عالىمدار العاش رەت ەلدىڭ جەر استى سۋ قورلارىنا سيفرلاندىرۋ جاسادى

الماتى. KAZINFORM - الماتى قالاسىندا عالىمدار قازاقستان تاريحىندا العاش رەت گيدروگەولوگيالىق كارتالاردىڭ اتلاسىمەن - ەلىمىزدىڭ جەر استى سۋلارى تۋرالى نەگىزگى دەرەكتەردى بىرىكتىرەتىن سيفرلىق گەواقپاراتتىق جۇيەمەن تانىستىردى.

بۇل ساندىق پلاتفورما سۋ رەسۋرستارىن ءتيىمدى باسقارۋعا، اسىرەسە قۇرعاقشىلىق جاعدايىندا تۇشى سۋدىڭ تاپشىلىعىن شەشۋ جونىندە ءتيىستى شەشىمدەر قابىلداۋعا كومەكتەسەدى.

قازاقستاننىڭ كوپتەگەن ايماقتارىن تۇراقتى تۇردە اۋىز سۋمەن قامتاماسىز ەتۋ ماسەلەسى قازىر وتە وزەكتى بولىپ وتىر: وزەندەر مەن كولدەردەن تۇشى سۋ الۋ مۇمكىندىگى شەكتەۋلى. ال جاڭا اتلاس جەر استى سۋ قورلارىن، ونىڭ ىشىندە گەوتەرمالدى جانە مينەرالدى سۋلاردى دالىرەك باعالاپ، پايدالانۋعا مۇمكىندىك بەرەدى. جۇيەنى سونداي-اق ەكولوگيالىق مونيتورينگ قۇرالى رەتىندە دە قولدانۋعا بولادى - سيفرلىق كارتالار جەر استى سۋلارىنىڭ ساپاسىن ناقتى ۋاقىت رەجيمىندە باقىلاپ، گەولوگيالىق ورتانىڭ لاستانۋىنىڭ الدىن الۋعا سەپتىگىن تيگىزەدى. بۇل سۋدىڭ تاپشىلىعىنا بايلانىستى دامۋى تۇرالاپ قالعان ايماقتار ءۇشىن جاڭا مۇمكىندىكتەر اشادى.

زەرتتەۋ جۇمىستارىن ۋ. م. احمەدسافين اتىنداعى گيدروگەولوگيا جانە گەوەكولوگيا ينستيتۋتىنىڭ عالىمدارى اكادەميك، گەولوگيا- مينەرالوگيا عىلىمدارىنىڭ دوكتورى، پروفەسسور ماليس ابسامەتوۆتىڭ باسشىلىعىمەن جۇرگىزدى.

- جەر استى سۋلارى جونىندەگى دەرەكتەردى جاڭارتۋ مەن جۇيەلەۋ سۋ قاۋىپسىزدىگىن ارتتىرىپ، قازاقستاندى كليماتتىق وزگەرىستەرگە توتەپ بەرۋىن تۇراقتاندىرادى. اتلاس سۋ رەسۋرستارىنىڭ تۇتاس كارتاسىن العاش رەت ۇسىنىپ وتىر، بۇل ۇزاق مەرزىمدى جوسپارلار مەن ۇلتتىق مۇددەلەردى قورعاۋ ءۇشىن وتە ماڭىزدى، - دەپ اتاپ ءوتتى ماليس ابسامەتوۆ.

«قازاقستان رەسپۋبليكاسىندا سۋ قاۋىپسىزدىگى ماسەلەسى: زاماناۋي سىن- قاتەرلەر مەن عىلىمي شەشىمدەر» اتتى حالىقارالىق كونفەرەنسياعا قاتىسۋشىلار اتاپ وتكەندەي، جينالعان دەرەكتەر سۋ ساياساتىن ازىرلەۋدىڭ، عىلىمي زەرتتەۋلەر مەن ماماندار دايارلاۋ ءىسىنىڭ نەگىزى بولماق. كليماتتىڭ وزگەرۋى جاعدايىندا بۇل جۇيە سۋ تاپشىلىعىن الدىن الا بولجاۋعا، ءسويتىپ تۇرعىندارعا دا، ەكونوميكاعا ونىڭ كەرى اسەرىن ازايتۋعا كومەكتەسەدى. سونىمەن قاتار اتلاس سۋ رەسۋرستارىن ايماقتار اراسىندا ءادىل تۇردە بولۋگە وبەكتيۆتى بازا بولا وتىرىپ، سۋ جاعدايى تۋرالى ءدال مالىمەتتەردى قاجەت ەتەتىن ءىرى ينفراقۇرىلىمدىق جانە وندىرىستىك جوبالاردى جۇزەگە اسىرۋ ءۇشىن اسا پايدالى بولادى.

- قازاقستان عالىمدارى وتە اۋقىمدى جانە ماڭىزدى جۇمىستار اتقاردى. ولار ازىرلەگەن قۇرال ەلىمىزدىڭ سۋ قاۋىپسىزدىگىنىڭ نەگىزىنە اينالادى. بۇل ەڭبەك جوعارى باعاعا لايىق، ءارى سۋدى تۇراقتى تۇردە پايدالانۋ سالاسى بويىنشا زەرتتەۋلەرگە جاڭا كەڭىستىكتەر اشادى، - دەپ اتاپ ءوتتى گلازگو ۋنيۆەرسيتەتىنىڭ ( ۇلى بريتانيا) پروفەسسورى موحاممەد حاليد.

اتلاستى ساتبايەۆ ۋنيۆەرسيتەتىنىڭ ۋ. م. احمەدسافين اتىنداعى گيدروگەولوگيا جانە گەوەكولوگيا ينستيتۋتى ق ر ونەركاسىپ جانە قۇرىلىس مينيسترلىگى گەولوگيا كوميتەتىنىڭ تاپسىرىسى بويىنشا عىلىم جانە جوعارى ءبىلىم مينيسترلىگى عىلىم كوميتەتىنىڭ قولداۋىمەن جاساپ شىعاردى.

اۆتور

نازىم بولەسوۆا