بيىل اۋىل شارۋاشىلىعى سالاسىنا رەكوردتىق قارجى ءبولىندى - ولجاس بەكتەنوۆ

استانا. KAZINFORM - ۇكىمەت باسشىسى ولجاس بەكتەنوۆ بيىلعى ەگىس ناۋقانىنان جينالعان ونىمدەردى جەتكىزۋ، ساقتاۋ مەن وتكىزۋ بويىنشا ءبىرقاتار تاپسىرما بەردى.

«مەملەكەت باسشىسىنىڭ تاپسىرماسى بويىنشا بيىل كوكتەمگى ەگىس جانە كۇزگى جيىن-تەرىن جۇمىستارىن ۋاقىتىلى جانە ساپالى جۇرگىزۋ ءۇشىن قاجەتتى شارالاردىڭ بارلىعى قابىلداندى. اتاپ ايتقاندا، اۋىل شارۋاشىلىعى سالاسىن قارجىلاندىرۋ كولەمى العاش رەت رەكوردتىق 580 ميلليارد تەڭگەگە دەيىن جەتتى. بيۋدجەت قاراجاتى ەگىنشىلەردى تىكەلەي نەسيەلەندىرۋگە، پايىزدىق مولشەرلەمەنى ارزانداتۋعا جانە فورۆاردتىق ساتىپ الۋعا باعىتتالدى. كەلەسى جىلى قارجىلاندىرۋ كولەمىن 700 ميلليارد تەڭگەگە دەيىن جەتكىزۋدى جوسپارلاپ وتىرمىز»، - دەدى ولجاس بەكتەنوۆ ۇكىمەت وتىرىسىندا.

پرەمەر-ءمينيستردىڭ مالىمدەۋىنشە، بيىل اۋىل شارۋاشىلىعى تەحنيكاسىن ليزينگپەن ساتىپ الۋعا 120 ميلليارد تەڭگە قۇيىلدى.

«الداعى جىلى بۇل كورسەتكىشتى 200 ميلليارد تەڭگەگە دەيىن جەتكىزۋ جوسپاردا بار. سونداي-اق، ديقاندار تۇقىممەن، جەڭىلدىكتى وتىن جانە تىڭايتقىشتاردىڭ جەتكىلىكتى كولەمىمەن قامتاماسىز ەتىلدى. ەندىگى باستى مىندەت - جينالعان ءونىمدى ساقتاۋ مەن وتكىزۋ. اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ، جينالعان استىقتى توكپەي-شاشپاي دەر كەزىندە تاسىمالداۋدى، ونى كەپتىرىپ، ەلەۆاتورلارعا جەتكىزۋدى قامتاماسىز ەتۋى قاجەت»، - دەيدى ول.

سونداي-اق، ولجاس بەكتەنوۆ استىق قابىلداۋ كاسىپورىندارى تاۋلىك بويى جۇمىس رەجيمىنە كوشۋ كەرەكتىگىن ايتتى.

اۆتور
داۋلەت ىزتىلەۋ