بيىل شەگىرتكەگە قارسى كۇرەسكە جاپپاي درون قولدانىلادى

استانا. KAZINFORM - مەملەكەت شەگىرتكە دەرناسىلدەرىن باقىلاۋ ءۇشىن فيتوسانيتارلىق قىزمەتكە كومەككە ارنايى دروندار ساتىپ الادى. سونداي-اق ەگىستىكتى وڭدەۋگە ارنالعان درونداردى ساتىپ الۋدى سۋبسيديالاۋ مۇمكىندىگى قاراستىرىلادى.

استانادا 23-مامىر كۇنى ۆيتسە-پرەمەر سەرىك جۇمانعارين شەگىرتكەگە قارسى كۇرەس جونىندەگى جەدەل شتابتىڭ ەكىنشى وتىرىسىن وتكىزدى.

قازىرگى ۋاقىتتا بارلىق وڭىرلەردە وبلىس اكىمدەرى ورىنباسارلارىنىڭ باسشىلىعىمەن جەدەل جۇمىس ءۇشىن جەرگىلىكتى دەڭگەيدەگى شتابتار قۇرىلدى.

بولجامدار وزگەرگەن جوق، وڭدەۋگە بەكىتىلگەن اۋماق 2,5 ميلليون گەكتار كولەمىندە قالىپ وتىر.

ەڭ ۇلكەن اۋماق - اقتوبە (784,4 مىڭ گەكتار) جانە قوستاناي (775,6 مىڭ گەكتار) وبلىستارىندا.

بۇل اۋماقتى شەگىرتكەنىڭ يتاليالىق پرۋس تۇرىنەن تازارتۋ قاجەت.

شىعىس، سولتۇستىك جانە ورتالىق ايماقتارداعى سۋىق اۋا رايىنا بايلانىستى شەگىرتكە دەرناسىلدەرىنىڭ جاپپاي كوبەيۋى مەن دامۋى كەشەۋىلدەپ تۇر.

وڭدەۋ جۇمىستارى اقتوبە (10,8 مىڭ گەكتار)، الماتى (0,2 مىڭ گەكتار)، اتىراۋ (0,8 مىڭ گەكتار، جامبىل (5,1 مىڭ گەكتار، جەتىسۋ (0,7 مىڭ گەكتار)، باتىس قازاقستان (0,6 مىڭ گەكتار) وبلىستارىندا باستالدى.

تۇركىستان جانە جامبىل وبلىستارىندا تارالعان ماروككو شەگىرتكەسىنە قارسى وڭدەۋ جۇمىستارى اياقتالدى.

تۇركىستاندا تازارتۋ 255,3 مىڭ گەكتارعا نەمەسە %94 عا جۇرگىزىلدى، جامبىلدا - 9,7 مىڭ گەكتار نەمەسە %99,5 جەر وڭدەلدى.

شەگىرتكەلەردىڭ تارالۋىنىڭ ۇلكەن اۋقىمىن، قول جەتپەيتىن جەرلەردە جۇمىس ىستەۋدىڭ كۇردەلىلىگىن جانە دەرناسىلدەردىڭ ناقتى ورنالاسقان جەرىن ءبىلۋدىڭ ماڭىزىن ەسكەرە وتىرىپ، اۋىل شارۋاشىلىعى مينيسترلىگى شەگىرتكەلەردى باقىلاۋ جانە ناقتى فيتوسانيتارلىق كارتالاردى جاساۋ ءۇشىن ا و ك- دەگى مەملەكەتتىك ينسپەكتسيا كوميتەتىنىڭ اۋماقتىق ينسپەكتسيالارىنا درون ساتىپ الادى.

«دروندار شەگىرتكەگە قارسى كۇرەستە تيىمدىلىگىن كورسەتەدى. دەرناسىلدەردىڭ بەلسەندى ءوسۋ مەرزىمىنىڭ قىسقا كەزەڭىندە مۇنداي اۋماقتاردى ءداستۇرلى تۇردە - جاياۋ نەمەسە ماشينالارمەن وڭدەپ شىعۋ وتە قيىن. تولىق وڭدەلمەي قالۋ ىقتيمالدىعى جوعارى. اۋىل شارۋاشىلىعى، ونەركاسىپ جانە قۇرىلىس مينيسترلىكتەرى ەگىستىكتەردى زيانكەستەردەن وڭدەۋ ءۇشىن درونداردى ينۆەستيتسيالىق سۋبسيديالاۋ ماسەلەسىن پىسىقتاۋى قاجەت»، - دەپ قورىتىندىلادى جەدەل شتاب وتىرىسىن سەرىك جۇمانعارين.