بيىل ەلدە بالالاردىڭ جازعى دەمالىسى قالاي ۇيىمداستىرىلادى
استانا. قازاقپارات - 2025-2026 وقۋ جىلىنىڭ اياقتالۋىنا از عانا ۋاقىت قالدى. وسى ورايدا قازاقستان وڭىرلەرىندە جالپى قانشا جازعى دەمالىس لاگەرى اشىلادى؟ ەلىمىزدە جازعى لاگەرلەردىڭ تاپشىلىعى ماسەلەسى شەشىلدى مە؟
بۇل سۇراققا ق ر وقۋ-اعارتۋ مينيسترلىگى جاۋاپ بەردى.
- قازىرگى كەزدە 192 ماۋسىمدىق، جىل بويى جۇمىس ىستەيتىن 18 ساۋىقتىرۋ ورتالىعىندا جانە 10 مىڭنان استام مەكتەپ جانىنداعى لاگەرلەردە 3 ميلليوننان استام بالانى دەمالىس، بوس ۋاقىتتى ۇيىمداستىرۋ جانە ساۋىقتىرۋ شارالارىمەن قامتۋ جوسپارلانعان. جەرگىلىكتى اتقارۋشى ورگاندارىمەن بالالار ساۋىقتىرۋ ورتالىقتارىنىڭ تاپشىلىعى ماسەلەسى كەزەڭ-كەزەڭىمەن شەشىلىپ كەلەدى. مەملەكەت باسشىسىنىڭ تاپسىرماسىن ورىنداۋ ماقساتىندا بالالاردى ساۋىقتىرۋ جانە ولاردىڭ شىعارماشىلىق، زياتكەرلىك الەۋەتىن دامىتۋ جونىندەگى 2024-2026-جىلدارعا ارنالعان جول كارتاسى اياسىندا 50 بالالار ساۋىقتىرۋ ورتالىعىنىڭ قۇرىلىسى ءجۇرىپ جاتىر، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
ۆەدومستۆو اقپاراتىنا قاراعاندا، جازعى كەزەڭدە 3 ميلليوننان استام بالا ساۋىقتىرۋ شارالارىمەن قامتىلماق. ونىڭ ىشىندە 500 مىڭنان استام الەۋمەتتىك وسال وتباسىلاردان شىققان بالالاردى تەگىن دەمالىسپەن قامتۋ جوسپارلانعان.
- وسى جىلى ساۋىقتىرۋ ورتالىقتارىنا جىبەرۋ كەزىندە از قامتىلعان وتباسىلارداعى بالالاردىڭ، ەرەكشە كۇتىمدى قاجەت ەتەتىن بالالارعا، سونداي-اق ءبىلىم سالاسىندا ءتۇرلى جەتىستىكتەرگە جەتكەن بالالارعا باسىمدىق بەرىلەدى. قازاقستان رەسپۋبليكاسى ۇكىمەتىنىڭ 2008-جىلعى 25-قاڭتارداعى 64-قاۋلىسىنا سايكەس، جەرگىلىكتى اتقارۋشى ورگاندار جەرگىلىكتى بيۋجەتتەردە قوسىمشا قاراجات كوزدەرىن قاراستىرادى، - دەپ اتالىپ وتكەن وقۋ-اعارتۋ مينيسترلىگى اقپاراتىندا.
بۇل قاراجات ءبىلىم بەرۋ ۇيىمدارىنىڭ وقۋشىلارى مەن تاربيەلەنۋشىلەرىنىڭ كەلەسى ساناتتارىنا قالا سىرتىنداعى جانە مەكتەپ جانىنداعى دەمالىس لاگەرلەرىنە جولدامالار بەرۋ ءۇشىن باعىتتالادى:
- مەملەكەتتىك اتاۋلى الەۋمەتتىك كومەك الۋعا قۇقىعى بار وتباسىلاردان شىققان بالالارعا؛
- مەملەكەتتىك اتاۋلى الەۋمەتتىك كومەك المايتىن، جان باسىنا شاققانداعى تابىسى ەڭ تومەن كۇنكورىس دەڭگەيىنىڭ شاماسىنان تومەن وتباسىلاردان شىققان بالالارعا؛
- وتباسىلاردا تۇراتىن جەتىم بالالارعا جانە اتا-اناسىنىڭ قامقورلىعىنسىز قالعان بالالارعا؛
- توتەنشە جاعدايلاردىڭ سالدارىنان شۇعىل جاردەمدى تالاپ ەتەتىن وتباسىلاردان شىققان بالالارعا؛
- ءبىلىم بەرۋ ۇيىمىنىڭ القالى باسقارۋ ورگانى ايقىندايتىن وقۋشىلار مەن تاربيەلەنۋشىلەردىڭ وزگە دە ساناتتارىنا.
مينيسترلىكتىڭ حابارلاۋىنشا، ەلىمىزدە ساۋىقتىرۋ ورتالىقتارى اقىلى نەگىزدە دە تيىستى قىزمەتتەر ۇيىمداستىرادى. وسى ورتالىقتاردا دەمالۋدىڭ ورتاشا قۇنى 130 مىڭ تەڭگەنى قۇرايدى.
ايتا كەتەيىك، جىل باسىندا پارلامەنت ماجىلىسىندە بالالار لاگەرلەرىن ليتسەنزيالاۋدى جازعا دەيىن تولىق ەنگىزۋ ماسەلەسى كوتەرىلگەن ەدى.
ەسكە سالساق، بىلتىر قازاقستاندا بالالار لاگەرىنە جولداما قۇنى قانشا ەكەنىن جازعان ەدىك.
