عالىم: بازارداعى ساپاسىز ەت ەلدەگى ونكولوگيالىق احۋالدى ۋشىقتىرىپ بارادى
استانا. KAZINFORM - ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عىلىم جانە يننوۆاتسيا جونىندەگى پرورەكتورى ەرجان سىرعاليەۆ ماجىلىستە ءوتىپ جاتقان تاقىرىپتىق وتىرىستا ەل بازارلارىندا ساتىلىپ جاتقان ەتتىڭ ساپاسىنا الاڭدايتىنىن ايتتى.
- ءسوزىمنىڭ اياعىندا مىنانى ايتقىم كەلەدى. بىرنەشە كۇن بۇرىن دۇنيەجۇزىلىك تاماق قاۋىپسىزدىگىنىڭ كۇنى بولدى. مەن سىزدەردىڭ نازارلارىڭىزدى تەك مىنا ماسەلەگە اۋدارعىم كەلەدى. ءداستۇرلى اۋىل شارۋاشىلىعى، ونىڭ ىشىندە گورموندار مەن انتيبيوتيكتەرى مول مال شارۋاشىلىعى قازاقستانداعى ونكولوگيالىق اۋرۋلاردىڭ ستاتيستيكاسى وتە جوعارى بولۋىنا الىپ كەلدى. وكىنىشكە قاراي، قازىر بۇل ماسەلەنى كوتەرىپ جۇرگەن جوقپىز، - دەدى عالىم.
پرورەكتوردىڭ ايتۋىنشا، عالىمدار ەلدەگى بازارلاردا ساتىلىپ جاتقان ەتتىڭ قۇرامىندا گورموندار مەن انتيبيوتيكتەر قانشا ەكەنىنە تالداۋ جۇرگىزىپتى.
- ءبىز مەگاماقساتتىق قارجىلاندىرۋ اياسىندا جۇرگىزگەن زەرتتەۋلەر كەزىندە قازاقستانداعى بازارلاردىڭ بارىنە ەت قۇرامىنداعى گورموندار مەن انتيبيوتيكتەر بويىنشا تالداۋ جۇرگىزدىك. ءتىپتى ءوزىمىزدىڭ ءداستۇرلى تۇردە ورگانيكالىق دەپ اتاپ جۇرگەن جىلقى ەتىنىڭ 80 پايىزىندا گورموندار مەن انتيبيوتيكتەر بار. سوندىقتان وسى احۋال ورگانيكالىق نەگىزدە جۇمىس ىستەيتىن شارۋاشىلىقتاردى دامىتۋعا مۇددەلىلىكتى ارتتىرادى، - دەدى ەرجان سىرعاليەۆ.
بۇعان دەيىن ەل وڭىرلەرىندە تارتىلعان ەت باعاسى قانشا ەكەنىن جازعان ەدىك.
اۆتور
ەسىمجان ناقتىباي
