بيىل ەلىمىزدە سوڭعى قوڭىراۋدى وتكىزۋ كۇنى وزگەردى

استانا. KAZINFORM - بيىل ەلىمىزدە مەكتەپ بىتىرەتىن تۇلەكتەردىڭ قۇرمەتىنە ارنالعان سوڭعى قوڭىراۋ سالتاناتتى ءىس-شاراسى وتەتىن كۇن وزگەرتىلدى. بۇل تۋرالى وقۋ-اعارتۋ مينيسترلىگى حابارلايدى.

- 34 اپتاعا سوزىلاتىن وقۋ جىلى اياقتالۋعا جاقىن. بيىل ەلىمىزدە 3,9 ميلليوننان استام وقۋشى قورىتىندىلاپ، ونىڭ ىشىندە 217 مىڭنان استام تۇلەك مەكتەپ بىتىرەدى. وتكەن جىلداعىداي، سوڭعى وقۋ كۇنى — 23 - مامىردا ەلىمىزدىڭ بارلىق مەكتەبىندە «ءبىلىمىم — وتانىما» تاقىرىبىندا ءبىرىڭعاي سىنىپ ساعاتى وتەدى. بۇل بۇكىل ءبىلىم بەرۋ جۇيەسى ءۇشىن ماڭىزدى شارا، وقۋشىلار مەن ۇستازدار وقۋ جىلىن قورىتىندىلاپ، ەڭ ماڭىزدى ءارى قىزىقتى ساتتەردى بىرگە ەسكە الادى، - دەلىنگەن حابارلامادا.

اقپاراتتا ايتىلعانداي، ءبىرىڭعاي سىنىپ ساعاتى وقۋشىلاردىڭ بويىندا بىلىمگە ۇمتىلىس، پاتريوتيزم جانە ەڭبەكقورلىق سياقتى قاسيەتتەردى قالىپتاستىرۋعا باعىتتالعان.

- بيىل وقۋ جىلىنىڭ اياقتالۋى جەكسەنبى كۇنىمەن سايكەس كەلگەندىكتەن، 11-سىنىپ تۇلەكتەرى ءۇشىن سالتاناتتى شارا مەكتەپ اكىمشىلىگىنىڭ شەشىمىمەن 23- نەمەسە 24- مامىردا وتكىزىلەدى. سونداي-اق، بارلىق وقۋشى ءۇشىن تەڭ جاعداي مەن قاۋىپسىزدىكتى قامتاماسىز ەتۋ ءۇشىن مەكتەپ فورماتىنان تىس، ءسان-سالتاناتتى ءىس- شارالار ۇيىمداستىرۋ، اقشا جيناۋ، اۆتوكولىكپەن شەرۋگە شىعۋ جانە باسقا دا مەرەكەلەۋ تۇرلەرىنە جول بەرىلمەيتىنىن تاعى دا ەسكە سالامىز، - دەپ حابارلايدى ۆەدومستۆودان.

بۇعان دەيىن عاني بەيسەمبايەۆ سوڭعى قوڭىراۋ كەزىندە اتا-انالار مەكتەپتەگى مەرەكەلىك ءىس- شارالارعا شىعىندالىپ، بالالاردى ىسىراپقا ۇيرەتپەۋى كەرەكتىگىن ايتىپ، ۇندەۋ جاساعان ەدى.

ەسكە سالساق، ەلوردالىق وقۋشىلاردىڭ سوڭعى قوڭىراۋ سالتاناتتى شاراسىن وتكىزۋگە قاتىستى جەلىدە اقپارات تارادى.

كەيىن استانا اكىمدىگى سوڭعى قوڭىراۋعا قاتىستى جەلىدە تاراعان اقپاراتقا تۇسىنىك بەردى.