عالىمدار شايدىڭ تاعى ءبىر پايداسىن انىقتادى
استانا. قازاقپارات - ا ق ش عالىمدارى شايدىڭ ادام دەنساۋلىعىنا تيگىزەتىن تاعى ءبىر جاڭا قىرىنان اشتى. زەرتتەۋ ناتيجەلەرىنە سايكەس، شاي جاپىراقتارى سۋدان اۋىر مەتالداردى، سونىڭ ىشىندە قورعاسىندى ءسۇزىپ، ولاردىڭ مولشەرىن ازايتا الادى.
زەرتتەۋشىلەر جاسىل، قارا، ۋلۋن، اق شاي، سونداي-اق تۇيمەداق پەن رويبۋشتى سىناقتان وتكىزدى. ولار بۇل شايلاردى قۇرامىندا بەلگىلى مولشەردە قورعاسىن، حروم، مىس، مىرىش جانە كادمي بار سۋمەن 85 گرادۋس تەمپەراتۋرادا دەمدەدى. ناتيجەسىندە ءبىر شىنى شايدى دەمدەۋ سۋدان قورعاسىننىڭ %15 ىن جويا الاتىنى انىقتالدى.
«شاي جاپىراقتارىنىڭ بەتكى قاباتى كەڭ، بۇل ولاردىڭ سۋدان زياندى ەلەمەنتتەردى سىڭىرۋىنە مۇمكىندىك بەرەدى»، - دەدى زەرتتەۋدىڭ جەتەكشى اۆتورى، دوكتورانت بەندجامين شيندەل.
عالىمداردىڭ ايتۋىنشا، قارا شاي اۋىر مەتالداردى ءسىڭىرۋ جاعىنان ءسال تيىمدىرەك. سونىمەن قاتار، ۇساقتالعان شاي جاپىراقتارى مەتالداردى جاقسىراق سۇزەدى، ال شايدى ۇزاق ۋاقىت دەمدەۋ بۇل پروتسەستى ودان ءارى كۇشەيتەدى.
زەرتتەۋ بارىسىندا شاي پاكەتتەرىنىڭ دە ءرول اتقاراتىنى انىقتالدى. سەلليۋلوزادان جاسالعان شاي پاكەتتەرى اۋىر مەتالداردى ۇستاۋعا كومەكتەسسە، ماقتا مەن نەيلوننان جاسالعاندارى ونداي اسەر كورسەتپەيدى.
شايدىڭ بۇل جاڭا قاسيەتى ونىڭ جۇرەك- قان تامىرلارى جۇيەسىنە وڭ اسەرى مەن نەيرودەگەنەراتيۆتى اۋرۋلاردىڭ الدىن الۋ قابىلەتىنە قوسىمشا ارتىقشىلىق رەتىندە قاراستىرىلۋدا.
«ادامدار كۇنىنە ءبىر شىنى شايدى ارتىق ىشسە، اۋىر مەتالداردىڭ اعزاعا اسەرىنە بايلانىستى اۋرۋلار سانى ازايۋى مۇمكىن»، - دەدى شيندەل.
