بيىل وقۋ جىلىندا قانداي ماماندىقتار سۇرانىسقا يە بولادى؟

استانا. KAZINFORM - ەلىمىزدىڭ تەحنيكالىق جانە كاسىپتىك ءبىلىم بەرۋ ۇيىمدارىندا قۇجاتتاردى قابىلداۋ باستالدى. جاڭا وقۋ جىلىندا مەملەكەتتىك ءبىلىم بەرۋ تاپسىرىسى بويىنشا 145 مىڭ ابيتۋريەنت قابىلدانادى دەپ جوسپارلانىپ وتىر. 

 بۇل وتكەن جىلمەن سالىستىرعاندا، 10 مىڭ ادامعا كوپ، دەپ حابارلادى ق ر وقۋ-اعارتۋ مينيسترلىگى.

مەملەكەتتىك ءبىلىم بەرۋ تاپسىرىسى تەحنيكالىق، ياعني گەولوگيا، ماشينا قۇراستىرۋ، ەنەرگەتيكا، ІТ، مەتاللۋرگيا، كولىك جانە ت. ب. ماماندىقتار بويىنشا كوبەيتىلدى. سونىمەن قاتار، بيىل ءۇشىنشى جىل قاتارىنان كوللەدج ابيتۋريەنتتەردى جۇمىسقا ورنالاستىرۋ مىندەتتەمەسىمەن كاسىپورىنداردىڭ وتىنىمدەرى بويىنشا قابىلداپ جاتىر. بۇل جىل سايىن ەڭبەك نارىعىنىڭ سۇرانىسىنا ساي ماماندىقتارعا 10 مىڭ ستۋدەنتتى قابىلداۋعا مۇمكىندىك بەرەدى.

سونداي- اق وسى جىلدان باستاپ كوللەدجگە كۆوتا ءتىزىمى كەڭەيتىلىپ، ارتتىرىلادى:

I نەمەسە II توپتاعى مۇگەدەكتىگى بار ادامدار، بالا كەزىنەن مۇگەدەكتىگى بار ادامدار، مۇگەدەكتىگى بار بالالار اراسىنان شىققان ازاماتتار ءۇشىن؛

بالا كەزىنەن مۇگەدەكتىگى بار بالالاردى، I نەمەسە II توپتاعى مۇگەدەكتىگى بار ادامداردى تاربيەلەپ وتىرعان وتباسىلارداعى بالالار ءۇشىن؛

اسكەرگە شاقىرۋ بويىنشا مەرزىمدى اسكەري قىزمەتتىڭ بەلگىلەنگەن مەرزىمىن وتكەرگەن قازاقستان رەسپۋبليكاسىنىڭ ازاماتتارى ءۇشىن.

ەستەرىڭىزگە سالا كەتەيىك، ابيتۋريەنتتەر ءوتىنىشتى كوللەدجگە قاعاز تۇرىندە جانە egov.kz پورتالى ارقىلى ەلەكتروندى تۇردە ەكى جولمەن بەرە الادى.

كوللەدجگە ءتۇسۋ ءۇشىن 9-سىنىپ تۇلەكتەرى 25 -ماۋسىم مەن 18-تامىز، 11-سىنىپ تۇلەكتەرى 25-ماۋسىم مەن 20-تامىز ارالىعىندا قۇجات تاپسىرا الادى.

اۆتور

ەلميرا ورالبايەۆا