بيىل عىلىمي اتاق بەرۋ ەرەجەسىنە بىرنەشە وزگەرىس ەنگىزىلدى
عىلىم جانە جوعارى ءبىلىم مينيسترلىگى بيىل عىلىمي اتاق بەرۋ ەرەجەسىنە قانداي وزگەرىس ەنگىزىلگەنىن جاريالادى، دەپ حابارلايدى Kazinform.
Kazinform ءتىلشىسىنىڭ رەسمي ساۋالىنا وراي جولدانعان ۆەدومستۆو جاۋابىندا جازىلعانداي، وسى جىلى قاۋىمداستىرىلعان پروفەسسور (دوتسەنت) جانە پروفەسسور عىلىمي اتاقتارىن بەرۋ تۋرالى ەرەجەگە مىناداي وزگەرىس ەنگىزىلگەن:
- حالىقارالىق رەتسەنزيالاناتىن عىلىمي جۋرنالدارداعى ماقالالار «ماقالا» (article/ارتيكل) نەمەسە «شولۋ» (review/ريەۆيۋ) تۇرىندە بولادى جانە ول كورسەتىلگەن بازالارداعى جۋرنالدىڭ تاقىرىپتىق باعىتىنا سايكەس كەلەدى. ءپانارالىق باعىتى بويىنشا حالىقارالىق رەتسەنزيالاناتىن عىلىمي ماقالالاردى جۋرنالداردا جاريالاۋعا رۇقسات ەتىلەدى (Multidisciplinary).
- سونىمەن قاتار حالىقارالىق رەتسەنزيالاناتىن عىلىمي جۋرنالداردا 2 عىلىمي ماقالا رەتىندەElsevier ،Brill ،CRC Press ، DeGruyter ،Edward Elgar Publishing ،John Wiley Sons ،McGraw Hill ،Palgrave Macmillan ،Peter Lang ، Prentice Hall ،Routledge ،Sage Publications ،Springer Nature ،Taylor and Francis ،Wolters Kluwer سياقتى سەنىمدى باسپالاردا نەمەسە US News Best Global Universities Rankings ءيا بولماسا Academic Ranking of World Universities نەمەسە Times Higher Education World University توپ-100 رەيتينگىندەگى ۋنيۆەرسيتەت باسپاسىندا شىعارىلعان مونوگرافيا ەسكەرىلەدى.
جوعارىدا كورسەتىلگەن باسپالاردا جاريالانعان 1 بەت ماتەريال ءبىر ماقالا رەتىندە ەسەپكە الىنادى. ايتا كەتەيىك، قازىر ەلىمىزدە 22456 عىلىمي كادر ەڭبەك ەتىپ ءجۇر. زەرتتەۋشىلەردىڭ 37 پايىزى عىلىمي جانە اكادەميالىق دارەجەگە يە. اتاپ ايتقاندا، عىلىم دوكتورى - 1743، عىلىم كانديداتى - 3945، فيلوسوفيا دوكتورى (PhD) - 2460 جانە بەيىنى بويىنشا دوكتور - 96 ادام. سونداي-اق، زەرتتەۋشىلەردىڭ 46 پايىزى نەمەسە 10327 ادام - 40 جاسقا دەيىنگى جاس عالىمدار. ال 31 پايىزى نەمەسە 6950 ادام - 41-54 جاستاعىلار بولسا، 23 پايىزى (5179 ادام) - 55 جاستان اسقان عالىمدار.
ەسكە سالا كەتەيىك، تاياۋدا عىلىم جانە جوعارى ءبىلىم مينيسترلىگى كەيىنگى ەكى جىلدا 6 دوكتورانتتىڭ ديسسەرتاتسياسىنان پلاگيات انىقتالعانىن مالىمدەدى.
مۇنىمەن قاتار كەيىنگى ەكى جىلدا وتاندىق عالىمدار قانداي جاڭالىقتار ويلاپ تاپقانى جايلى جازىپ ەدىك.
