بيىل «قازاقپارات» اگەنتتىگىنە 105 جىل تولادى
استانا. قازاقپارات - 2025-جىلى 13-تامىزدا ەلىمىزدەگى ەڭ كونە مەديارەسۋرستاردىڭ ءبىرى - Kazinform حالىقارالىق اقپارات اگەنتتىگىنە 105 جىل تولادى. اگەنتتىك عاسىردان استام ۋاقىت بويى ساياسات، ەكونوميكا، ءبىلىم، دەنساۋلىق، سپورت، مادەنيەت جانە قوعام تىنىس-تىرشىلىگى تۋرالى سەنىمدى ءارى جەدەل اقپارات كوزى رەتىندە مۇلتىكسىز ەڭبەك ەتىپ كەلەدى.
العاشقى قازاق اقپارات اگەنتتىگى 1920-جىلى ورىنبور قالاسىندا روستانىڭ ورىنبور-تورعاي بولىمشەسى نەگىزىندە اشىلعان ەدى. 1925-جىلى اگەنتتىكتىڭ اتى قازروست بولىپ وزگەردى. ال 1937-جىلى «قازتاگ» دەگەن اتپەن قازاق ك س ر مينيسترلەر كەڭەسىنىڭ قاراۋىنا بەرىلدى.
اگەنتتىك قازتاگ بولعان جىلدارى اركادي ۆياتيچ- كيريللوۆ (1937-1938، رەپرەسسياعا ۇشىراپ، 1938-جىلى اتۋ جازاسىنا كەسىلدى)؛ كونستانتين نەفەدوۆ (1939-1940)؛ ءجۇسىپ التايبايەۆ (1953-1958)؛ كەڭەسباي ۇسەبايەۆ (1959-1960)؛ قاسىم ءشارىپوۆ، (1961-1974)؛ كاكىمجان قازىبايەۆ (1977-1982)؛ جۇماعالي يسماعۇلوۆ (1982-1987) جانە امانگەلدى احمەتاليموۆ (1987-1997) سىندى ازاماتتار باسشىلىق ەتتى.
الپىس جىلدان كەيىن 1997-جىلعى 10-قىركۇيەكتە «قازاق اقپارات اگەنتتىگى (قاز ا ا)» رەسپۋبليكالىق قازىنالىق كاسىپورنى قۇرىلدى. 2014-جىلدىڭ قاڭتارىندا «قازاقپارات» ەلدەگى العاشقى حالىقارالىق اقپارات اگەنتتىگى (ح ا ا) مارتەبەسىنە يە بولدى. اگەنتتىك 2022-جىلى ق ر پرەزيدەنتىنىڭ تەلەراديوكەشەنىنىڭ قۇرامىنا قوسىلدى.
Kazinform جاڭالىقتارى قازاق، ورىس، اعىلشىن، قىتاي، وزبەك تىلدەرىندە تاراتىلادى. سونىمەن قاتار، شەتەلدەگى قانداستارىمىز ءۇشىن جاڭالىقتار لاتىن گرافيكاسىندا جانە توتە جازۋمەن بەرىلەدى. 2004-جىلدىڭ 14-اقپانىندا «قازاقپارات» ۇلتتىق كومپانياسىنىڭ قازاق بولىمشەسى قازاقستاندا العاش رەت لاتىن ءالىپبيى نەگىزىندە مەملەكەتتىك تىلدە جاڭالىق تاراتۋدى قولعا الدى. نەگىز رەتىندە اكادەميك ءابدۋالي قايدار دايىنداعان لاتىن گرافيكاسىنىڭ ۇلگىسى الىندى. كەيىننەن وسى نۇسقا ماماندار اراسىندا «قازاقپارات نۇسقاسى» دەپ اتالىپ كەتتى. سونىڭ ارقاسىندا كيريلليتسا قارپىن وقي المايتىن شەتەلدەردەگى وتانداستارىمىز تاريحي وتانىندا بولىپ جاتقان وقيعالاردى ءبىلىپ وتىرۋعا مۇمكىندىك الدى.
Kazinform - قازاقستانداعى حالىقارالىق دەڭگەيدەگى جالعىز اگەنتتىك. ونىڭ كەڭسەسى استانادا ورنالاسقان جانە ەلىمىزدىڭ بارلىق وڭىرىندە مەنشىكتى تىلشىلەر جۇمىس ىستەيدى. رەسەي، قىتاي، تۇركيا، ەۋروپا، ازەربايجان، وزبەكستان، قىرعىزستان جانە يوردانيادا مەنشىكتى تىلشىلەرى بار. بۇل ەلىمىزدە جانە الەمدە بولىپ جاتقان جاڭالىقتاردى جەدەل ءارى شىنايى تاراتۋعا مۇمكىندىك بەرەدى.
اگەنتتىكتىڭ امبيتسياعا تولى، ءبىراق ناقتى ورىندالاتىن ماقساتى بار - قۇرلىقتاعى جەتەكشى اقپارات اگەنتتىكتەرىنىڭ ءبىرى بولۋ.
