بيزنەستى قولداۋدىڭ جاڭا باعدارلاماسى ازىرلەندى

state support program
Photo credit: pixabay.com

استانا. KAZINFORM - «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارى بىرىكتىرىلەدى. بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ايتىپ بەردى.

«ءبىزدىڭ مينيسترلىك «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارىن بىرىكتىرۋدى كوزدەيتىن مەملەكەتتىك قولداۋ شارالارىن ۇسىنۋ جونىندەگى باعدارلامانى ازىرلەدى. باعدارلامادا باسەكەگە قابىلەتتى، يمپورتتى الماستىراتىن جانە ەكسپورتقا باعدارلانعان سالالاردى دامىتۋعا جانە جاڭا جۇمىس ورىندارىن قۇرۋعا باسا نازار اۋدارىلدى»، - دەدى الىبەك قۋانتىروۆ ۇكىمەت وتىرىسىنداعى بايانداماسىندا.

ءمينيستردىڭ ايتۋىنشا، جاڭا باعدارلاما 6 باعىتتان تۇرادى: «ميكروكاسىپكەرلىك»، «شاعىن جانە ورتا كاسىپكەرلىك»، «وڭدەۋ ونەركاسىبى مەن كورسەتىلەتىن قىزمەتتەردەگى شاعىن، ورتا جانە ءىرى كاسىپكەرلىك»، «مونو جانە شاعىن قالالارداعى، اۋىلدىق ەلدى مەكەندەردەگى كاسىپكەرلىك»، «الەۋمەتتىك كاسىپكەرلىك»، «قور بيرجاسى».

«وسى باعىتتار شەڭبەرىندە جاڭا جوبالاردى سۋبسيديالاۋ ءۇشىن بيۋدجەت ءبولۋ نەگىزىنەن وڭدەۋ ونەركاسىبى سالاسىنداعى كاسىپورىندار ءۇشىن جۇزەگە اسىرىلادى. باعدارلاما سۋبسيديالاۋدان كەپىلدىك بەرۋ قۇرالدارىنا جانە قارجىلىق ەمەس قولداۋدىڭ وزگە شارالارىنا بىرتىندەپ كوشۋدى كوزدەيدى»، - دەدى سپيكەر.

شاعىن جانە ورتا كاسىپكەرلىك جوبالارىن سۋبسيديالاۋ جونىندەگى جاڭا تاسىلدەر نارىقتىق جاعدايلارعا كەزەڭ- كەزەڭىمەن كوشۋ ارقىلى سۋبسيديالاۋدىڭ سارالانعان ءادىسىن كوزدەيدى. ماسەلەن، العاشقى 3 جىلدا سۋبسيديالاۋدى ەسكەرە وتىرىپ، تۇپكىلىكتى قارىز الۋشى %8، ءتورتىنشى جىلى - %9، بەسىنشى جىلى - %10 مولشەرلەمە بويىنشا قارجىلاندىرىلادى.

«بۇل ءتاسىل بيۋدجەتكە تۇسەتىن جۇكتەمەنى ازايتۋعا جانە بيزنەستىڭ نارىقتىق قارجىلاندىرۋ تەتىكتەرىنە بىرتىندەپ كوشۋىن جۇزەگە اسىرۋعا مۇمكىندىك بەرەدى»، - دەپ ءتۇسىندىردى ءا. قۋانتىروۆ.

ايتا كەتەيىك، قازاقستاندا شاعىن جانە ورتا بيزنەستىڭ ەكونوميكاعا قاتىسۋى % 36,5- عا دەيىن وسكەن.

اۆتور

ايجان سەرىكجان قىزى

سوڭعى جاڭالىقتار