بيىل ستۋدەنتتەرگە 27 جاتاقحانا پايدالانۋعا بەرىلەدى
استانا. KAZINFORM - ۇكىمەتتە كوللەدج بەن جوعارى وقۋ ورىندارىنىڭ ستۋدەنتتەرىن جاتاقحانامەن قامتۋ ماسەلەسى قارالدى. ق ر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەسكە ورتالىق مەملەكەتتىك ورگانداردىڭ وكىلدەرى مەن وبلىس اكىمدەرىنىڭ ورىنباسارلارى قاتىستى.
عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆتىڭ سوزىنشە، بيىل 10576 ورىنعا شاقتالعان 27 جاتاقحانانى قولدانىسقا بەرۋ جوسپارلانعان. ولاردىڭ 19 ى جوعارى وقۋ ورىندارىنا، 8 ى كوللەدجدەردىڭ ستۋدەنتتەرىنە سالىنۋى ءتيىس ەدى.
«قازىردە 1540 ورىنعا ارنالعان 7 جاتاقحانادا ءتيىستى جۇمىستار تولىعىمەن اياقتالىپ، كەلەر وقۋ جىلىنا ستۋدەنتتەردى قابىلداۋعا ءازىر. قۇرىلىس نەمەسە رەكونسترۋكتسيا جۇمىستارىن جۇرگىزۋ بويىنشا وبلىستار مەن رەسپۋبليكالىق ماڭىزى بار قالالاردا جول كارتالارى دايىندالدى. جوسپارلانعان نىسانداردىڭ دەنى قىركۇيەككە دەيىن پايدالانۋعا بەرىلمەك»، - دەدى تالعات ەشەنقۇلوۆ.
جيىن بارىسىندا ءار نىسانداعى جۇمىس قارقىنى جەكەلەي قاراستىرىلدى. عىلىم جانە جوعارى ءبىلىم ۆيتسە-ءمينيسترى بۇگىندە قۇرىلىس، رەكونسترۋكتسيا قاراستىرىلعان عيماراتتاردىڭ باسىم كوپشىلىگىندە جۇمىس %75 دەڭگەيىنەن جوعارى ورىندالعانىن جەتكىزدى. ءۇش نىسانداعى ءتيىستى جۇمىستار %50 شاماسىندا اتقارىلعان. ولار الماتى قالاسى مەن اقمولا، قىزىلوردا وبلىستارىنا تيەسىلى. ايماق اكىمدەرىنىڭ ورىنباسارلارى بارلىق شارالار جوسپارعا ساي اياقتالادى دەپ سەندىردى. تامارا دۇيسەنوۆا ماسەلەنىڭ ماڭىزدىلىعىنا ەرەكشە توقتالىپ، ءتيىستى تاپسىرما بەردى.
«قۇرىلىس ماۋسىمىنىڭ ۋاقىتى شەكتەۋلى. سوندىقتان جاۋاپتى مينيسترلىكتەرمەن قاتار وبلىس اكىمدىكتەرى جۇمىستىڭ ۋاقتىلى ءارى ساپالى اتقارىلۋىن تۇراقتى تۇردە قاداعالاۋى كەرەك. نىساندارداعى قۇرىلىس، رەكونسترۋكسيا شارالارىنىڭ قارقىنىن اپتا سايىن قاراستىراتىن بولامىز. بۇل جۇمىسقا جەكە كاسىپكەرلەردىڭ قىزىعۋشىلىعى جوعارى ەكەنى بايقالادى. سول سەبەپتى جاتاقحانا سالۋعا نيەتتى بيزنەس وكىلدەرىنە قاجەتتى جاعداي جاساۋعا قاتىستى شارالاردى قاراستىرۋ قاجەت»، - دەپ اتاپ ءوتتى ۆيتسە-پرەمەر.
ستۋدەنتتەردى جاتاقحانامەن قامتۋ جۇمىسى قارقىندى جۇرۋدە. بىلتىر 10304 ورىنعا ارنالعان 43 عيمارات پايدالانۋعا بەرىلگەن. الايدا، دەموگرافيالىق ءوسىم قوسىمشا ورىنداردى قاراستىرۋدى قاجەت ەتەدى. وسى رەتتە عىلىم جانە جوعارى ءبىلىم مينيسترلىگى ۇزاقمەرزىمدى جوسپاردى دا وزەكتەندىرۋدى قولعا الدى.
اۆتور
باقىتگۇل اباي قىزى
