عالىمدار بريۋس لي نەدەن ولگەنىن 51 جىلدان كەيىن انىقتادى

استانا. KAZINFORM - مادريدتەگى عىلىمي ينستيتۋتتىڭ زەرتتەۋشىلەرى اتى اڭىزعا اينالعان جەكپە-جەك شەبەرى جانە كينواكتەر بريۋس ليدىڭ ەرتە قايتىس بولۋىن تۇسىندىرەتىن جاڭا دەرەكتەرمەن ءبولىستى، - دەپ حابارلايدى Massaget.kz ءتىلشىسى.

عالىمدار بولجامى

يسپان دارىگەرلەرىنىڭ ايتۋىنشا، اكتەر تاپسىرىسپەن ولتىرىلمەگەن. ول سول كەزدە سيرەك كەزدەسەتىن اۋرۋعا شالدىققان. بۇل تۋرالى پريستسيللا ۆيللاۆالسو Clinical Kidney Journal جۋرنالىندا جاريالادى.

ول ءوز كومانداسىمەن بىرگە مايىتتى سويۋ ناتيجەسىنىڭ دەرەكتەرىن تالداپ، اكتەردە ⅩⅩ عاسىردىڭ ورتاسىنداعى سيرەك كەزدەسەتىن اۋرۋ - گيپوناتريەميانى انىقتادى. بۇل اۋرۋ بۇيرەكتىڭ اعزادان ارتىق سۋدى شىعارۋىنا جول بەرمەيدى. وعان قوسا، بۇيرەك اۋرۋى (جەدەل بۇيرەك جەتكىلىكسىزدىگى) مەن اۋىر فيزيكالىق جۇكتەمەلەر جاعدايدى ۋشىقتىرعان.

عالىمداردىڭ ويىنشا، بۇل بريۋس ليدىڭ ميىنىڭ ىسىنۋىنە سەبەپ بولدى.

بريۋس ليدىڭ جۇمباق ءولىمى

ەسكە سالايىق، بريۋس لي - جەكپە-جەك ونەرىنىڭ اڭىزىنا اينالعان تۇلعا، گولليۆۋدتىڭ العاشقى ازيالىق جۇلدىزى، نەبارى 32 جاسىندا كەنەتتەن قايتىس بولدى. ونىڭ ءولىمى بۇكىل الەمدى تاڭعالدىردى، ءبىراق ناقتى سەبەبى ءالى كۇنگە دەيىن انىقتالعان جوق.

20-شىلدە 1973-جىل - بريۋس ليدىڭ ومىرىندەگى سوڭعى كۇن. سول كۇنى بريۋس لي گونكونگتا ءوزىنىڭ ارىپتەسى، اكتريسا بەتتي تين پەيدىڭ پاتەرىندە بولعان. ول ءوز فيلمىنىڭ سەناريىمەن جۇمىس ىستەپ جاتقان. كەشكىسىن بريۋس باس اۋرۋىنا شاعىمدانىپ، اكتريسانىڭ بەرگەن اۋىرسىنۋدى باساتىن ءدارىسىن قابىلداعان. الايدا ول ءدارىنى ىشكەننەن كەيىن ەسىنەن تانىپ، ويانباي قالعان.

بريۋس ليدىڭ ءولىمى تۋرالى كوپتەگەن بولجامدار ايتىلدى.

ءدارىنىڭ جاناما اسەرى. كەيبىر دەرەكتەرگە سۇيەنسەك، بريۋس باس اۋرۋىن باسۋ ءۇشىن قابىلداعان دارىگە اللەرگيالىق رەاكسيا بەرگەن. بۇل - العاشقى رەسمي نۇسقا.

مافيا قاستاندىعى. كەيبىرەۋلەر بريۋس ليدى گونكونگ مافياسى قاستاندىقپەن ولتىرگەن دەپ سانايدى. ونىڭ جەكپە-جەك ونەرى تۋرالى فيلمدەرى كەيبىر توپتاردىڭ مۇددەسىنە قايشى كەلگەن بولۋى مۇمكىن.

شامادان تىس فيزيكالىق جۇكتەمە. بريۋس لي كۇن سايىن اۋىر جاتتىعۋلار جاساعان، بۇل ونىڭ دەنساۋلىعىنا اسەر ەتۋى مۇمكىن دەگەن پىكىر بار.

بۇل وقيعا بىزگە دەنساۋلىققا مۇقيات قاراۋدىڭ، اعزانىڭ قاجەتتىلىكتەرىن دۇرىس ءتۇسىنۋدىڭ ماڭىزدىلىعىن كورسەتەدى. ماماندار جاي عانا كۇندەلىكتى ادەتتەر - مىسالى، سۋدى دۇرىس مولشەردە ءىشۋ نەمەسە ءدارى-دارمەكتى ساقتىقپەن پايدالانۋ - ءومىر مەن ءولىم اراسىندا شەشۋشى ءرول اتقاراتىنىن ەسكەرتەدى.