عالىمدار بولاشاقتا 1000 جاسقا دەيىن ءومىر سۇرۋگە بولاتىنىن ايتتى

استانا. قازاقپارات - ماڭگىلىك ءومىر ءسۇرۋ عاسىرلار بويى ادامزاتتى مازالاپ كەلگەن ەسكى يدەيا. كوپتەگەن عالىمدار ماڭگى ءومىر ءسۇرۋ جولدارىن ىزدەگەن، ەندى سونىڭ جولىن فۋتۋرولوگ عالىم ۇسىنادى.

نانوروبوتتار ادامنىڭ قارتايۋىن توقتاتىپ، مىڭ جىل ءومىر سۇرۋگە مۇمكىندىك بەرەتىن كىلت بولۋى مۇمكىن.

ادامنىڭ جاراتىلىسىندا ۇزاق ءومىر سۇرۋگە دەگەن قىزىعۋشىلىقتىڭ بار ەكەنىن، ونى ىسكە اسىرۋدىڭ تاعى ءبىر ءتاسىلى بولجانعانىن bgr.com سايتى جازدى. Aikyn.kz بۇل ماتەريالدىڭ نەگىزىندە قانداي عىلىمي نەگىز بار ەكەنىن تالدايدى.

جاراتۋشىنىڭ ادامعا بەرگەن ءومىرىن ۇزارتۋ جولدارىن عالىمدار عاسىرلار بويى ىزدەۋدە. ءبىراق بۇل ىزدەنىستەر ناتيجەسىز.

جاراتۋشىنىڭ ادامعا بەرگەن ءومىرىن ۇزارتۋ جولدارىن عالىمدار عاسىرلار بويى ىزدەۋدە. ءبىراق بۇل ىزدەنىستەر ناتيجەسىز. جاقىندا امەريكالىق فۋتۋرولوگ عالىم رايموند كۋرتسۆەيل ءوزىنىڭ كىتابىندا جاڭا ءتاسىل تۋرالى جازدى.

كۋرتسۆەيلدىڭ ويىنشا، نانوروبوتتار ادامنىڭ قارتايۋىن توقتاتىپ، مىڭداعان جىلدار بويى ءومىر سۇرۋگە مۇمكىندىك بەرەتىن كىلت بولۋى مۇمكىن.

ارينە، ماڭگىلىك بىلاي تۇرسىن، بىرنەشە ءجۇز جىل ءومىر ءسۇرۋ مۇمكىندىگى تۋرالى الاڭداۋشىلىقتار بار. دەگەنمەن قارتايۋعا قارسى جاڭا تەراپيالار بەلگىلى عالىمدار ءۇشىن ورتاق زەرتتەۋ باعىتى بولىپ قالۋدا. كەيبىر باي ادامدار بۇگىننىڭ وزىندە اعزانىڭ تابيعي قارتايۋىن باسەڭدەتۋ ارقىلى ءومىرىن ۇزارتۋعا تىرىسۋدا.

بيوتەحنولوگيانى جاساندى ينتەللەكتپەن ۇيلەستىرۋ ارقىلى ادامنىڭ قارتايۋىن بولدىرماۋعا بولادى.

كۋرتسۆەيل سياقتى زەرتتەۋشىلەردىڭ ماقساتتارى بۇدان دا جوعارىراق سياقتى. ول نانوتەحنولوگيانى ادام ءومىرىن ۇزارتۋ ماقساتىندا قولدانۋ تۋرالى ءوزىنىڭ «The Singularity is Nearer» اتتى جاڭا كىتابىندا دا، Wired جۋرنالىندا جاريالانعان ماقالاسىندا دا جازدى. ەكى ەڭبەكتە دە بيوتەحنولوگيانى جاساندى ينتەللەكتپەن ۇيلەستىرۋ جولدارى تالقىلانادى. وسىلايشا زەرتتەۋشى ادامنىڭ قارتايۋىن مۇمكىندىگىنشە ازايتۋ ارقىلى ادامنىڭ تابيعي السىزدىگىن بولدىرماۋدى ۇسىنادى.

فۋندامەنتالدى سەبەپكە ۇڭىلسەك، قارتايۋدىڭ ەڭ ۇلكەن پروبلەمالارىنىڭ ءبىرى - ءبىزدىڭ دەنەمىز بەن جاسۋشالارىمىز سىرتىق ورتانىڭ اسەرىمەن قاتەلەردى جيناي باستايدى. جاسۋشالار قايتا- قايتا بولىنگەن سايىن بۇنداي قاتەلەر جاڭا جاسۋشالاردا قايتالانىپ كوبەيە بەرەدى. كوپتەگەن قارتايۋعا قارسى تەراپيالار ءدال وسى قاتەلەردى ازايتۋعا باعىتتالعان، بۇل دەنەنىڭ بۇرىنعى تازا قالپىنا تەزىرەك كەلۋىنە كومەكتەسەدى. وسىلايشا جالپى قارتايۋ باسەڭدەيدى. كۋرتسۆەيل بولسا تۇپكى شەشىم رەتىندە - «قارتايۋدىڭ ءوزىن ەمدەۋدى» ۇسىنۋدا.

كۋرتسۆەيل مەديتسينادا نانوروبوتتاردى قولدانۋدىڭ جىلدام دامۋى جالپى قارتايۋىمەن كۇرەسۋگە كومەكتەسەدى دەپ سانايدى.

كۋرتسۆەيل ونىڭ بولجامدارى قازىرگى ۋاقىتتا اقىلعا قونىمسىز بولىپ كورىنۋى مۇمكىن ەكەنىن مويىندايدى، ءبىراق ول مەديتسينالىق نانوروبوتتاردى قولدانۋدىڭ جىلدام دامۋى بىزگە جاقىن ارادا ادامنىڭ جالپى قارتايۋىمەن كۇرەسۋگە كومەكتەسەدى دەپ سانايدى. بۇل ءۇشىن ادامنىڭ بارلىق اعزاسىنداعى «لاستانعان» ورگانداردى جوندەۋ ارقىلى ولاردىڭ جۇمىسىن جاقسارتىپ، جاسارتىپ وتىرۋ كەرەك. بۇنداي پروتسەدۋرا بىرنەشە ءجۇز ميللياردقا دەيىن نانوروبوتتاردى قاجەت ەتۋى مۇمكىن.

جالپى ادام اعزاسىن جاسارتۋعا جۇزدەگەن ميلليون نانوبوتتاردى قولدانۋ يدەياسى قىزىقتى بولۋى مۇمكىن. ويتكەنى ج ي-دىڭ قازىرگى دامۋ قارقىنى بۇنداي بولجامنىڭ شىندىقتان الىس ەمەستىگىن، گەرونتولوگيا عىلىمىندا سەرپىلىس تۋدىرۋى مۇمكىن ەكەنىن كورسەتەدى. تەك ادامزات جاراتۋشى بەلگىلەگەن زاڭدىلىقتار شەڭبەرىندە عانا ناتيجەگە قول جەتكىزە الاتىنىن ەستەن شىعارماساق بولعانى!