بيىل مەكتەپكە بارعان وقۋشىلاردىڭ 71 پايىزى قازاق سىنىپتارىنا قابىلدانعان
استانا. KAZINFORM - مەملەكەتتىڭ بەدەلى ارتقان سايىن، مەملەكەتتىك ءتىلدىڭ دە ابىرويى كۇشەيەدى. بۇل پىكىردى مەملەكەت باسشىسى قاسىم-جومارت توقايەۆ «قازاق ءتىلى» قوعامىنىڭ 10- قۇرىلتايىندا ايتتى.
- قازاق ءتىلى تاۋەلسىزدىگىمىزدىڭ مىزعىماس سيمۆولى، وتانىمىزدىڭ مەملەكەتتىك ءتىلى، ۇلتىمىزدىڭ ماڭگىلىك جانى رەتىندە قابىلدانۋى قاجەت. باسقا كوزقاراستىڭ بولۋى مۇمكىن ەمەس، - دەدى قاسىم-جومارت توقايەۆ.
سوندىقتان قازاق تىلىنە سىيلاستىقپەن قاراۋ بۇل - ازاماتتىق، ادامي بورىش. ال پارىز قانشاما قاستەرلى بولسا دا، ونىڭ مىقتى نەگىزى بولۋى كەرەك.
- ءبىز ەكونوميكاسى دامىعان، يننوۆاتسياسى مەن تەحنولوگياسى ۇزدىك، الەم جۇرتشىلىعى مويىنداعان، وركەنيەتتى، مىقتى مەملەكەت بولساق، قازاق ءتىلى دە قۋاتتى ءتىل بولاتىنى انىق. مەملەكەتتىڭ بەدەلى ارتقان سايىن، مەملەكەتتىك ءتىلدىڭ دە ابىرويى كۇشەيەدى. بۇل - اقيقات، - دەيدى مەملەكەت باسشىسى.
پرەزيدەنتتىڭ ايتۋىنشا، بۇگىندە بالاباقشا مەن مەكتەپتەردە بالالاردىڭ باسىم بولىگى قازاق تىلىندە ءتالىم-تاربيە الىپ جاتىر. بيىل مەكتەپكە بارعان وقۋشىلاردىڭ 71 پايىزى قازاق سىنىپتارىنا قابىلداندى.
كوللەدجدەر مەن ۋنيۆەرسيتەتتەردە قازاق بولىمدەرىنىڭ سانى كوبەيدى.
سيفرلىق كەڭىستىكتە قازاق تىلىندەگى ساپالى ءارى تارتىمدى ونىمدەردى كوبەيتۋ - اسا ماڭىزدى مىندەت.
پرەزيدەنتتىڭ ايتۋىنشا، ءتىلدىڭ بولاشاعى تەك سوزدىك پەن وقۋلىققا بايلانىستى ەمەس. ادام قاي تىلدە اقپارات ىزدەپ، فيلم كورىپ، ءبىلىم السا، سول ءتىلدىڭ الەۋەتى كۇشەيە تۇسەتىنى انىق.
— سوندىقتان سيفرلىق كەڭىستىكتە قازاق تىلىندەگى ساپالى ءارى تارتىمدى ونىمدەردى كوبەيتۋ — اسا ماڭىزدى مىندەت. اسىرەسە، قازاق ءتىلىن وزدىگىنەن ۇيرەنۋگە مۇمكىندىك بەرەتىن IT- ونىمدەر، بالالاردىڭ ءتىلىن دامىتۋعا ارنالعان فيلمدەر مەن ويىندار كوپ بولۋى قاجەت، — دەدى مەملەكەت باسشىسى.
قازاقشا اقپاراتتىڭ اياسى، ياعني قازاق تىلىندەگى كونتەنتتىڭ اۋقىمى مەيلىنشە كەڭ بولعانى دۇرىس.
عىلىم، تەحنولوگيا، مادەنيەت، كاسىپكەرلىك، سپورت جانە باسقا دا وزەكتى تاقىرىپتار بويىنشا ساپالى ءونىم ازىرلەگەن ءجون.
- جالپى، وسىنداي جوبالارعا مەملەكەت تاراپىنان ناقتى قولداۋ كورسەتۋ قاجەت. بۇل ماسەلە بويىنشا ارنايى جۇمىس توبىن قۇرۋعا بولادى. وسى ماڭىزدى ىسكە «قازاق ءتىلى» قوعامىنىڭ باسشىسى راۋان كەنجەحان ۇلى جانە قوعامنىڭ مۇشەلەرى زور ۇلەس قوسارى كۇمانسىز. سايىپ كەلگەندە، ءتىلىمىزدىڭ بولاشاعىنا ءبارىمىز بىردەي جاۋاپتىمىز. ءارقايسىمىز قازاق ءتىلىنىڭ تۇعىرىن نىعايتۋعا اتسالىسۋىمىز كەرەك، — دەدى قاسىم-جومارت توقايەۆ.
ايتا كەتەيىك، مەملەكەت باسشىسى قاسىم-جومارت توقايەۆ حالىقارالىق «قازاق ءتىلى» قوعامىنىڭ 10- قۇرىلتايىندا ءسوز سويلەپ جاتىر.
شارا بارىسىندا پرەزيدەنت قازاق ءتىلىنىڭ ابىروي-بەدەلىن ارتتىرۋ ءۇشىن تاباندى جۇمىس ىستەۋ كەرەكتىگىن ايتتى.
جاڭا كونستيتۋتسيادا «تاۋەلسىزدىك» جانە «ەگەمەندىك» سوزدەرىن باس ارىپپەن جازىلاتىن بولدى.
