بيىل ەلىمىزدە Starlink جۇيەسىن ورناتۋ جالعاسادى

استانا. KAZINFORM - ەلىمىزدىڭ ءبىراز مەكتەبىنە Starlink ينتەرنەت جۇيەسى تارتىلدى. بۇل جۇيە قانشالىقتى ءوزىنىڭ ناتيجەلىگىن كورسەتتى؟ بۇل سۇراققا ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جاۋاپ بەردى.

- Starlink سپۋتنيكتىك ينتەرنەتى قازاقستان مەكتەپتەرىندە كەڭجولاقتى جەلىنى قامتاماسىز ەتۋ ماقساتىندا پيلوتتىق جوبا اياسىندا ەنگىزىلدى. 2024 -جىلدىڭ قورىتىندىسى بويىنشا 1812 مەكتەپكە جابدىق ورناتىلدى. سونىمەن قاتار 65 مەكتەپتە قىزمەت كورسەتۋ توقتاتىلدى، ونىڭ ىشىندە 30 مەكتەپ جابىلدى، ال 35 مەكتەپتە تالشىقتى- وپتيكالىق بايلانىس جەلىسى (ت و ب ج) تارتىلدى، سوندىقتان ولار ءۇشىن Starlink قاجەتتىلىگى جويىلدى. جالپى العاندا، Starlink ينتەرنەتى شالعايداعى مەكتەپتەردى ينتەرنەتپەن قامتاماسىز ەتۋدە ءتيىمدى شەشىم بولدى. قازىرگى ۋاقىتتا 1678 مەكتەپ Starlink جۇيەسىن پايدالانىپ وتىر، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ايتا كەتەيىك، ۆەدومستۆو بيىل قازاقستان اۋماعىندا Starlink جۇيەسىن ورناتۋ جالعاساتىنىن ناقتىلادى.

- 2025 -جىلى Starlink جۇيەسىن ورناتۋ جالعاسادى. وقۋ-اعارتۋ مينيسترلىگىمەن (و ا م) بىرلەسىپ، مەكتەپتەردىڭ ءتىزىمى جاڭارتىلىپ جاتىر. قازىرگى كەزدە 1678 مەكتەپتە Starlink جابدىعى جۇمىس ىستەپ تۇر جانە جوسپار بويىنشا قوسىمشا 110 مەكتەپ سپۋتنيكتىك ينتەرنەتكە قوسىلادى. ناتيجەسىندە جالپى ءتىزىم 1788 مەكتەپتى قامتيدى، - دەپ اتالىپ وتكەن سيفرلىق دامۋ مينيسترلىگى مالىمەتىندە.

بۇعان دەيىن سپۋتنيكتەردى قازاقستاننان ەكسپورتتاۋعا قاتىستى قاي ەلدەرمەن كەلىسىم بار ەكەنىن جازعان ەدىك.

اۆتور

رۋسلان عابباسوۆ