بيىل قازاقستان استىعىن جاڭا نارىقتارعا وتكىزۋ كەرەك - دەپۋتات

استانا. KAZINFORM - بيىل قازاقستاندا جينالعان مول استىقتى شەتەل نارىعىنا وتكىزۋدە قيىندىقتار بولۋى مۇمكىن. بۇل تۋرالى ءماجىلىس دەپۋتاتى ايداربەك قوجانازاروۆ ايتتى.

«روسسەلحوزنادزور ءبىزدىڭ استىققا قاتىستى كەدەرگىلەر جاساپ جاتىر دەپ سانايمىن. قازاقستاننىڭ ەكسپورتتاۋشىلارى ءوزىنىڭ ءونىمىن رەسەي اۋماعى ارقىلى ەۋروپاعا تاسىمالداۋ كەزىندە قيىندىققا تاپ بولدى. تاۋارلارىن توقتاتىپ، سانيتارلىق سەرتيفيكاتتارىن بەرمەي جاتىر. بۇل ءوز كەزەگىندە ۇلكەن شىعىندارعا اكەلۋى ىقتيمال. وسى جىلى 25,2 ميلليون توننا كولەمىندە مول استىق جينالدى. سوندىقتان بۇل ءونىمدى ءتيىمدى ەكسپورتتاۋ مىندەتى تۇر»، - دەدى ا. قوجانازاروۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، ق ر ساۋدا جانە ينتەگراتسيا مينيسترلىگى وسى ماسەلەنى شەشۋگە كىرىسۋى كەرەك.

«ءبىزدىڭ ورتالىق ازيا، اۋعانستان سياقتى ءداستۇرلى نارىقتارىمىز بار. ولار جىل سايىن الىپ وتىرعان كولەمدە استىق الادى. ال قالعان مول ءونىمدى جاڭا نارىققا باعىتتاۋ قاجەت. سوندىقتان كورشى ەلمەن ۇكىمەت دەڭگەيىندە قولايلى كەلىسسوز بولۋى ءتيىس»، - دەدى دەپۋتات.

ايتا كەتەيىك، بۇگىن ءماجىلىستىڭ جالپى وتىرىسىندا اتالعان ماسەلەگە قاتىستى ايداربەك قوجانازاروۆ ۇكىمەت باسشىسى ولجاس بەكتەنوۆتىڭ اتىنا ساۋال جولدادى.

«2024-جىلدىڭ 23-قىركۇيەگىنەن باستاپ رەسەي فەدەراتسياسى قازاقستاننىڭ استىعى مەن اۋىل شارۋاشىلىعى ونىمدەرىنىڭ رەسەي اۋماعى ارقىلى وتۋىنە ءبىرجاقتى شەكتەۋلەر ەنگىزدى. وسى تەرىس شەشىمنىڭ ناتيجەسىندە استىققا، ءدان ونىمدەرىنە، كۇنباعىس تۇقىمىنا، قىزاناق، بۇرىش جانە باسقا دا ونىمدەرگە فيتوسانيتارلىق سەرتيفيكات بەرۋدى توقتاتتى. حالىقارالىق كەلىسىمدەر جايىنا قالدى»، - دەدى دەپۋتات.

ونىڭ ايتۋىنشا، روسسەلحوزنادزور ەنگىزگەن شەكتەۋلەر ەۋرازيالىق ەكونوميكالىق وداق تۋرالى شارتتىڭ تالاپتارىن بۇزىپ تۇر.

«رەسەي فەدەراتسياسىمەن رەسمي كەلىسسوزدەردى باستاۋ كەرەك. قازاقستاندىق ءونىمنىڭ ترانزيتىنە نەگىزسىز فيتوسانيتارلىق شەكتەۋلەر جويىلسىن. قازاقستاندىق ءونىمنىڭ ەكسپورتى ءۇشىن باسقا دا لوگيستيكالىق باعىتتاردى ىسكە قوسۋىمىز كەرەك. ماسەلەن، كاسپي تەڭىزى ارقىلى ازەربايجان، يران جانە تۇرىكمەنستاننىڭ قاتىسۋىمەن تاسىمالداۋدى ۇيىمداستىرۋ قاجەت. كەرەك بولسا ءونىم تاسىمالى ءۇشىن سۋبسيديا قاراستىرىڭىزدار. بۇل رەسەيلىك ترانزيتكە تاۋەلدى بولۋدىڭ جولىن كەسەدى. سونىمەن قاتار، قىتايمەن ارادا قازاقستان استىعى مەن باسقا دا اۋىل شارۋاشىلىعى ونىمدەرىن وتكىزۋگە ارنالعان كۆوتالاردى ۇلعايتۋ ماسەلەسىن قاراۋ قاجەت»، - دەدى ايداربەك قوجانازاروۆ.

بۇدان بۇرىن حابارلانعانداي، ق ر اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى روسسەلحوزنادزوردىڭ قازاقستاننان رەسەيگە استىق، قىزاناق، كۇنباعىستى ەكسپورتتاۋدى توقتاتا تۇرۋ تۋرالى وتىنىشىنە قاتىستى پىكىر ءبىلدىردى.

ەسكە سالا كەتەيىك، بيىل تامىز ايىندا 2024-جىلعى 31-جەلتوقسانعا دەيىن ءبيدايدى (س ە ق ت ن كودى: 1001) قازاقستان رەسپۋبليكاسىنىڭ اۋماعىنا كولىكتىڭ بارلىق تۇرىمەن اكەلۋگە تىيىم سالۋ تۋرالى شەشىم قابىلداندى.