عاني بەيسەمبايەۆ: مۇعالىمدەردى ارتىق جۇمىسقا تارتۋ كۇرت تومەندەدى

استانا. KAZINFORM - بىلىمگە قاتىسى جوق دۇنيەلەردى مۇعالىمگە جۇكتەۋ ءبىلىم سالاسىنان كۇتەتىن ناتيجەگە قاساقانا نۇقسان كەلتىرۋمەن پارا-پار. بۇل تۋرالى وقۋ-اعارتۋ ءمينيسترى عاني بەيسەمبايەۆ ايتتى.

- «پەداگوگ مارتەبەسى تۋرالى» زاڭ قابىلدانعاننان بەرى مۇعالىمدەردى ارتىق جۇمىسقا تارتۋ كۇرت تومەندەدى. سالىستىرمالى تۇردە ايتار بولساق، 2020-جىلدارى مۇعالىمدەردى ارتىق جۇمىسقا تارتۋعا قاتىستى 30 دان اسا شاعىم تۇسەتىن بولسا، بۇگىندە جىلىنا 4-5 شاعىم عانا كەلەدى. ارينە، ءبىز ءۇشىن بۇل دا كوپ. ول نەمەن بايلانىستى؟ بۇل - كەيبىر وڭىردە اكىمدىكتەردىڭ نەمەسە ءبىلىم باسقارمالارىنىڭ زاڭعا قاتىستى نورمالاردى تولىققاندى تۇسىنبەيتىندىگى نەمەسە ورىنداماي وتىرعانىنىڭ بەلگىسى. وسىعان قاتىستى اكىمدىكتەرگە نە باسقارمالارعا ەسكەرتۋ بەرىپ وتىرامىز. ياعني، زاڭ بولعاندىقتان ونى ورىنداۋ - مىندەت. زاڭ ورىندالۋى، بۇزىلماۋى ءتيىس، - دەدى مينيستر.

ونىڭ پايىمىنشا، مۇعالىمنىڭ ەڭ باستى مىندەتتەرىنىڭ ءبىرى - بالاعا ساپالى ءبىلىم بەرۋ. ۇستاز ەش نارسەگە الاڭداماۋى ءتيىس. ودان بالاعا ساپالى ءبىلىم بەرۋىن عانا سۇراۋ قاجەت.

- بىلىمگە قاتىسى جوق دۇنيەلەردى مۇعالىمگە جۇكتەي بەرۋدىڭ ءوزى مەملەكەتتىڭ ءبىلىم سالاسىنان كۇتەتىن ناتيجەسىنە قاساقانا نۇقسان كەلتىرۋمەن پارا-پار. ءبىز ونى دا ءتۇسىنۋىمىز قاجەت. وسى ماسەلەنى ورىندايتىن ءتيىستى ورگانداردىڭ جاۋاپكەرشىلىگىن قاتاڭداتۋدى تالاپ ەتۋىمىز قاجەت. بۇگىندە باستى ماسەلە - جەرگىلىكتى اتقارۋشى ورگانداردىڭ جازىلعان ەرەجەلەردى، زاڭنامالىق ەرەجەلەردى، زاڭ نورمالارىن بۇزباي ساۋاتتى، تولىققاندى ورىنداۋىنا بايلانىستى. ارينە، ءار وڭىردەگى جاعدايعا ساپانى قامتاماسىز ەتۋ دەپارتامەنتتەرىمىز ارقىلى باقىلاۋ جۇرگىزىپ، ونى تولىق قاداعالاپ وتىرامىز. ماسەلە كوتەرىلگەن جاعدايدا مينيسترلىكتىڭ ءتيىستى الگوريتمى ارقىلى شارا قولدانىلادى، - دەدى عاني بەيسەمبايەۆ.

ەسكە سالا كەتەيىك، بۇدان بۇرىن وقۋ-اعارتۋ ءمينيسترى ەلىمىزدەگى بارلىق ءبىلىم ورداسى زاماناۋي «كەلەشەك مەكتەپتەرىنە» اينالاتىنىن ايتقان ەدى. سونداي-اق عاني بەيسەمبايەۆ قازاقستانداعى مەكتەپتەر ءبىر اۋىسىمدى وقىتۋ جۇيەسىنە قادام باسقانىن تىلگە تيەك ەتتى. سونىمەن بىرگە سۇحبات بارىسىندا ون وڭىردەگى ەسكى، اپاتتى جاعدايدا تۇرعان مەكتەپتەر جاڭارتىلاتىنى بەلگىلى بولدى.