بيىلعى جازدا اۋا رايى قالاي بولادى

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەت وتىرىسىندا جاز ايلارىنا ارنالعان اۋا رايى بولجامىن ايتتى.

− ماۋسىم ايىندا قازاقستاننىڭ باسىم بولىگىندە ايلىق ورتاشا اۋا تەمپەراتۋراسى قالىپتى بولادى، ياعني ەلدىڭ سولتۇستىگى مەن ورتالىعىندا 17-20 گرادۋس، ال باتىسىندا - 23-25 گرادۋس بولادى دەپ كۇتىلەدى. وڭتۇستىك-باتىستا جانە وڭتۇستىكتە ادەتتەگىدەن ىستىعىراق بولادى، جازىق بولىكتە ورتاشا تەمپەراتۋرا 24-28 گرادۋس، ال ماكسيمالدى تەمپەراتۋرا - 45 گرادۋسقا دەيىن جەتەدى. ەلدىڭ باتىسىندا جانە سولتۇستىك- شىعىسىندا، شىعىسىندا جانە وڭتۇستىگىندە جاۋىن- شاشىن نورما شەگىندە، ال قالعان اۋماقتا كوبىنەسە نورمادان از بولادى، − دەدى ەكولوگيا ءمينيسترى.

جاۋىن-شاشىن نەگىزىنەن كوپجىلدىق نورمالار شەگىندە بولجانادى، سولتۇستىك- باتىستا، سولتۇستىكتە، وڭتۇستىكتە جانە وڭتۇستىك-شىعىستا جاۋىن- شاشىن نورمادان جوعارى بولادى دەپ بولجانعان.

− تامىز، قىركۇيەك ايلارى ەگىننىڭ ءپىسۋى مەن ونى جيناۋ جۇمىستارىنا قولايلى بولادى دەپ كۇتىلۋدە. مول جانە ۇزاققا سوزىلاتىن جاۋىن- شاشىن كۇتىلمەيدى، ەلدىڭ باسىم بولىگىندە ايلىق ورتاشا اۋا تەمپەراتۋراسى كليماتتىق نورمادان 1 گرادۋسقا جوعارى بولادى، − دەدى ەرلان نىسانبايەۆ.

ايتا كەتەيىك، ەنەرگەتيكا مينيسترلىگى بيىلعى ەگىس ناۋقانىنا 401 مىڭ توننا ارزانداتىلعان ديزەل وتىنىن ءبولدى. شارۋالار ءۇشىن تۇپكىلىكتى باعا ليترىنە 254 تەڭگەگە بەرىلەدى، بۇل نارىقتان %20 عا ارزان.

سونداي-اق، ەكولوگيا جانە تابيعي رەسۋرستار ءمينيسترى ەرلان نىسانبايەۆ اۋا رايى بولجامدارىن بايانداپ، قۇرعاقشىلىق بولۋى مۇمكىن وڭىرلەردى اتادى جانە ەگىن ەگۋ جۇمىستارىن ەرتەرەك باستاۋدى ۇسىندى.