عالام عاجاپتارى: ءبىر تۇندىك دانىشپان

الەمگە ايگىلى «مارسەلەزانىڭ» عاجايىپ مۋزىكاسىن فرانسۋز ارمياسىنىڭ قاتارداعى كاپيتانى رۋجە دە ليل ءبىر ءتۇن ىشىندە جازىپ بىتىرگەن.

Жасанды интеллект
Фото: Midjourney

ءبىر قىزىعى، ول قالعان ومىرىندە بۇدان وزگە ەشتەڭە جازىپ جارىتپاپتى. ەسەسىنە مارسەل توپىراعىندا تۋعان مارعاسقا مۋزىكانتتىڭ بۇل تۋىندىسى 1795 - جىلى فرانسيانىڭ ۇلتتىق گيمنى رەتىندە بەكىتىلگەن. سودان باستاپ جىگەرلى اۋەن بۇكىل الەمدە بوستاندىق پەن تەڭدىكتىڭ سيمۆولىنا اينالدى. وسىلايشا، رۋجە دە ليل ءبىر تۇندە جازىلعان ءبىر عانا تۋىندىسىمەن تاريحتا قالدى.

اۆتورعا باعىنبايتىن كەيىپكەرلەر

ادەبيەتتە مىنەزى ابدەن دارالانعان قاھارماندار تەك ءوز قالاۋىمەن عانا ارەكەت جاسايدى. كەي كەزدەرى ءتىپتى، اۆتوردىڭ ىقتيارىن نازارعا المايدى.

ماسەلەن، اننا كارەنينا ليەۆ تولستويدىڭ اۋەلگى جوسپارى بويىنشا «ادام تۇڭىلگەندەي بۇزىق ايەل» بولۋعا ءتيىس ەدى. شىن تۇلعاسىن، مىنەزىن دارالاي كەلگەندە تارتىمدى بەينە بولىپ شىققان. ال «ەۆگەني ونەگيندەگى» تاتيانا پۋشكيننىڭ ءوزىن تاڭعالدىرىپ، «توسىننان» كۇيەۋگە شىقتى. تۋرگەنيەۆتىڭ بازاروۆى بولسا، اۆتوردى امالسىز «باعىندىرىپ»، وعان ءوز اتىنان كۇندەلىك جازدىرىپ وتىرعان. جازۋشىلار قاۋىمى پەرسوناجداردىڭ مۇنداي «بۇلىگىنەن» كىتاپتىڭ ەڭ قىزىق بەتتەرى تۋاتىنىن جاسىرمايدى.

مىنسىزدىككە ۇمتىلىس

چەحوۆ «جازۋ ونەرى - سىزىپ تاستاۋ ونەرى» دەپ بەكەر ايتپاسا كەرەك. ويتكەنى وڭدەۋ، جوندەۋ، تۇزەۋ، كۇزەۋ - شىعارمانى شىڭداي تۇسەدى.

ماسەلەن، «شەگىرەن بىلعارىنى» بالزاك باستان- اياق قايتا جازعانداي، توعىز رەت ادام تانىعىسىز وزگەرىسكە ۇشىراتقان. ال گوگول «ريەۆيزورىن» بەس رەت، فلوبەر «يرودياداسىن» ون رەت، گوركيي «اناسىن» التى رەت تۇبەگەيلى وزگەرتىپ، جەتىلدىرە تۇسكەن.

بەكزات قۇلشار

egemen.kz

 

سوڭعى جاڭالىقتار