بيىل كۇزدە 20 مىڭنان اسا ازامات اسكەرگە شاقىرىلادى
استانا. KAZINFORM - وسى كۇزدە وتان الدىنداعى اسكەري مىندەتىن وتۋگە 18 بەن 27 جاس ارالىعىنداعى 20 مىڭنان اسا جاس شاقىرىلادى.
ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربەكوۆتىڭ مالىمدەۋىنشە، كۇزدە مەرزىمدى اسكەري قىزمەتكە شاقىرۋ ءۇشىن قورعانىس ىستەرى باسقارمالارى مەن بولىمدەرىندە 10-شىلدەدەن باستاپ اسكەرگە شاقىرۋشىلاردى زەرتتەپ، زەردەلەۋ جانە ىرىكتەۋ جۇمىستارى جۇرگىزىلدى.
«جەرگىلىكتى اسكەري باسقارۋ ورگانىنىڭ لاۋازىمدى ادامدارى زەردەلەۋ بارىسىندا اسكەري شاقىرۋشىلاردى وتباسى قۇرامىن، اسكەري قىزمەت وتكەرۋگە جارامدىلىق ساناتىن، ءبىلىمىن جانە ماماندىعىن ناقتىلايدى. سونداي-اق جەكە ىسىندەگى قۇجاتتاردى زەردەلەپ، اسكەرگە شاقىرۋشىلارمەن اڭگىمەلەسەدى. بۇل رەتتە بۇگىنگى تاڭدا 18 بەن 27 جاس ارالىعىنداعى اسكەرگە شاقىرۋشىلار ق ر بويىنشا 730 مىڭ ادامنان تۇرادى. سونىڭ ىشىندە 120 مىڭى اسكەرگە دايىن، ال 120 مىڭنىڭ ىشىنەن ءبىز 40 مىڭىن مەرزىمدى اسكەري قىزمەتكە شاقىرامىز»، - دەدى ف. ايداربەكوۆ و ك ق- دە وتكەن بريفينگىدە.
سونداي-اق، قورعانىس مينيسترلىگىنىڭ وكىلى، اسكەري قىزمەتكە شاقىرتۋ العان ازاماتتار اسكەري كوميسسياعا كەلۋگە مىندەتتى ەكەنىن ەسكە سالدى.
«شاقىرۋ قاعازى ازاماتقا جەكە ءوزى نەمەسە جۇمىس ورنى، وقۋ ورنى بويىنشا ۇيىم باسشىسىنىڭ قولىمەن نەمەسە س م س- حابارلاما ارقىلى تاپسىرىلادى. ازاماتقا شاقىرۋ قاعازىن جەكە تاپسىرۋ مۇمكىن بولماعان جاعدايدا ونىڭ كەلۋىن قامتاماسىز ەتۋ ءتيىستى ىشكى ىستەر ورگاندارىنا جۇكتەلەدى. مەرزىمدى اسكەري قىزمەتتەن باس تارتقاندار ءۇشىن زاڭ بويىنشا قىلمىستىق جانە اكىمشىلىك جاۋاپكەرشىلىك كوزدەلگەن»، - دەپ تولىقتىردى سپيكەر.
بۇعان دەيىن قورعانىس مينيسترلىگى كامەلەت جاسىنا تولعان جاستاردى اسكەرگە كوشەدەن ەرىكسىز الىپ كەتۋدىڭ زاڭدىلىعىنا قاتىستى تۇسىنىك بەردى.
