بيىل استاناداعى پرەزيدەنت ساياباعى قايتا جاڭعىرتىلادى

  استانا. KAZINFORM -بيىل ەلوردادا بىرنەشە ساياباق پەن كوشەگە قايتا جاڭعىرتۋ جۇمىستارى جۇرگىزىلەدى. بۇل تۋرالى استانا قالاسىنىڭ اكىمى جەڭىس قاسىمبەك ءمالىم ەتتى.

«بيىل پرەزيدەنت ساياباعى قايتا جاڭعىرتىلادى. سونىمەن قاتار ەسىل وزەنىنىڭ جاعالاۋىن اباتتاندىرۋدى، ياعني اممان كوشەسىنەن سارايشىق كوپىرىنە دەيىن، سول سياقتى بەيبىتشىلىك جانە كەلىسىم ساياباعىن، ماڭگىلىك ەل داڭعىلىنا (ورىنبور كوشەسىنەن قابانباي باتىر داڭعىلىنا دەيىن) قايتا جاڭعىرتۋ جۇمىستارىن جۇرگىزۋدى جوسپارلاپ وتىرمىز»،- دەدى جەڭىس قاسىمبەك ۇكىمەت وتىرىسىندا.

ودان بولەك، ەلوردا اكىمى «مىڭجىلدىق اللەياسى» ماڭىنداعى ءبىرقاتار كوشە بويىندا اباتتاندىرۋ جۇمىسى باستالاتىنىن ايتتى.

«ج. ناجىمەدەنوۆ، ا. بايتۇرسىنوۆ، ك. ازىربايەۆ كوشەسىنىڭ جانە تاۋەلسىزدىك داڭعىلى بويىن اباتتاندىرۋدىڭ ءبىرىنشى كەزەڭىن باستاۋدى جوسپارلاپ وتىرمىز»، - دەيدى ول.

جەڭىس قاسىمبەكتىڭ مالىمدەۋىنشە، استانادا سوڭعى 5 جىلدىڭ ىشىندە كوگالداندىرۋ الاڭى ءبىر تۇرعىنعا شاققاندا 14 شارشى مەتردەن 19 شارشى مەترگە دەيىن ۇلعايعان.

سونىمەن قاتار بىلتىر قالا اۋماعىندا 165 قوعامدىق جانە اۋلالىق كەڭىستىك اباتتاندىرىلعان.

اۆتور

داۋلەت ىزتىلەۋ