عالىمدار قوقىستان سيرەك مەتالدار ءوندىرۋدى ويلاپ تاپتى
استانا. قازاقپارات - بۇرىن تەك جەر قويناۋىنان الىناتىن سيرەك مەتالداردى ەندى قوقىستان وندىرۋگە بولادى. شۆەيتساريالىق عالىمدار وسىنداي جاڭا ءادىس ويلاپ تاپتى. ماماندار بۇل پايدالى قازبالارعا تاۋەلدىلىكتى ازايتاتىنىن ايتادى.
قوقىسقا تاستالعان سمارتفون، تەلەديدار، كومپيۋتەر سياقتى ەسكى تەحنيكادان سيرەك مەتالدار ارنايى ۇنتاق ارقىلى ءبولىنىپ الىنادى. شۆەيتساريالىق عالىمدار قالدىقتاردى قايتا وندەۋدىڭ جاڭا ءادىسى ەكولوگيالىق قانا ەمەس ەكونوميكالىق تۇرعىدان دا ۇتىمدى، دەيدى.
ماري پەررين، ETH Zurich زەرتتەۋ ورتالىعىنىڭ عىلىمي قىزمەتكەرى:
- ۇزاق ۋاقىت بويى سيرەك مەتالدى قوقىسقا تاستالعان تۇرمىستىق تەحنيكانى وڭدەۋ ارقىلى العاننان كورى جاڭا كەن قازۋ ەڭ ارزان جول بولدى. قازىر جاعداي وزگەرىپ كەلەدى. بۇعان كوبىنە گەوساياسي احۋال ىقپال ەتىپ جاتىر. سەبەبى مەملەكەتتەر وزگە ەلدەردەگى رەسۋرستارعا تاۋەلدىلىكتى ازايتۋ ءۇشىن تىڭ جولداردى ىزدەۋگە ءماجبۇر.
سيۋريحتەگى تەحنولوگيا ينستيتۋتىنىڭ مالىمەتى بويىنشا، بۇگىندە سيرەك مەتالداردىڭ %1- دايى عانا قايتا وڭدەۋمەن الىنادى. سەبەبى ولاردى ءبولىپ شىعارۋ ءۇشىن كوپ ەنەرگيا مەن حيميالىق رەاگەنتتەر قاجەت. قازىر سيرەك مەتالداردىڭ %85- ىن قىتاي وڭدەيدى، باعانى دا وزدەرى بەلگىلەيدى. بۇل ەۋروپا ءۇشىن ءتيىمسىز.
ماري پەررين، ETH Zurich زەرتتەۋ ورتالىعىنىڭ عىلىمي قىزمەتكەرى:
- ازىرگە ءبىز مۇنى تەك زەرتحانا جاعدايىندا جاساپ ءجۇرمىز. بولاشاقتا اۋقىمدى وڭدەۋ جۇمىستارىن جۇرگىزگىمىز كەلەدى. بۇل جەرگىلىكتى ونەركاسىپ ءۇشىن كەلەسى ماڭىزدى كەزەڭ بولماق.
شۆەيتساريالىق زەرتتەۋشىلەر ەندى تەحنولوگيانى وندىرىستىك جولعا قويۋدى كوزدەپ وتىر. بولاشاقتا كاسىپورىندار ءوز ماتەريالدارىن وزدەرى قايتا وڭدەي الۋى ءتيىس، دەيدى ماماندار.
24.kz
