بيىل كۇرەس تۇرلەرىنەن ەل سپورتشىلارى قانشا مەدال جەڭىپ الدى
استانا. KAZINFORM - بۇگىن استانادا قازاقستان رەسپۋبليكاسىنىڭ گرەك-ريم، ەركىن جانە ايەلدەر كۇرەسى فەدەراتسياسىنىڭ 2024 -جىلدىڭ قورىتىندىسىنا ارنالعان ەسەپ بەرۋ كونفەرەنسياسى ءوتتى.
جيىنعا ق ر تۋريزم جانە سپورت مينيسترلىگىنىڭ وكىلدەرى، فەدەراتسيا باسشىلارى، وڭىرلىك كۋرەس فەدەراتسيالارىنىڭ وكىلدەرى، باس جانە اعا باپكەرلەر، كۇرەس ماماندارى قاتىستى.
كونفەرەنسيا بارىسىندا وسى جىلدىڭ وزەكتى پروبلەمالارى تالقىلانىپ، ءار ءوڭىر اتقارىلعان جۇمىس بويىنشا ەسەپ بەردى. باس حاتشىسى ديماش سۇلتانوۆ بايانداما جاساپ، فەدەراتسيانىڭ جۇمىسىنا ساراپتاما جاسادى.
- وسى جىلى ەلىمىزدىڭ بالۋاندارى وليمپيادا، الەم مەن ازيا بىرىنشىلىكتەرىندە تاماشا ونەر كورسەتتى. بارلىق جاس ەرەشەلىكتەرى بويىنشا اتالمىش دودالاردا سپورتشىلارىمىز ەل قورجىنىنا 110 مەدال اكەلدى. دەمەۋ جادىرايەۆ پاريج تورىندە كۇمىستى ولجالادى، - دەدى ديماش سۇلتانوۆ.
سونىمەن قاتار ق ر تۋريزم جانە سپورت مينيسترلىگىنىڭ شەشىمىمەن گرەك- ريم، ەركىن جانە ايەلدەر كۇرەسى فەدەراتسياسى 2024-جىلدىڭ ەڭ ۇزدىك فەدەراتسياسى بولىپ تانىلعانىن دا ەسكە سالىپ ءوتتى.
وسىدان بىرەر كۇن بۇرىن استانادا تۋريزم جانە سپورت مينيسترلىگى جىل سايىنعى «ۇزدىك» پرەمياسىنىڭ جەڭىمپازدارىن ماراپاتتاعان بولاتىن. وندا گرەك- ريم، ەركىن جانە ايەلدەر كۇرەسى فەدەراتسياسى «جىلدىڭ ۇزدىك اككرەديتتەلگەن سپورت فەدەراتسياسى» اتالىمىندا توپ جارعان بولاتىن.
- ارينە، وسى جىلعى فەدەراتسيا جۇمىسىن قاناعاتتاندىرارلىق دەپ ەسەپتەيمىن. ارىپتەستەرىمە العىسىمدى ايتامىن. بالۋاندارىمىز جاقسى ونەر كورسەتتى. جىلدىڭ ەڭ ۇزدىك فەدەراتسياسى اتاندىق. ءبىراق، الدا قىرۋار جۇمىس بار ەكەنىن ۇمىتپاۋىمىز كەرەك. 2025-جىلى ءبىز بۇدان دا بيىك جەتىستىكتەرگە قول جەتكىزەمىز دەپ سەنەمىن، - دەدى كونفەرەنتسيا سوڭىندا فەدەراتسيا پرەزيدەنتى داۋلەت تۇرلىحانوۆ.
كۇنسۇلتان وتارباي
