عالىمدار اتموسفەرالىق اۋادان سۋ وندىرەتىن جاڭا قۇرىلعى جاساپ شىعاردى
استانا. KAZINFORM - ا ق ش- تاعى ماسساچۋسەتس تەحنولوگيالىق ينستيتۋتىنىڭ ينجەنەرلەرى قاۋىپسىز ءارى ارزان اۋىز سۋعا قولجەتىمدىلىكتى ارتتىرۋ ماقساتىندا اۋانى پايدالانىپ وتىر.
AZƏRTAC اگەنتتىگىنىڭ حابارلاۋىنشا، جەر اتموسفەراسىندا بۋ كۇيىندە ميللياردتاعان گاللون سۋ بار. ەگەر وسى بۋدى ءتيىمدى تۇردە ۇستاپ، كوندەنساتسيالاۋعا مۇمكىندىك تۋسا، ول ءداستۇرلى سۋ كوزدەرى قولجەتىمسىز ايماقتاردى تازا اۋىز سۋمەن قامتاماسىز ەتە الادى.
وسى ماقساتتا ماسساچۋسەتس تەحنولوگيالىق ينستيتۋتىنىڭ كومانداسى اتموسفەرالىق سۋدى جيناۋعا ارنالعان جاڭا قۇرىلعى ويلاپ تاۋىپ، ونى سىناقتان وتكىزدى. ناتيجەسىندە بۇل قۇرىلعى سۋ بۋىن ءتيىمدى ۇستاپ، ءتىپتى شولدەگى قۇرعاق اۋا جاعدايىندا دا قاۋىپسىز اۋىز سۋ وندىرە الاتىنى دالەلدەندى.
قۇرىلعى - تەرەزە كولەمىندەي قارا ءتۇستى تىك پانەل. ول سۋ سىڭىرگىش گيدروگەل ماتەريالىنان جاسالىپ، سالقىنداتقىش قاباتپەن قاپتالعان شىنى كامەراعا ورنالاستىرىلعان. گيدروگەل - قارا ءتۇستى كوپىرشىكتى پلەنكا تارىزدەس، ونىڭ بەتىندە بۋ سىڭىرگەن كەزدە ىسىنەتىن كۇمبەز ءتارىزدى قۇرىلىمدار بار. بۋ بۋلانعان كەزدە بۇل كۇمبەزدەر جيىرىلىپ، وريگامي سەكىلدى پىشىنگە ەنەدى. بۋ شىنى بەتىنە كوندەنساتسيالانىپ، اعىپ، ارنايى تۇتىك ارقىلى ىشۋگە جارامدى تازا سۋ رەتىندە جينالادى.
قۇرىلعىنىڭ ەرەكشەلىگى - ول تولىقتاي اۆتونومدى، ياعني جۇمىس ىستەۋى ءۇشىن باتارەيا، كۇن پانەلدەرى نەمەسە ەلەكتر جەلىسى قاجەت ەمەس. كوماندا بۇل قۇرىلعىمەن ا ق ش- تاعى سولتۇستىك امەريكانىڭ ەڭ قۇرعاق ءوڭىرى سانالاتىن كاليفورنياداعى ءولىم اڭعارىندا ءبىر اپتادان اسا ۋاقىت جۇمىس جۇرگىزگەن. ءتىپتى وتە تومەن ىلعالدىلىق جاعدايىندا قۇرىلعى تاۋلىگىنە شامامەن 160 ميلليليتر (شامامەن ەكى ءۇشىنشى كەسەدەي) اۋىز سۋ وندىرە العان.
ينجەنەرلەردىڭ باعالاۋىنشا، بىرنەشە تىك پانەلدى شاعىن ماسسيۆ تۇرىندە ورناتۋ ارقىلى ءتىپتى شولەيت ايماقتاردا دا ءۇي شارۋاشىلىقتارىن اۋىز سۋمەن پاسسيۆتى تۇردە قامتاماسىز ەتۋگە بولادى. ال اۋا ىلعالدىلىعى ارتقان سايىن قۇرىلعىنىڭ ونىمدىلىگى دە ارتادى، بۇل ونى قوڭىرجاي جانە تروپيكتىك كليماتتاعى ۇيلەر ءۇشىن دە ءتيىمدى ەتەدى.
ايتا كەتەلىك 27 جاستاعى قازاقستاندىق عالىم جاڭا ولشەۋ قۇرىلعىسىن ويلاپ تاپقان ەدى.
