عالىمدار ۇيلەنۋ مەن الجۋدىڭ اراسىندا بايلانىس بارىن انىقتادى

ءسىز وتباسىن قۇرماعان ادامدا دەمەنتسيا بولۋ ىقتيمالدىعى تومەن ەكەنىن ەستىسەڭىز، سەنەر مە ەدىڭىز؟ جاڭا زەرتتەۋ ءدال وسىنى كورسەتىپ وتىر. بۇل زەرتتەۋدى ا ق ش-تاعى فلوريدا شتاتى ۋنيۆەرسيتەتىنىڭ عالىمدارى جۇرگىزگەن.

بۇعان دەيىن كوپ زەرتتەۋلەر كەرىسىنشە - ۇيلەنگەن ادامداردا دەنساۋلىق جاقسىراق، ولار ۇزاق ءومىر سۇرەدى جانە دەمەنتسياعا سيرەك شالدىعادى دەگەن بولاتىن. ءبىراق بۇل جولى باسقاشا ناتيجە شىقتى.

زەرتتەۋگە 24000 نان اسا ادام قاتىسقان. باستاپقىدا ولاردىڭ ەشقايسىسىندا دەمەنتسيا بولماعان. عالىمدار ولاردى 18 جىل بويى باقىلاپ، ءتورت توپقا بولگەن: ۇيلەنگەندەر، اجىراسقاندار، جەسىر قالعاندار جانە ەشقاشان ۇيلەنبەگەندەر.

باسىندا بويداق ادامداردا دەمەنتسيا از بولادى دەگەندەي ناتيجە شىققان. ءبىراق باسقا فاكتورلاردى - مىسالى، تەمەكى شەگۋ نەمەسە دەپرەسسيا - ەسكەرگەننەن كەيىن، تەك اجىراسقان جانە ەشقاشان ۇيلەنبەگەن ادامداردا عانا دەمەنتسيا قاۋپى راسىمەن تومەن ەكەنى انىقتالعان.

تاعى ءبىر قىزىعى - ۇيلەنبەگەندەردە التسگەيمەر سياقتى ءجيى كەزدەسەتىن دەمەنتسيا ءتۇرى سيرەك بولعان. ال سيرەك كەزدەسەتىن تامىرلىق دەمەنتسيادا مۇنداي بايلانىس بايقالماعان.

عالىمدار بۇل دەرەكتەر نەكە مەن مي ساۋلىعى اراسىنداعى بايلانىستى جاقسىراق تۇسىنۋگە كومەكتەسەدى دەيدى. ءبىراق ءبارى ادامنىڭ ءومىر سالتى مەن جاعدايىنا بايلانىستى ەكەنىن دە ەسكەرتكەن.

ايتا كەتەيىك، دەمەنتسيا لاتىن تىلىنەن اۋدارعاندا ەسىنەن اداسۋ، الجۋ دەگەندى بىلدىرەدى.