بيىل 3 مىڭ ەلوردالىق قازاق ءتىلىن تەگىن ۇيرەنەدى

استانا. KAZINFORM - بيىل ەلوردادا 3 مىڭ تۇرعىن قازاق ءتىلىن تەگىن ۇيرەنە الادى. بۇل تۋرالى استانا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ايتتى.

- وتكەن جىلى 1500 گە جۋىق قالا تۇرعىنىن ءارتۇرلى دەڭگەي بويىنشا مەملەكەتتىك تىلگە تەگىن وقىتتىق. بيىل قازاق ءتىلىن وقيتىن تۇرعىندار سانىن 3 مىڭعا ۇلعايتىپ وتىرمىز. سونىمەن قاتار كاسىپكەرلەرگە ارنالعان ينتەنسيۆ قازاق ءتىلى كۋرستارى بار. وقىتۋشىلارىمىز «استانالىق بازار»، «Central Market» سياقتى ءىرى ساۋدا ورىندارىنا بارىپ، ولاردىڭ قاجەتتىلىكتەرىنە سايكەس قىزمەت كورسەتۋشىلەردىڭ تۇتىنۋشىلارمەن اراداعى بازالىق ديالوگ ءتۇرىن ۇيرەتەمىز، - دەدى ول قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ وتىرىسىندا.

ونىڭ اتاپ وتۋىنشە، قالاداعى كوشەلەردىڭ 93 پايىزدايى تاريحي تۇلعالارىمىز بەن جەر-سۋ اتاۋلارىنىڭ قۇرمەتىنە قويىلعان. 60 مەكتەپكە ۇلت قايراتكەرلەرىنىڭ ەسىمى بەرىلگەن. ولاردى ۇلىقتاۋ باعىتىندا ۇنەمى عىلىمي كونفەرەنتسيا، ءدارىس، دوڭگەلەك ۇستەل، دارىستەر وتكىزىلىپ تۇرادى. سونىمەن قاتار ول جارنامالاردى مەملەكەتتىك تىلگە سايكەس كەلتىرۋ ماسەلەسىنە توقتالدى.

- ءار ايدا اتامەكەن كاسىپكەرلەر پالاتاسى بازاسىندا قالاداعى كاسىپ يەلەرىمەن تۇراقتى كەزدەسۋ وتكىزىلەدى. ولارعا جارناما، ءتىل زاڭدارىنىڭ تالاپتارى تۇسىندىرىلەدى. وتكەن جىلى تەك جارناما ءىلۋشى كاسىپكەرلەردەن 3741 ەسكيز جوباسىن قابىل الىپ، ونىڭ 81 پايىزىنا ءتيىستى تۇزەتۋلەر ەنگىزىپ، كەلىسىم بەردىك. بيىل جىل باسىنان بەرى «ەۋرازيا»، «Central Market» سىندى ساۋدا ويىن- ساۋىق ورتالىقتارىندا رەيد جۇرگىزدىك. 400 دەن استام سۋبەكت قامتىدىق. زاڭعا قايشى كەلەتىن نەمەسە تۇجىرىمدامالارعا سايكەس كەلمەيتىن جارنامالاردى الىپ تاستادىق، - دەدى ساكەن ەسىركەپ.

ايتا كەتەلىك قازاق ءتىلى ءۇشىن جاڭا سيفرلىق پلاتفورما جاسالادى. سونىمەن قاتار 1,7 ميلليون وقۋشى قازاق ءتىلى مەن ادەبيەتىنەن ەمتيحان تاپسىرادى.