عالىم: ادامدار 120 جىل ءومىر سۇرەتىن بولادى

 استانا. قازاقپارات - رەسەي عىلىم اكادەمياسىنىڭ اكادەميگى ۆالەري چەرەشنەۆ جاقىن بولاشاقتا ادامداردىڭ ءومىر ءسۇرۋ جاسى ۇزارادى، دەگەن تۇجىرىمعا كەلدى.

 ونىڭ ايتۋىنشا، ەندى ادامدار ورتا ەسەپپەن 90 جاسقا دەيىن ءومىر سۇرەتىن بولادى. ال 2050- جىلعا قاراي ول ءتىپتى 110-120 جاسقا دەيىن جەتۋى مۇمكىن. مامان بۇل تۋرالى گەرونتولوگيا (ادامنىڭ جانە جانۋارلاردىڭ اعزاسىنىڭ قارتايۋ زاڭدىلىقتارىن زەرتتەيتىن عىلىم) ماسەلەلەرىنە ارنالعان دوڭگەلەك ۇستەل كەزىندە ءمالىم ەتكەن.

سونداي-اق چەرەشنەۆ اڭگىمەنىڭ جاپونيا، ا ق ش، كانادا سىندى دامىعان ەلدەر مەن ەۋروپالىق مەملەكەتتەرگە قاتىستى بولىپ وتىرعانىن ناقتىلادى. الايدا، بۇل بولجامنىڭ ورىندالۋى ءۇشىن دە دەنساۋلىق ساقتاۋ سالاسىنىڭ قىزمەتى جەتىلدىرىلىپ، ادامداردىڭ بيولوگيالىق ەرەكشەلىكتەرى بۇرىنعى قالپىندا دامۋى ءتيىس دەگەن ءتارىزدى شارتتار ساقتالۋى كەرەك ەكەن.

سونىمەن قاتار عالىم دامىعان ەلدەردە ادامداردىڭ قازىر 80-82 جاسقا دەيىن ءومىر سۇرەتىنىن جەتكىزدى. ەڭ ۇزاق عۇمىر سۇرەتىندەر بۇگىندە اندوررا ەلىن مەكەندەيدى ەكەن - ولاردىڭ ءومىر ءسۇرۋ ۇزاقتىعى 84 جاستى قۇرايدى. سونداي-اق بۇل كورسەتكىش بويىنشا كوش باسىندا جاپونيا (83،5 جاس)، دانيا، شۆەسيا، فينليانديا مەن نورۆەگيا (80 جاس) تۇر.