بيىل ءبىر بالانى مەكتەپكە دايىنداۋعا قانشا اقشا كەرەك؟
استانا. قازاقپارات - قالانىڭ ءار جەرىندە مەكتەپ جارمەڭكەلەرى اشىلىپ، جاڭا وقۋ جىلىنا قىزۋ دايىندىق باستالاتىن ۋاقىتقا از قالدى.
وسى ورايدا BAQ. KZ ءتىلشىسى استانالىق بازارعا بارىپ وقۋشىلارعا ارنالعان كيىمدەر مەن كەڭسە تاۋارلارىنىڭ باعالارىن ءبىلىپ قايتتى.
بيىلعى باعالار قانداي، ءبىر بالانى مەكتەپكە دايىنداۋعا قانشا اقشا كەرەك، جاڭا وقۋ جىلىنا كيىم مەن كەڭسە تاۋارلارىن قاي كەزدە العان ءتيىمدى جانە اقشانى قالاي ۇنەمدەۋگە بولادى؟ بۇل سۇراقتاردىڭ جاۋابىن تومەندەگى ماتەريالدان بىلە الاسىز.
15 جىل كيىم ساتۋمەن اينالىسىپ كەلە جاتقان نۇرسۇلتان مولداقاسوۆ وقۋشىلارعا ارنالعان كيىمدەر جىل سايىن شامامەن 500-1000 تەڭگەگە قىمباتتايتىنىن ايتتى.
مىنا تەننيسكا 2022-جىلى 3500 تەڭگە، 2023-جىلى 4000 تەڭگە، 2024-جىلى 4500 تەڭگە بولدى. بيىل دا 4500 تەڭگە. ويتكەنى ءبىز الدىن الا الىپ قويدىق. ال قازىر اكەلىپ جاتقان تاۋارلار ودان ءسال قىمبات. بۇل جەردە 2 اپتا، 10 كۇننىڭ ءوزى ءرول وينايدى. جىل سايىن كيىمدەرگە 500-1000 تەڭگە قوسىلادى، - دەدى ساتۋشى.
ءبىز ودان، ەڭ الدىمەن، ۇلدارعا جانە قىزدارعا ارنالعان اق جەيدەلەردىڭ باعاسىن سۇرادىق.
ۇل بالاعا اق جەيدەلەر مينيمۋم 5000 نان باستالادى. جىبەك جەيدەلەر - 9500 تەڭگە. 49 پايىز بامبۋك، ۆيسكوزاسى ارى كەتسە 24 پايىز قۇرامىندا تابيعي ماتانىڭ ۇلەسى كوپ جەيدەلەر 14500 ت گ- گە دەيىن بارادى. ال قىزداردىڭ جەيدەلەرى مينيمۋم 7000 نان 15500 ت گ- گە دەيىن، - دەدى نۇرسۇلتان.
ول قىزدارعا ارنالعان جەيدەلەردىڭ تۇرلەرى ۇلداردىكىنە قاراعاندا الدەقايدا كوپ ەكەنىن اتاپ ءوتتى.
بىزدە قىزدارعا ارنالعان جەيدەلەردىڭ 18-19 ءتۇرى بار. ۇلدار كوبىنە كلاسسيكالىق اق نەمەسە كوك جاعالى جەيدە ءتۇرىن الادى. ال قىزدار وۆەرسايز، جازۋىمەن، جازۋسىز، تاستارىمەن، گالستۋكپەن، گالستۋكسىز تۇرلەرىن الادى. 1-3-سىنىپ ارالىعىنداعى قىزدار كوبىنە ستاندارتتى ۇلگىنى تاڭداسا، 4-9-سىنىپ ارالىعىنداعى وقۋشى قىزدار كوبىنە وۆەرسايز جەيدەلەر كيەدى، - دەيدى ساتۋشى.
