بيىل بيۋدجەتكە قانشا قارجى ءتۇستى

استانا. KAZINFORM - بيىلعى رەسپۋبليكالىق بيۋدجەتتىڭ ءتۇسىمى مەن كىرىستەردىڭ بولجامدى سوماسى بەلگىلى بولدى. تولىعىراق قارجى ءمينيسترى ءمادي تاكيەۆ ايتىپ بەردى.

«2024 -جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسى، بيۋدجەتتىڭ كەلەسى پارامەترلەرىنە بايلانىستى ازىرلەندى. ءبىرىنشى، رەسپۋبليكالىق بيۋدجەتتىڭ كىرىستەرى (ترانسفەرتتەردى ەسەپتەمەگەندە) سالىق تۇسىمدەرىن 3,1 تريلليون تەڭگەگە ازايتۋعا جانە سالىقتىق ەمەس تۇسىمدەردى 1,1 تريلليون تەڭگەگە ۇلعايتۋعا بايلانىستى 2 تريلليون تەڭگەگە ازايدى. ەكىنشى، ەكونوميكانىڭ ءوسۋ قارقىنىن تومەندەتۋ تاۋەكەلدەرى جاعدايىندا وڭىرلىك ءوسۋ دەڭگەيىن ۇستاپ تۇرۋ ءۇشىن، سونداي-اق بيىل رەسپۋبليكالىق بيۋدجەتتىڭ شۇعىل شىعىستارىن قارجىلاندىرۋدى قامتاماسىز ەتۋ ءۇشىن، ۇلتتىق قوردان بەرىلەتىن نىسانالى ترانسفەرت 2 تريلليون تەڭگەگە ۇلعايتىلدى. ءۇشىنشى، دەپۋتاتتاردىڭ ۇسىنىستارىن ەسكەرە وتىرىپ، ۇكىمەتتىك بورىش قىزمەتىنە 150 ميلليون تەڭگە سوماسىنداعى قاراجاتتى قايتا ءبولۋ قاراستىرىلعان. ءتورتىنشى، بيۋدجەت تاپشىلىعىندا 136,1 ميلليارد تەڭگە سوماسىنا 2023 -جىلدىڭ سوڭىنا بيۋدجەت قاراجاتىنىڭ قالدىقتارى جانە جەكەلەگەن جوبالاردى ىسكە اسىرۋعا قارىزداردى تارتۋ ەسكەرىلدى»، - دەدى ءمادي تاكيەۆ ءماجىلىستىڭ جالپى وتىرىسىندا.

مينيستر ۇسىنعان ستاتيستيكاعا سۇيەنسەك، 2024 -جىلعا ارنالعان تۇسىمدەر 20,4 تريلليون تەڭگە دەڭگەيىندە بولجانۋدا. 2024 -جىلعى كىرىستەر ترانسفەرتتەردى ەسەپكە الماعاندا 14,1 تريلليون تەڭگەنى قۇرايدى.

«بيىل بيۋدجەت تاپشىلىعى 3,7 تريلليون تەڭگە نەمەسە جالپى ىشكى ونىمگە (ج ءى ءو) %2,7 دەڭگەيىندە بولجانۋدا. بيۋدجەت شىعىستارى 24,1 تريلليون تەڭگەنى قۇرايدى. بۇل كورسەتكىشتەر كەپىلدىك بەرىلگەن ترانسفەرت، شىعىستاردىڭ ءوسۋ قارقىنى مەن بيۋدجەت تاپشىلىعى بويىنشا بيۋدجەتتىك قاعيدالارعا سايكەس كەلەدى»، - دەيدى ۆەدومستۆو باسشىسى.

اۆتور
داۋلەت ىزتىلەۋ