عالىمدار اگروقالدىقتاردان ءدارى جاساپ شىعاردى

استانا. قازاقپارات - استانالىق عالىمدار اۋىلشارۋاشىلىق وسىمدىكتەرىنىڭ قالدىعىنان ءدارى جاساپ شىعاردى. جاڭا ءونىم قان قىسىمىن رەتتەۋگە ارنالعان. زەرتتەۋشىلەر وسى ارقىلى پرەپارات ءوندىرىسى سالاسىندا مۇنايعا تاۋەلدىلىكتى ازايتۋدى كوزدەپ وتىر.

 عالىمدار ءدارى قۇرامىنداعى مۇناي ونىمدەرىنىڭ ورنىنا، كۇرىش قاۋىزى مەن جۇگەرى وزەگىن قولدانعان. جوباعا ءۇش جىلداي ۋاقىت جۇمساپتى. ايتۋلارىنشا، وسىمدىك قالدىقتارىنان باعالى مولەكۋلا الىنادى. كەيىن ارنايى قوندىرعى ارقىلى حيميالىق رەاكسيا ءتۇزىلىپ، ءونىم شىعارىلادى.

 نۇرشات نۋراجي، NU پروفەسسورى:

 - ۇزدىكسىز رەجيمدەگى رەاكتور ارقىلى وسىنى جاساپ شىقتىق. بۇنى جارتى ساعاتتا تەحنولوگيا ارقىلى جاساپ شىعارۋعا بولادى. مىسالى، قازىرگى ءداستۇرلى ءدارى زاۋىتتارىندا ءبارى ءبىر-بىرىمەن جالعاسپاعان. ءبىر ءدارىنى جاساۋعا ءبىر اپتا، ال ءبىر رەاكسياعا ءبىر اي كەتۋى مۇمكىن. ال بىزدىكى ونداي ەمەس.

«الەمدە قان قىسىمى اۋرۋلارى ءجيى كەزدەسەدى ءارى «جاسارىپ» بارادى. ال ءدارى وندىرىسىنە قولدانىلاتىن مۇناي ونىمدەرى - سارقىلاتىن رەسۋرس. سوندىقتان جاڭا جوبانىڭ حالىقارالىق مەديتسيناداعى ماڭىزى زور بولماق»، - دەيدى عالىمدار. زەرتتەۋشىلەر توبىندا قازاقستاندىق جانە شەتەلدىك ستۋدەنتتەر دە ەڭبەك ەتىپ ءجۇر.

 ماقپال راحات قىزى، ستۋدەنت:

 - Phd ستۋدەنتى بولعاندىقتان، 1- كۋرستان باستاپ وسى پروەكتىنىڭ ىشىندە وسى جۇمىستاردى اتقارىپ ءجۇرمىز. قازاقستان بويىنشا بۇل جۇمىستاردىڭ انالوگتارى جوق. ءبىز عانا اعىندى رەاكتوردى پايدالانۋ ارقىلى وسىندا دارىلىك زاتتاردى بيوماسسادان الىپ جاتىرمىز.

 گارري كۆاكۋ مەگبەنۋ، ستۋدەنت /گانا/:

- اۋىلشارۋاشىلىق قالدىقتارىنان الىنعان ەرىتىندىنى وسى جەردەگى ىدىسقا قۇيامىز. سودان كەيىن تەمپەراتۋراسىن رەتتەپ الامىز. رەاكسيا ءدال وسى نەگىزگى رەاكتوردىڭ ىشىندە جۇرەدى. بەلگىلى ءبىر ۋاقىت وتكەننەن كەيىن بىزگە قاجەتتى ءونىم الىنادى. بۇل جاسىل حيميانىڭ پرينتسيپتەرىنە نەگىزدەلگەن. ءارى ۋاقىت پەن قاراجاتتى ۇنەمدەيدى.

 جاڭا دارىلىك زاتتاردى كلينيكالىق سىناقتان وتكىزۋدىڭ قاجەتى جوق. ويتكەنى پرەپاراتتىڭ باسقا ەكستراكتتان جاسالعان تۇرلەرى مەديتسيناعا بەلگىلى. نەگىزگى قۇرامى كۇرىش قاۋىزى مەن جۇگەرى وزەگىنەن الىنعانىن دالەلدەسە جەتكىلىكتى. قازىر عالىمدار ءونىمدى پاتەنتتەۋگە كۇش سالىپ جاتىر.

 24.kz