بيىل ەلىمىزدە قانشا استىق جينالادى

ەلىمىزدە استىق جيناۋ ماۋسىمى اياقتالۋعا جاقىن. بۇل تۋرالى اۋىل شارۋاشىلىعى ۆيتسە- ءمينيسترى ازات سۇلتانوۆ ءمالىم ەتتى، دەپ حابارلايدى Kazinform.

«سولتۇستىك قازاقستان وبلىسى ءداندى داقىلداردى جيناۋدى اياقتادى. قوستاناي جانە اقمولا وبلىستارى، ياعني نەگىزگى استىق ەگەتىن وڭىرلەردە ەگىننىڭ %90 جينالدى»، - دەدى ازات سۇلتانوۆ KazAgro-2023 حالىقارالىق كورمەسى بارىسىندا ب ا ق وكىلدەرىنىڭ سۇراعىنا جاۋاپ بەرە وتىرىپ.

ونىڭ ايتۋىنشا، قازاندا ەگىن جيناۋ جۇمىستارىن اياقتاۋ جوسپارلانىپ وتىر.

«ءبىز بۇعان دەيىن ناقتىلانعان بولجام جاساعانبىز. سول بويىنشا بيىل 15,6 ميلليون توننا استىق جينالماق. بولجام ازىرگە راستالىپ وتىر. وتكەن جىلدان قالعان استىقتى ەسكەرە وتىرىپ، ىشكى نارىقتى الەۋمەتتىك ماڭىزى بار ونىمدەرمەن قامتاماسىز ەتۋگە جەتكىلىكتى. بۇل دەگەنىمىز ۇن، ماكارون جانە نان. الەۋمەتتىك ناننىڭ باعاسى ارنايى سۋبسيديالاۋ باعدارلاماسى ارقىلى رەتتەلەدى، سوندىقتان تۇتىنۋشىلار ۋايىمداماسىن»، - دەيدى ءمينيستردىڭ ورىنباسارى.