بيىل توعىز ايدا جالپى ىشكى ءونىم قانشا پايىزعا ارتتى

استانا. KAZINFORM - ينفلياتسيا بىرتىندەپ تومەندەپ كەلەدى، ال ەلىمىزگە كەلسەك، قازىر ەكونوميكالىق جاعداي - تۇراقتى، ديناميكا - وڭ. بۇل تۋرالى ۇلتتىق بانكتىڭ ءتوراعاسى تيمۋر سۇلەيمەنوۆ ءمالىم ەتتى.

«بيىل جاھاندىق ەكونوميكانىڭ دامۋىنا گەوساياسي تۇراقسىزدىق ىقپال ەتىپ جاتىر. بۇل ءبىرقاتار اسكەري قاقتىعىستارعا، الەمدەگى ساۋدا-ساتتىق پەن ينۆەستيتسيالاردىڭ تومەندەۋىنە بايلانىستى. حالىقارالىق ۆاليۋتا قورىنىڭ جاڭارتىلعان بولجامى بويىنشا، الەمدىك ەكونوميكانىڭ ءوسۋى 2024 جانە 2025 -جىلدارى %3,2 بولادى. ورتالىق بانكتەر ءوزىنىڭ قاتاڭ مونەتارلىق ساياساتىن ساقتاعاندىقتان، جاھاندىق ينفلياتسيالىق پروتسەستەر باياۋ قالىپتاسىپ وتىر. دەگەنمەن، قازىر دامىعان ەلدەردە ينفلياتسيا ورتالىق بانكتەردىڭ نىسانالى كورسەتكىشىنە جاقىن. بۇل جەتەكشى ەلدەردەگى ورتالىق بانكتەردىڭ اقشا-كرەديت ساياساتىن بىرتىندەپ جەڭىلدەتۋگە جاعداي جاسايدى»، - دەدى تيمۋر سۇلەيمەنوۆ ءماجىلىستىڭ جالپى وتىرىسىندا.

ۇلتتىق بانك ءتوراعاسىنىڭ ايتۋىنشا، ينفلياتسيا بىرتىندەپ تومەندەپ كەلەدى.

«قازاقستاندى الساق، قازىرگى ەكونوميكالىق جاعداي - تۇراقتى، ديناميكا - وڭ. بيىل قاڭتار- قىركۇيەك ايلارىندا جالپى ىشكى ءونىم %4,0 كە ارتتى. ەكونوميكانىڭ بارلىق سەكتورىندا ءونىم شىعارۋدا ءوسىم بار. ەڭ جوعارى ءوسىم اۋىل شارۋاشىلىعىندا، قۇرىلىس پەن كولىك سالاسىندا بايقالىپ وتىر. ينفلياتسيا بىرتىندەپ تومەندەپ كەلەدى. قىركۇيەكتىڭ قورىتىندىسى بويىنشا ينفلياتسيا دەڭگەيى %8,3 بولدى. بۇل 2023 -جىلعى ەڭ جوعارى كورسەتكىشپەن سالىستىرعاندا 2,5 ەسە تومەن. الايدا، بۇل كورسەتكىش ۇلتتىق بانكتىڭ %5 تىك تارگەتىنەن ءالى دە الىس»، - دەيدى ول.

سونداي اق، ت. سۇلەيمەنوۆ ينفلياتسيانىڭ باياۋلاۋ ۇردىسىندەگى ماڭىزدى فاكتور - ازىق-تۇلىك ينفلياتسياسىنىڭ %5 بولعانىن ايتتى.