عالىمدار «ءولىم كۇنىن» بولجايتىن ساعات ويلاپ تاپتى

استانا. KAZINFORM - سان- فرانتسيسكوداعى كاليفورنيا ۋنيۆەرسيتەتىنىڭ عالىمدارى قولدانۋشىعا ونىڭ دەمى تاۋسىلاتىن كۇنىن انىقتاۋعا كومەكتەسەتىن جاساندى ينتەللەكتكە نەگىزدەلگەن باعدارلاما ويلاپ تاپتى. ول «ءولىم ساعاتى» دەپ اتالدى. بۇل تۋرالى «New York Post» باسىلىمى حابارلادى.

باسىلىمنىڭ حابارلاۋىنشا، ونەرتاپقىشتار بۇل ساعات ۇزاق ءومىر سۇرۋگە كومەكتەسەتىن جاساندى ينتەللەكتكە نەگىزدەلگەن باعدارلاما ەكەنىن مالىمدەگەن. قولدانار الدىندا ارنايى ساۋالنامالار ارقىلى يەسىنىڭ دەنساۋلىعى تۋرالى اقپاراتتى جينايدى. ولار سالماقتى، قانداعى قانت دەڭگەيىن جانە قىسىمدى، ۇيقىنىڭ ساپاسىن، فيزيكالىق بەلسەندىلىكتى، زياندى ادەتتەردى، ديەتانى جانە ءومىر ءسۇرۋ ۇزاقتىعىنا اسەر ەتەتىن باسقا فاكتورلاردى ەسكەرەدى.

سونىمەن قاتار، بولجامدى ءولىم كۇنىن ەسەپتەۋ كەزىندە ادامنىڭ الەۋمەتتىك ءومىرى مەن پسيحيكالىق جاعدايى باعالانادى - قولدانبا پايدالانۋشىنىڭ قارىم- قاتىناسقا قانشا ۋاقىت جۇمسايتىنىن جانە بەلگىلى ءبىر كەزەڭدە قانداي كوڭىل كۇيدىڭ باسىم بولعانىن تالدايدى.

«ءولىم ساعاتى» قايتىس بولعان كۇندى ءدال كورسەتەتىنى اتاپ وتىلگەن. سونىمەن قاتار، باعدارلاما بيولوگيالىق جاستى كورسەتەدى جانە ءومىردى ۇزارتۋ ءۇشىن موتيۆاتسيالىق قۇرالداردى، جاتتىعۋ نۇسقالارىن، قوسىمشا ۇسىنىستاردى جانە دۇرىس تاماقتانۋ يدەيالارىن ۇسىنادى.

اۆتورلاردىڭ ايتۋىنشا، «ءولىم ساعاتى» ادامداردى ءومىر سالتىن وزگەرتۋگە جانە زياندى ادەتتەردەن باس تارتۋعا يتەرمەلەۋى مۇمكىن.