بيىل 2300 ادام جول اپاتىنان قازا تاپتى: ۇكىمەت قانداي شارا قابىلداپ جاتىر
استانا. KAZINFORM - ەلدەگى ايىپپۇلدار سانى ارتتى ما؟ سوڭعى جىلدارى وسى سالادا قانداي زاڭدار وزگەردى؟ بۇل تۋرالى ق ر ىشكى ىستەر مينيسترلىگى اكىمشىلىك پوليسيا كوميتەتىنىڭ رەسمي وكىلى اقتوتى بورانوۆا ايتىپ بەردى.
ەڭ الدىمەن سپيكەر ەلىمىزدە ايىپپۇلدار سانى وسپەگەنىنە باسا توقتالدى.
- ق ر اكىمشىلىك قۇقىقبۇزۋشىلىقتار كودەكسىندە جاۋاپكەرشىلىك اەك كولەمىمەن كورسەتىلەدى. ا ە ك- پەن بايلانىستىرعاسىن، ايىپپۇل كولەمى ارتقانداي كورىنۋى مۇمكىن. ال ءبىزدىڭ تاراپىمىزدان ايىپپۇلدى ءوسىرۋ تۋرالى ەشقانداي وزگەرىس بولعان جوق. بۇل جەردە قوزعالىستىڭ قاۋىپسىزدىگىنە، جولداعى اپاتتى ازايتۋعا، جول-كولىك وقيعالارىنىڭ الدىن الۋعا باعىتتالعان شارالار ناتيجەسىندە وزگەرىستەر مەن ۇسىنىستار ەنگىزىلۋى مۇمكىن، - دەدى ا. بورانوۆا.
ماماننىڭ ايتۋىنشا، سوڭعى جىلدارى اۆتوكولىكتى ماساڭ كۇيدە باسقارعان جۇرگىزۋشىلەرگە جاۋاپكەرشىلىك كۇشەيدى - بۇرىن 3 جىل بولسا، قازىر 7 جىلعا جۇرگىزۋشى كۋالىگىنەن ايىرىلىپ، ءوزى اكىمشىلىك قاماۋعا الىنادى.
− بۇرىن جۇرگىزۋشى كۋالىگىن مۇلدەم الماعان ادامدار ماساڭ كۇيدە كولىك ايداسا، تەك قانا 15 تاۋلىككە قاماۋعا الىناتىن. كەيىن ەش كەدەرگىسىز جۇرگىزۋشى كۋالىگىن الاتىن. ال كۋالىگى بار ادامدار- قۇجاتىنان ايىرىلاتىن. مۇنداعى ادىلەتسىزدىك جويىلدى. ەندى جۇرگىزۋشى كۋالىگىن مۇلدەم الماعان ادام ماساڭ كۇيدە كولىك رولىندە ۇستالسا، الداعى ۋاقىتتاعى 7 جىلعا كۋالىك الۋعا شەكتەۋ قويىلادى، - دەپ ءتۇسىندىردى ول.
سونداي-اق، ەلىمىزدىڭ اكىمشىلىك قۇقىقبۇزۋشىلىقتار كودەكسىندە اۆتوكولىكتى بەلگىلەنگەن جىلدامدىقتان اسىرا باسقارۋعا شەكتەۋ قويىلدى.
− تالداۋعا سۇيەنسەك، بيىلعى 11 ايدا جول اپاتىنان 2300 دەن استام ادام قازا تاپتى. بۇل - قۇربانداردىڭ 60 پايىزى، شامامەن 1200 ادام قالا سىرتىنداعى جولداردا اپاتقا ۇشىراعان. وسىنى تالداي كەلە، قالا سىرتىندا بولاتىن جول اپاتتارىنىڭ باستى سەبەبى - جىلدامدىقتى اسىرۋ، قارسى باعىتقا شىعىپ كەتۋ، مانيەۆر جاساۋداعى قاتەلىكتەر ەكەنىن بىلدىك. ەڭ ءبىرىنشى كەزەكتە جۇرگىزۋشىلەردىڭ كولىك جۇرگىزۋ مادەنيەتى تۇر. ءبىز قوعام بولىپ، جۇرگىزۋشى، مينيسترلىك، ۇكىمەت بولىپ بۇل ماسەلەنى شەشۋگە كىرىسپەسەك، ەش ناتيجە بولمايدى، ياعني ءبىرجاقتى اتقارىلاتىن جۇمىستاردىڭ ناتيجەسى تومەن بولادى. ءار ادام وزىنەن باستاۋى كەرەك. نەگە ادام ءوز ومىرىنە ءبىرىنشى كەزەكتە جاۋاپ بەرمەسكە؟ ودان كەيىن ۇكىمەتتىڭ تاراپىنان ىستەلىپ جاتقان ەرەجەلەردى نەگە قابىلداماسقا؟ - دەيدى ق ر ءى ءى م وكىلى.
سونداي- اق، قازىر ايىپپۇلدان تۇسكەن قاراجاتتىڭ بارلىعى جەرگىلىكتى اتقارۋشى ورگاننىڭ بيۋدجەتىنە تۇسەدى. جولدا ءجۇرۋ تۋرالى زاڭنىڭ 17-بابىنا سايكەس، جەرگىلىكتى اتقارۋشى ورگاندار بۇل قاراجاتتى جولدا ءجۇرۋ قاۋىپسىزدىگىن قامتاماسىز ەتۋگە باعىتتالعان ءىس- شارالارعا - باعدارشامدار قويۋ، جول بەلگىلەرىن سالۋ، اۆتوماتتى تىركەۋ جۇيەلەرى سەكىلدى كەرەك-جاراقتارعا جۇمسايدى.
ەسكە سالا كەتسەك، 4 -جەلتوقساندا جول قاۋىپسىزدىگىن ارتتىرۋعا جانە جول-كولىك وقيعالارىنىڭ سانىن ازايتۋعا باعىتتالعان زاڭ كۇشىنە ەندى. ەندى كامەرالار ورتاشا جىلدامدىقتى تىركەيدى.
