عالىمدار مىسىرداعى ەكىنشى جاسىرىن قالانى تاپتى
استانا. KAZINFORM - يتاليالىق زەرتتەۋشىلەر توبى بۇعان دەيىن مىسىر اۋماعىنان جەراستى جاسىرىن قالانى تاپقان بولاتىن. جۋىردا ولار تاعى ءبىر ۇقساس قۇرىلىمدى انىقتاپ، بۇل گيزا پيراميدالارىن شامامەن 910 مەتر (2000 فۋت) تەرەڭدىكتە ءبىر- بىرىمەن بايلانىستىراتىن الىپ جەراستى كەشەنىنىڭ بار ەكەنىن «دالەلدەيدى» دەپ مالىمدەدى، دەپ حابارلايدى ازەرتادج.
العاش رەت 2024 -جىلعى ناۋرىزدا حافرا پيراميداسىنىڭ استىنان ۇلكەن جەراستى قۇرىلىمىنىڭ تابىلعانى جاريالانعان ەدى. الايدا بۇل جاڭالىق جەتەكشى ارحەولوگتاردىڭ سىن-ەسكەرتپەلەرىنە ۇشىراپ، ولار زەرتتەۋ قورىتىندىلارىن «جالعان» ءارى عىلىمي نەگىزدەن ادا دەپ اتادى. سەبەبى گەوراداردىڭ مۇنداي تەرەڭدىككە دەيىن سكانەرلەي المايتىنىن العا تارتقان بولاتىن. سوعان قاراماستان، بىرنەشە ايدان كەيىن زەرتتەۋ توبى ەڭ كىشى نەگىزگى پيراميدا مەنكاۋرا استىنان دا وسىنداي شاحتالار تابىلعانىن حابارلادى.
زەرتتەۋدىڭ اۆتورى ءارى شوتلاندياداعى ستراتكلايد ۋنيۆەرسيتەتىنىڭ راديولوكاتسيا مامانى فيليپپو ءبيونديدىڭ ايتۋىنشا، الىنعان مالىمەتتەر مەنكاۋرا پيراميداسىنىڭ استىندا حافراداعىداي تىرەك قۇرىلىمداردىڭ بار بولۋ ىقتيمالدىعى 90 پايىز ەكەنىن كورسەتىپ وتىر.
- ءبىز بۇل قورىتىندىعا توموگرافيا دەرەكتەرىن وبەكتيۆتى تالداۋ ارقىلى كەلدىك. بۇل قۇرىلىمدار ەكسپەريمەنتتىك ولشەۋلەر نەگىزىندە حافرا پيراميداسىنىڭ استىنان انىقتالعان ەلەمەنتتەردىڭ مەنكاۋرادا دا بار ەكەنىن ايقىن كورسەتەدى، - دەدى بيوندي.
ونىڭ ايتۋىنشا، گيزا كەشەنىندەگى بارلىق قۇرىلىم ءوزارا بايلانىستا بولۋى مۇمكىن. بۇل ءوز كەزەگىندە پيراميدالاردىڭ اسا ءىرى جەراستى ينفراقۇرىلىم كەشەنىنىڭ «ايسبەرگتىڭ ۇشى» عانا ەكەنىن دالەلدەيدى.
- بۇل جۇيە جەر استىنداعى نەگىزگى قۇرىلىمداردى جالعايتىن تۋننەلدەردەن تۇراتىن تىعىز جەلىنى قۇراۋى مۇمكىن، - دەيدى زەرتتەۋشى.
بيوندي مەن ونىڭ كومانداسى بۇل نىساندار شامامەن 38 مىڭ جىل بۇرىن ءومىر سۇرگەن، جويىلىپ كەتكەن كونە وركەنيەتكە تيەسىلى دەگەن بولجام ايتادى. دەگەنمەن ارحەولوگتاردىڭ باسىم بولىگى گيزا پيراميدالارىنىڭ جاسى 4,5 مىڭ جىل دەپ ەسەپتەيدى.
زەرتتەۋشىلەردىڭ حرونولوگياسى بويىنشا، بۇل وركەنيەت شامامەن 12800 جىل بۇرىن جاھاندىق اپات، مىسالى كومەتانىڭ سوقتىعىسۋى سالدارىنان جويىلىپ كەتكەن. سالدارىنان جەر بەتىن سۋ باسىپ، حاوس ورناپ، وركەنيەتتىڭ كوپ بولىگى جويىلعان. امان قالعاندار ءوز ءبىلىمىن استرونوميا، ينجەنەريا جانە كيەلى ارحيتەكتۋرا سالالارىنداعى تاجىريبەلەرىن كەيىنگى وركەنيەت، سونىڭ ىشىندە كونە مىسىرلىقتارعا مۇرا ەتىپ قالدىرعان.