نۇرسۇلتان مولداقاسوۆ اتا- انالاردى كيىم تاڭداعاندا برەندتىڭ اتاۋى جاپسىرماسىندا قالاي جازىلعانىنا ءمان بەرۋگە شاقىردى.
مىسالى كوپشىلىك تۇركيا دەپ ويلايتىن قىتايدان شىعاتىن Deloras دەگەن كيىم برەندى بار. ەگەر كيىم جاپسىرماسىندا Daloras دەپ جازىلسا، ول رەپليكا، ياعني برەند كوشىرمەسى. باستىسى - كيىم برەندىنىڭ وريگينال ەكەنىنە كوز جەتكىزۋ. ال ونىڭ باعاسى قالانىڭ ءار جەرىندە ءارتۇرلى بولۋى مۇمكىن. مىسالى بىزدە 9500 تەڭگە تۇراتىن Deloras جەيدەسىن سول جاعالاۋداعى ساۋدا ورتالىعىندا 12500 تەڭگەدەن ساتىلىپ تۇرعانىن كوردىم، - دەدى ول.
ساتۋشى ۇلدارعا شالبارلى كوستيۋم، قىزدارعا بەلدەمشە العاندا جيىنتىقپەن الۋ ءتيىمدى ەكەنىن جەتكىزدى.
مىسالى ۇلدارعا 15500 ت گ- گە ۇشتىك كوستيۋم العاننان سول باعاعا كوستيۋمى، ەكى شالبارى بار جيىنتىق العان دۇرىس. سەبەبى شالباردى بولەك الساڭ، باعاسى 7500 تەڭگەدەن 15000 عا دەيىن بارادى. سول سياقتى قىزدارعا دا بومبەر مەن بەلدەمشەدەن تۇراتىن جيىنتىقتى العان بومبەر مەن بەلدەمشەنى بولەك-بولەك العاننان تيىمدىرەك، - دەدى ول.
نۇرسۇلتان مولداقاسوۆ جيلەتتەر 6500 تەڭگەدەن باستالسا، كوفتالاردى 10500 تەڭگەدەن 16500 تەڭگە دەيىنگى ارالىقتا، سپورتتىق كيىمدى 10500 تەڭگەدەن 19500 ت گ دەيىن، كروسسوۆكانى 8500 تەڭگەدەن 12500 تەڭگەگە دەيىن، ءىشى قايىس، سىرتى ەكوكوجا اياقكيىمدەردى 11000 تەڭگەدەن 16000 تەڭگەگە دەيىنگى ارالىقتا الۋعا بولاتىنىن ايتتى.
سونداي-اق ساتۋشىمەن بىرگە استانالىق بازاردان قىز بالاعا مەكتەپكە ارنالعان كيىمدى كەم دەگەندە قانشاعا الۋعا بولاتىنىن ەسەپتەپ كوردىك.
7500 تەڭگەدەن 2 جەيدە - 15 مىڭ تەڭگە. قىز بالاعا مىندەتتى تۇردە ءبىر بەلدەمشە مەن ءبىر شالبار الادى. 9500 قوسىلعان 6500 - 16 مىڭ تەڭگە. سپورتتىق كيىم - 11 مىڭ تەڭگە، كروسسوۆكا - 8500 تەڭگە. تۋفلي - 11500 تەڭگە. 2 كولگوتكي 1500 تەڭگەدەن 3 مىڭ تەڭگە. 2 مايكاسىن الادى - 2200 تەڭگە. 1500 تەڭگەدەن 3 مىڭعا بانتيگىن الادى. وسىمەن 70 مىڭ تەڭگەدەن اسادى. ول سارافاندى قوسپاعاندا، - دەدى ساتۋشى.
نۇرسۇلتان مولداقاسوۆتىڭ ايتۋىنشا، ۇلدارعا مەكتەپكە ەڭ كەرەك كيىم مەن اياقكيىمدى كەم دەگەندە 55-65 مىڭ تەڭگە ارالىعىندا الۋعا بولسا، قىزدارعا 65-70 مىڭ تەڭگە ارالىعىندا قاراجات كەتەتىنىن ايتتى.
