بيىل 53 ەلدى مەكەنگە ورتالىقتاندىرىلعان اۋىزسۋ جۇيەسى العاش رەت قوسىلادى
استانا. KAZINFORM - بيىل 53 ەلدى مەكەنگە ورتالىقتاندىرىلعان اۋىزسۋ جۇيەسى العاش رەت قوسىلادى. بۇل تۋرالى ۇكىمەت وتىرىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ايتتى.
- بۇگىنگى تاڭدا رەسپۋبليكالىق مەنشىكتە جالپى سانى 32 توپتىق سۋ قۇبىرى بار. ولار 1 ميلليون 393 مىڭ ادامدى قامتيتىن 581 اۋىلدىق ەلدى مەكەندى اۋىزسۋمەن قامتاماسىز ەتىپ وتىر. اكىمشىلىك رەفورمانىڭ جانە «قازسۋشار» كاسىپورنىن ترانسفورماتسيالاۋ اياسىندا 2024 -جىلدان باستاپ توپتىق سۋ قۇبىرلارىن كەزەڭ-كەزەڭىمەن جەرگىلىكتى اتقارۋشى ورگانداردىڭ مەنشىگىنە وتكىزۋ جۇمىستارى جۇرگىزىلۋدە. بۇل قادام حالىقتىڭ تۇرمىس- تىرشىلىگىن قامتاماسىز ەتۋ ماقساتىندا قابىلدانىپ، سۋدىڭ كوزىنەن باستاپ سوڭعى تۇتىنۋشىعا دەيىنگى بارلىق كەزەڭگە تولىق باقىلاۋ ورناتۋعا مۇمكىندىك بەرەدى، - دەدى مينيستر.
ونىڭ دەرەگىنشە، سۋ ينفراقۇرىلىمىن جاقسارتۋ ماقساتىندا مينيستىرلىك بيىل اقمولا، اتىراۋ، الماتى، ۇلىتاۋ، قاراعاندى، قىزىلوردا، ماڭعىستاۋ، تۇركىستان، باتىس قازاقستان جانە سولتۇستىك قازاقستان وبلىستارىندا توپتىق سۋ قۇبىرى نىساندارىن سالۋ جانە قايتا جاڭارتۋ بويىنشا 31 جوبانى ىسكە اسىرىپ جاتىر.
- اتالعان 31 جوبانى تولىق ىسكە اسىرۋ ناتيجەسىندە 2,6 مىڭ شاقىرىمنان استام سۋ قۇبىرى سالىنادى جانە بۇل 1,3 ميلليون حالىق تۇراتىن 468 ەلدى مەكەننىڭ سۋمەن جابدىقتاۋ ساپاسىن جاقسارتادى. سونىمەن قاتار 53 ەلدى مەكەنگە ورتالىقتاندىرىلعان اۋىزسۋ جۇيەسى العاش رەت قوسىلاتىن بولادى. بۇل جوبالاردى ىسكە اسىرۋ ءۇشىن بيىل 101 ميلليارد تەڭگە ءبولىندى. ونىڭ ىشىندە 38,2 ميلليارد تەڭگە - ۇلتتىق قوردان، 53,9 ميلليارد تەڭگە - ارنايى مەملەكەتتىك قوردان. 3,4 ميلليارد تەڭگە رەسپۋبليكالىق بيۋدجەتتەن باعىتتالعان، - دەدى ول.
نۇرجان نۇرجىگىتوۆتىڭ اتاپ وتۋىنشە، 2025 -جىلدىڭ العاشقى 5 ايىنىڭ قورىتىندىسى بويىنشا شامامەن 250 شاقىرىم سۋ قۇبىرى جەلىلەرى سالىندى. جىل سوڭىنا دەيىن 6 وبلىستا 10 جوبا پايدالانۋعا بەرىلەدى دەپ كۇتىلەدى.
- اتالعان جوبالاردى ىسكە اسىرۋ ناتيجەسىندە شامامەن 500 مىڭ تۇرعىنى بار 150 اۋىلدىق ەلدى مەكەننىڭ سۋمەن قامتۋ جاعدايى جاقسارادى. ونىڭ ىشىندە 1542 تۇرعىنى بار 4 اۋىلعا العاش رەت ورتالىقتاندىرىلعان اۋىزسۋ جۇيەسى قوسىلادى. سونىمەن قاتار اقمولا، تۇركىستان جانە سولتۇستىك قازاقستان وبلىستارىندا توپتىق سۋ قۇبىرلارىن قايتا جاڭارتۋ بويىنشا 6 جوباعا جوبالىق- سمەتالىق قۇجاتتاما ازىرلەنىپ جاتىر. بۇل جوبالار 102 شاقىرىم سۋ قۇبىرى جەلىلەرىن قايتا جاڭارتۋدى كوزدەيدى. 335 مىڭ ادام تۇراتىن 202 ەلدى مەكەننىڭ سۋمەن جابدىقتاۋ ساپاسىن جاقسارتۋعا مۇمكىندىك بەرەدى، - دەدى مينيستر.
بۇعان دەيىن ولجاس بەكتەنوۆ ىسكە اسىرىلۋ مەرزىمى سوزىلىپ كەتكەن تازا اۋىز سۋ جوبالارىن اتاعان ەدى.
