عالىمدار اۋاداعى ميكروپلاستيك مولشەرىنىڭ 100 ەسە كوپ ەكەنىن انىقتادى
استانا. KAZINFORM - ادامدار كۇنىنە 68 مىڭعا دەيىن ميكروپلاستيك بولشەگىن جۇتۋى مۇمكىن، بۇل بۇرىن بولجانعان مولشەردەن شامامەن 100 ەسە كوپ، دەپ حابارلايدى انادولى.
The Hill باسىلىمىنىڭ دەرەگىنشە مۇنداي قورىتىندىعا تۋلۋزا ۋنيۆەرسيتەتى مەن فرانسيانىڭ ۇلتتىق عىلىمي-زەرتتەۋ ورتالىعىنىڭ (CNRS) عالىمدارى جۇرگىزگەن زەرتتەۋ ناتيجەسىندە كەلگەن.
زەرتتەۋ ناتيجەلەرى ادامدار كۇندەلىكتى ومىردە ويلاعاننان الدەقايدا كوپ ميكروپلاستيكتى جۇتاتىنىن كورسەتەدى.
زەرتتەۋ بارىسىندا عالىمدار ءارتۇرلى تۇرعىن ۇيلەر مەن اۆتوكولىك سالوندارىنان اۋا ۇلگىلەرىن جيناپ، ميكروپلاستيك بولشەكتەردىڭ كونسەنتراتسياسىن رامان سپەكتروسكوپياسى ءادىسى ارقىلى ولشەگەن.
ناتيجەسىندە تۇرعىن ۇيلەردىڭ اۋاسىندا ورتا ەسەپپەن ءار تەكشە مەترگە 528 ميكروپلاستيك بولشەگى انىقتالعان، ال اۆتوكولىك سالونىندا بۇل كورسەتكىش شامامەن ءتورت ەسە جوعارى بولىپ شىققان - 2238 بولشەك/م³.
عالىمداردىڭ باعالاۋىنشا، ادام كۇن سايىن ديامەترى 1-دەن 10 ميكرومەترگە دەيىنگى شامامەن 68 مىڭ ميكروپلاستيك بولشەگىن تىنىس الۋ ارقىلى جۇتۋى مۇمكىن.
زەرتتەۋشىلەر ەرەكشە الاڭداۋشىلىق ءبىلدىرىپ وتىر، سەبەبى بۇل بولشەكتەر كوزگە كورىنبەيتىندەي ۇساق جانە وكپەنىڭ تەرەڭ قاباتىنا ەش كەدەرگىسىز ەنە الادى.
عالىمدار ميكروپلاستيكتەر ۋلى زاتتار ءبولۋى مۇمكىن ەكەنىن، ال بۇل زاتتاردىڭ قان اينالىمىنا ءتۇسىپ، ءتۇرلى اۋرۋلاردىڭ دامۋىن تۋدىرۋى ىقتيمال ەكەنىن ەسكەرتەدى.
زەرتتەۋ اۆتورلارىنىڭ ايتۋىنشا، اۆتوكولىك سالونى شەكتەۋلى جەلدەتىلەتىندىكتەن، مۇندا ميكروپلاستيكتىڭ شوعىرلانۋى اسىرەسە جوعارى. بۇل ۇزاق ساپارلار كەزىندە اعزاعا ميكروپلاستيكتىڭ اسەر ەتۋ دەڭگەيى ايتارلىقتاي ارتاتىنىن بىلدىرەدى.
زەرتتەۋ ناتيجەلەرى PLOS One جۋرنالىندا جاريالاندى.
ايتا كەتەلىك اتلانت مۇحيتىندا 27 ميلليون توننا نانوپلاستيك بارىن ايتىپ، عالىمدار دابىل قاعىپ جاتقانى تۋرالى جازعان ەدىك.
اۆتور
نازىم بولەسوۆا
