بيىل قانشا شەتەلدىك ازامات قازاقستاندا ءبىلىم الادى

استانا. KAZINFORM - قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى جانە «حالىقارالىق باعدارلامالار ورتالىعى» ا ق شەتەلدىك ازاماتتارعا، ونىڭ ىشىندە قازاقستان ازاماتى ەمەس، ۇلتى قازاق ۇلتىنىڭ وكىلدەرىنە ارنالعان 2025-2026 وقۋ جىلىنا ارنالعان مەملەكەتتىك ستيپەنديالىق باعدارلاما شەڭبەرىندە كونكۋرستىق ىرىكتەۋدىڭ اياقتالعانى تۋرالى حابارلادى.

- كونكۋرس قورىتىندىسى بويىنشا 550 ستيپەندياتتىڭ نەگىزگى ءتىزىمى بەكىتىلدى. اتالعان باعدارلامانىڭ «بولاشاق» باعدارلاماسىنا قاتىسى جوق ەكەنىن اتاپ وتكەن ءجون. ول 2019 -جىلدان باستاپ دەربەس جۇزەگە اسىرىلىپ كەلەدى جانە حالىقارالىق اكادەميالىق ارىپتەستىكتى كەڭەيتۋگە، سونداي-اق شەتەلدەن تالانتتى جاستاردى قازاقستاننىڭ جەتەكشى جوعارى وقۋ ورىندارىندا ءبىلىم الۋعا تارتۋعا باعىتتالعان، - دەلىنگەن حابارلامادا.

2025 -جىلى باعدارلاما اياسىندا كەلەسى مولشەردە گرانتتار ءبولىندى:

دوكتورانتۋراعا - 10 گرانت؛

ماگيستراتۋراعا - 50 گرانت؛

باكالاۆريات - 490 گرانت.

بايقاۋعا الەمنىڭ 57 ەلىنەن 13723 ۇمىتكەر قاتىستى. ىرىكتەۋ پروتسەسىنە 2668 ءبىلىم بەرۋ باعدارلاماسىن ۇسىنعان 37 قازاقستاندىق جوعارى وقۋ ورىندارى جۇمىلدىرىلدى. ەڭ كوپ ستيپەندياتتار ءال-فارابي اتىنداعى قازاق ۇلتتىق ۋنيۆەرسيتەتىنە، Astana IT University، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنە، ق ب ت ۋ جانە باسقا دا وقۋ ورىندارىنا قابىلداندى.

باعدارلاما ورتالىق ازيانىڭ ءبىلىم بەرۋ حابى رەتىندە قازاقستاننىڭ يميدجىن نىعايتۋ جونىندەگى ستراتەگيالىق مىندەتتى ىسكە اسىرۋدى جالعاستىرادى.

گرانت يەگەرلەرىنىڭ تولىق ءتىزىمىن «بولاشاق» حالىقارالىق باعدارلامالار ورتالىعىنىڭ رەسمي سايتىنان تانىسۋعا بولادى.

ال تاجىكستان قازاقستاندىقتارعا 100 ءبىلىم گرانتىن ءبولدى.