ءابىش كەكىلباي ۇلىنىڭ جەكە مۇراسى پرەزيدەنت ارحيۆىنە تاپسىرىلدى
استانا. KAZINFORM - قازاقستاننىڭ مەملەكەت جانە قوعام قايراتكەرى، كورنەكتى جازۋشى ءارى ويشىل ءابىش كەكىلباي ۇلىنىڭ جەكە ارحيۆى ق ر پرەزيدەنتىنىڭ ارحيۆىنە رەسمي تۇردە تاپسىرىلدى.
پرەزيدەنت ارحيۆى مەن ءابىش كەكىلباي ۇلىنىڭ وتباسى اراسىندا ارحيۆتىك ماتەريالداردى مەملەكەتتىك ساقتاۋعا بەرۋ جونىندەگى كەلىسىمشارتقا قول قويىلدى. اتاپ ايتقاندا، بۇل كەلىسىمدى ارحيۆ ديرەكتورى ءاليا مۇستافينا مەن جازۋشىنىڭ نەمەرەسى ءابىل كەكىلبايەۆ بەكىتتى.
ءابىل كەكىلبايەۆ اتاسىنىڭ مۇراسىن مەملەكەتتىك قورعا وتكىزۋ تۋرالى شەشىمدى قابىلداۋ وڭاي بولماعانىن ايتادى.
- ءبىز وسى قولجازبالار مەن پاپكالاردىڭ اراسىندا وستىك، ولار بىزبەن بىرگە ءبىر ۇيدەن ەكىنشى ۇيگە كوشىپ ءجۇردى. اتامىز قايتىس بولعان سوڭ ارحيۆ تاعدىرى جايلى سۇراق تۋىندادى، - دەيدى ول.
ۋاقىت وتە كەلە قۇجاتتار مەن قولجازبالار جازۋلى قاعازدار سارعايىپ، سياسى وشە باستاعان. ال بۇل ماتەريالداردىڭ تاريحي جانە مادەني مۇرا رەتىندەگى قۇندىلىعى تۇسىنىكتى. سوندىقتان ونى دۇرىس جاعدايدا ساقتاۋ جانە عىلىمي اينالىمعا ەنگىزۋ تۋرالى شەشىم قابىلدانعان.
- ارحيۆپەن كەلىسسوزدى ەكى جىل بۇرىن باستادىق. جاڭا عيمارات اشىلاتىنى بەلگىلى بولعان سوڭ، ناقتى قادامدار جاسالىپ، قولجازبالار تۇگەندەلىپ، جيناقتالدى. داپتەرلەر، ءىسساپار ەستەلىكتەرى مەن جەكە قۇجاتتار دا تاپسىرىلدى. ەڭ باستىسى، بۇل ماتەريالداردى بولاشاق ۇرپاق پايدالانا الادى، - دەيدى جازۋشىنىڭ نەمەرەسى.
ارحيۆ ديرەكتورىنىڭ ايتۋىنشا، ءابىش كەكىلباي ۇلىنىڭ جەكە ارحيۆى - جاڭا عيماراتتا قابىلدانعان العاشقى قور.
- بۇگىن پرەزيدەنت ارحيۆى ءۇشىن ايتۋلى كۇن، تاريحي ءسات. ءابىش اعا ادەبيەت پەن ەل تاۋەلسىزدىگى تاريحىندا ەرەكشە ورنى بار تۇلعا. ونىڭ ارحيۆىن ءبىزدىڭ قوردا ساقتاۋ - زور مارتەبە، - دەدى ءاليا مۋستافينا.
ءابىش كەكىلباي ۇلىنىڭ 22 مىڭنان استام پاراقتان تۇراتىن 308 جەكە مۇراسى مۇقيات جيناقتالعان. ولاردىڭ اراسىندا جازۋشىنىڭ قولجازبالارى، حاتتارى، پارلامەنت پەن ۇكىمەتتەگى باياندامالارى، رەسمي قۇجاتتارى دا بار. اسىرەسە، كوركەم شىعارمالارى مەن رەسمي ماتىندەردىڭ قولمەن جازىلعان ءتۇپنۇسقالارى ەرەكشە قۇندى سانالادى.
- ابەكەڭنىڭ دانالىق ورنى ايرىقشا ەدى، ىشىمىزدەگى سىردى دا ايتۋشى ەدىك. بولاشاق ۇرپاق ونىڭ ەڭبەگىن زەرتتەپ، وقيتىن بولسا، ۇلتىمىزدىڭ جاقسى بولىپ وسەتىنىنە سەنەمىن. وكىنىشكە قاراي، كەزىندە ارحيۆتىڭ دۇرىس ساقتالماۋىنان قانشاما تاريحىمىز ءوشىپ قالدى. تاۋەلدىلىك زامانىندا رەپرەسسياعا ۇشىراعان تالاي ادامنىڭ ۇرپاعى تەگىن وزگەرتۋگە ءماجبۇر بولدى. بۇگىنگى ارحيۆ قىزمەتىنە العىس ايتامىن، - دەيدى كورنەكتى مەملەكەت جانە قوعام قايراتكەرى، ساياسي عىلىمدار دوكتورى قۋانىش سۇلتانوۆ.
الداعى ۋاقىتتا قۇجاتتار ەلەكتروندى فورماتقا كوشىرىلىپ، جازۋشىنىڭ رۋحاني مۇراسى سيفرلىق كەڭىستىكتە ساقتالماق.
ايتا كەتسەك، ەلىمىزدىڭ ارحيۆ قورلارىنىڭ %25- ى ەلەكتروندى نۇسقاعا كوشىرىلگەن. بىرەر جىلدا كەز كەلگەن قازاقستاندىق مۇراعاتتا ساقتالعان اقپاراتتاردى ۇيىندە وتىرىپ-اق كورە الادى.
قازىرگى تاڭدا پرەزيدەنت ارحيۆىندە 1,5 ميلليوننان استام قۇجات ساقتاۋلى. ولاردىڭ قاتارىندا مەملەكەت جانە قوعام قايراتكەرلەرىنىڭ، عىلىم مەن مادەنيەت وكىلدەرىنىڭ جەكە قورلارى دا بار. ءاربىر قۇجاتقا بىرەگەي ءنومىر مەن ارحيۆتىك سيپاتتاما بەرىلىپ، جۇيەلى تۇردە رەتتەلىپ، تاريحي كونتەكستە ساقتالادى.
ەسكە سالايىق، قازاق ادەبيەتىنىڭ قارا نارى ءابىش كەكىلباي ۇلى ءتىرى بولعاندا بىلتىر 85 جاسقا تولار ەدى.
اۆتور
گۇلنۇر عازيز قىزى
