بيىل ەكونوميكا ءوسىمى 6 پايىز بولادى – ۇ ب بولجامى
استانا. KAZINFORM - كەلەر جىلى ەكونوميكا ءوسىمى ءبىرشاما تومەندەۋى مۇمكىن. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.
- 2025 -جىلعا ارنالعان ەكونوميكانىڭ ءوسۋ بولجامى 6 پايىزعا دەيىن ءوسۋ جاعىنا قايتا قارالدى. بۇل قايتا قاراۋ - مۇناي ءوندىرۋ، وڭدەۋ ونەركاسىبى مەن باسقا دا سالالارداعى ءوسىم قارقىنىن، ينۆەستيتسيالىق بەلسەندىلىكتىڭ ورنىقتىلىعىن جانە ىشكى سۇرانىستىڭ ايقىن كەڭەيۋىن كورسەتەدى. 2026 -جىلدىڭ بولجامى كەرىسىنشە 4-5 پايىزعا دەيىن ءبىرشاما تومەندەۋ جاعىنا قاراي ناقتىلاندى. بۇل شيكىزات جانە مۇناي نارىعىنداعى باعا كونيۋنكتۋراسىنىڭ السىرەۋىمەن بىرگە جاڭارتىلعان سىرتقى جانە ىشكى جاعدايلاردىڭ اسەرىنە بايلانىستى، - دەدى بانك ءتوراعاسى.
ونىڭ ايتۋىنشا، بولجام بويىنشا 2027 -جىلعا قاراي فيسكالدىق ىنتالاندىرۋدى قاتاڭداتۋ جانە بيۋدجەتتىك شوعىرلاندىرۋعا كوشۋ كەزىندە ەكونوميكا ورتاشا تاريحي دەڭگەيگە سايكەس قالىپتاسادى.
- ايتا كەتۋ كەرەك، بۇل باعالاۋلار ۇكىمەت پەن جالپى مەملەكەتتىك اپپارات جۇزەگە اسىرىپ جاتقان قۇرىلىمدىق رەفورمالار تابىستى ىسكە اسقان جاعدايدا قايتا قارالۋى مۇمكىن، - دەدى تيمۋر سۇلەيمەنوۆ.
سونداي-اق ول بازالىق مولشەرلەمە دەڭگەيىن ساقتاۋ سەبەبىن تۇسىندىرگەن ەدى.
اۆتور
مارلان جيەمباي
