردىڭ جوعالتىپ العان زاتتارىمەن بىرگە عارىش قوقىسىنا اينالىپ جاتادى. جۋلدىز اتاگەلديەۆا، ساندۋگاش بايگۋانىش

https://24.kz