ال كەڭسە تاۋارلارىن ساتۋمەن اينالىساتىن تەمىرلان ازامات ۇلى كەڭسە تاۋارلارىنا 1 بالاعا ورتاشا ەسەپپەن 15-20 مىڭ تەڭگە كەتەتىنىن ايتادى. ءبىز ودان وقۋشىعا ەڭ قاجەت كەڭسە تاۋارلارىنىڭ باعاسىن بىلدىك:
داپتەر: 35 تەڭگە؛
قالىڭ داپتەر: 36 بەتتىك - 200 تەڭگە؛ 48 بەتتىك - 250 تەڭگە؛ 96 بەتتىك - 350 تەڭگە؛
كۇندەلىك: سىرتى جۇمساعى - 500 تەڭگە، سىرتى قاتتىسى - 700 تەڭگە؛
قالامساۋىت 700-3500 تەڭگە ارالىعىندا؛
قالام 50-200 تەڭگە ارالىعىندا؛
قارىنداش جۇمساعى - 50 تەڭگە، قاتتىسى - 100 تەڭگە؛
ءتۇرلى- ءتۇستى قارىنداش 6 ءتۇستىسى - 300 تەڭگە؛ 12 ءتۇستىسى - 600-800-1000 ت گ؛ 18 ءتۇستىسى - 1500-1800؛ 24 ءتۇستىسى - 2000-2200 ت گ؛
ۇشتاعىش 50-400 ت گ- گە دەيىن؛
سۋرەت داپتەر 16 بەتتىك - 400 ت گ؛ 24 بەتتىك - 500 ت گ؛ 40 بەتتىك - 700 ت گ؛
سىزعىش - 100-300 ت گ؛
ءتۇرلى- ءتۇستى قاعاز - 350 ت گ؛
كارتون - 500 ت گ؛
جەلىم - 200-500 ت گ.
تەمىرلان ازامات ۇلى كەڭسە تاۋارلارىن مەكتەپ جارمەڭكەلەرىنەن العاندا ارزان دەپ الدانىپ قالماس ءۇشىن داپتەردى عانا ەمەس، باسقا دا زاتتاردىڭ باعالارىن سالىستىرۋعا كەڭەس بەردى.
بىزگە ساتىپ الۋشىلار كەلگەندە داپتەردىڭ عانا باعاسىن سالىستىرادى. جارمەڭكەدە داپتەردى 5 تەڭگە دەپ قويۋى مۇمكىن. ال باسقا كەڭسە تاۋارلارىنىڭ باعاسى قىمباتىراق بولۋى مۇمكىن. ياعني ولار داپتەردىڭ باعاسىن باسقا زاتتاردان شىعارىپ الادى. سوندىقتان تەك داپتەر ەمەس، باسقا دا كەڭسە تاۋارلارىنىڭ باعاسىن سالىستىرىپ كورۋ كەرەك، - دەدى ول.
ال ساتۋشى ايىمگۇل قوندىبايەۆا اتا-انالارعا جاڭا وقۋ جىلىنا دايىندىقتى تامىزدىڭ باسىنان باستاۋعا شاقىرادى.
اجيوتاج تامىزدىڭ 20 سىنان 25 ىنە دەيىن بولادى. بالالارىنا 5-قىركۇيەككە دەيىن كيىم الاتىن اتا-انالار بار. نەگىزى مەكتەپ كيىمدەرىن تامىزدىڭ باسىندا العان جاقسى، ولشەمدەرى بار كەزدە. تىم ەرتە الىپ قويۋعا دا بولمايدى، بالا ءوسىپ كەتەدى. تامىزدىڭ باسى ءدال ۋاقىت، اياق جاعىندا ولشەم جوق، ۇستاعانىن الىپ كەتەدى، - دەدى ول.
