بيىل قازاق فۋتبولشىلارى مادريدتىك «اتلەتيكومەن» كەزدەسەدى
استانا. KAZINFIRM - فۋتبولدان قازاقستان جاسوسپىرىمدەر ليگاسى (QJ League) تۋرنيرىنىڭ الداعى ماۋسىمىندا 54 وڭىردە جاساقتالعان 18 كوماندا باق سىنايدى.
ولاردىڭ قاتارىندا، فۋتبولدان 16 جاسقا دەيىنگى قازاقستان ۇلتتىق قۇراماسى دا بار. سونداي-اق، بيىل العاش رەت فۋتبولدان قىزدار ليگاسىنىڭ تۇساۋى كەسىلەدى. بۇل تۋرالى ليگانىڭ جاڭا ماۋسىمىنا ارنالعان باسپا ءسوز ءماسليحاتىندا حابارلاندى.
استانادا وتكەن باسپا ءسوز جيىنىندا تۋرنيردىڭ ەكى جىلدىق جۇمىسى قورىتىندىلاندى. وسى ۋاقىت ارالىعىندا 226 جاس ءوسپىرىم فۋتبولشى جوعارى ليگالار مەن حالىقارالىق ماتچتارعا جولداما العان. ولاردىڭ قاتارىندا QJ ليگادا جارقىراپ كوزگە تۇسكەن «قايرات» اكادەمياسىنىڭ تۇلەگى، بۇگىندە لوندوندىق «چەلسيگە» اۋىسقان داستان ساتپايەۆ بار.
QJ ليگا پرەزيدەنتى روحۋس شوح بيىلعى ماۋسىمنىڭ باستى ەرەكشەلىكتەرىنە توقتالا وتىرىپ، فۋتبول جانكۇيەرلەرىنە قۋانىشتى جاڭالىقتى جەتكىزدى. بيىل ليگانىڭ ۇزدىك ويىنشىلارىنان قۇرالعان كوماندا الەمگە ايگىلى فۋتبول اكادەمياسى - مادريدتىك «اتلەتيكونىڭ» جاس ويىنشىلارىمەن كەزدەسەدى. اتالعان ماتچ 23 -تامىز كۇنى الماتىدا وتەدى.
بەلگىلى كاسىپكەر ءارى فيلانتروپ، ليگانىڭ قامقورشىلار كەڭەسىنىڭ ءتوراعاسى تيمۋر تۋرلوۆ «اتلەتيكونىڭ» جايدان-جاي تاڭدالماعانىن ايتىپ ءوتتى.
«ءبىز تەك مىقتىلارمەن باسەكەلەسۋ ارقىلى ءوز قارقىنىمىزدى ارتتىرا الامىز. جىل سايىن ليگا وكىلدەرى ەۋروپاداعى جاقسى دەگەن فۋتبول اكادەميالارىمەن كەزدەسىپ ءجۇر. مىنە، بيىل ايگىلى «اتلەتيكونىڭ» تاربيەلەنۋشىلەرى كەلەدى. ءبىز الەم ۇزدىكتەرىنەن قورىقپاۋىمىز كەرەك. كەرىسىنشە، كىل مىقتىلارمەن يىق تىرەسۋ ارقىلى ءوز شەبەرلىگىمىزدى ارتتىرامىز. جازدا وتەتىن ماتچتا ءبىزدىڭ جاس ويىنشىلاردان كۇتەر ءۇمىتىم مول»، - دەيدى تۋرلوۆ.
ايتا كەتەرلىگى، QJ ليگا تۋرنيرىنىڭ 2025 -جىلعى ماۋسىمىندا العاش رەت قىزدار ليگاسى باستالادى. ازىرگە، 8 كوماندادان قۇرالعان 17 جاسقا دەيىنگى قىزدار ءوزارا مىقتىنى انىقتايدى.
سونىمەن قاتار، بيىل جاسوسپىرىمدەر ليگاسىنا 3 كوماندا قوسىلدى. ولار - فۋتبولدان 16 جاسقا دەيىنگى قازاقستان قۇراماسى، «جەڭىس» جانە «حان ءتاڭىرى».
ليگانىڭ ءۇشىنشى ماۋسىمى 19- ساۋىرگە جوسپارلانعان.
وسىعان دەيىن حابارلاعانىمىزداي، فۋتزالدان قازاقستاننىڭ 19 جاسقا دەيىنگى جاستار قۇراماسى 2025 -جىلعى ەۋروپا چەمپيوناتىنىڭ ىرىكتەۋ كەزەڭىن جەڭىسپەن اياقتادى.
اۆتور
مۇحتار قاليموللا ۇلى
