بيىكتەن زات لاقتىرعان قىلمىسكەر ءولىم جازاسىنا كەسىلدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قازاقستاننىڭ يرانداعى ەلشىسى ەكى ەل اراسىنداعى ساۋدا اينالىمىن 10 ميلليارد دوللارعا دەيىن كەڭەيتۋدى تالاپ ەتتى - Parstoday
قازاقستاننىڭ يرانداعى ەلشىسى ەكى ەل اراسىنداعى تاۋار اينالىمىن 10 ميلليارد دوللارعا دەيىن كەڭەيتۋدى تالاپ ەتتى.
Parstoday اقپارات اگەنتتىگىنىڭ حابارلاۋىنشا، قازاقستاننىڭ يرانداعى ەلشىسى وڭتالاپ وڭالبايەۆ بەيسەنبى كۇنى يراننىڭ باتىسىنداعى حامەدان وبلىسىنىڭ ساۋدا پالاتاسى مەن يران مەن قازاقستاننىڭ ورتاق ساۋدا پالاتاسى اراسىنداعى كوممەرتسيالىق مەموراندۋمعا قول قويدى. ەلشى قول قويۋ وتىرىسىندا، ءوزىنىڭ باي تاريحى مەن مادەنيەتى جانە مول ەكونوميكالىق مۇمكىندىكتەرى بار حامەدان وبلىسىن قازاقستانمەن ەكونوميكالىق جانە مادەني ىنتىماقتاستىقتىڭ ۇلگىسى رەتىندە قاراستىرۋعا بولاتىنىن ايتقان.
حامەدان اكىمى حاميد مەلانۋري شامسي دە بەيسەنبى كۇنى قازاقستاننىڭ يرانداعى ەلشىسىنىڭ كەزدەسۋىندە حامەدان وبلىسى مەن قازاقستان ەلى اراسىنداعى ەكونوميكالىق قارىم- قاتىناستاردى ودان ءارى دامىتۋ ءۇشىن قاجەتتى شارالار قابىلداناتىنىن تىلگە تيەك ەتتى. ونىڭ پىكىرىنشە، بۇل دامۋ اسىرەسە وتاندىق جانە شەتەلدىك كاپيتالدى تارتۋدى قامتيدى جانە نەگىزگى ماقسات پروۆينتسيانىڭ قۇرىلىسى مەن دامۋى ءۇشىن تابيعي جانە ادامي مۇمكىندىكتەر مەن رەسۋرستاردى وڭتايلى پايدالانۋ بولىپ تابىلادى.
سونداي-اق يراننىڭ حامەدان وبلىسىنىڭ كوپتەگەن مۇمكىندىكتەرى بار، اسىرەسە اۋىل شارۋاشىلىعى، تاۋ- كەن ونەركاسىبى، ونەركاسىپ جانە تۋريزم سالالارىندا قازاقستانمەن ىنتىماقتاستىق ءۇشىن ايتارلىقتاي مۇمكىندىكتەر بار.
ايتا كەتەيىك، قازاقستاننىڭ يرانداعى ەلشىسى حامەدان ساۋدا-ونەركاسىپ پالاتاسىنىڭ شاقىرۋىمەن جانە ەكىجاقتى ەكونوميكالىق جانە مادەني ءوزارا ءىس-قيمىل جاساۋ ماقساتىندا حامەدانعا باردى.
بيىكتەن زات لاقتىرعان قىلمىسكەرگە كەسىلگەن ءولىم جازاسى اتقارىلدى - جەنمين جيباو
وتكەن جىلدىڭ ماۋسىم ايىندا تسزيلين ولكەسى چانچۋن قالاسىندا بيىكتىكتەن لاقتىرىلعان زاتتان ادام ءولىمى وقيعاسى ورىن الدى. جۋرناليستەر قازاننىڭ 21 ى كۇنى جوعارعى حالىق سوتىنىڭ سوتتالۋشى جوۋدىڭ قاۋىپتى ادىستەرمەن قوعامدىق قاۋىپسىزدىككە قاتەر توندىرگەنى ءۇشىن ءولىم جازاسىنا كەسىلگەنىن قايتا قاراۋ ءىسى بويىنشا زاڭعا سايكەس ۇكىم شىعارىپ، ءولىم جازاسىن دەرەۋ ورىنداۋعا بەكىتكەنىن ءبىلدى. جوعارعى سوت شىعارعان جازانى قايتا قاراۋ ۇكىمىنە سايكەس، جوۋعا تاعايىندالعان ءولىم جازاسى بۇگىن ياعني 21 ى كۇنى اتقارىلادى، دەپ حابارلادى قىتايدىڭ «جەنمين جيباو» اقپاراتتىق پورتالى.
قىتايلىق ب ا ق-تىڭ مالىمەتىنشە، 2023 -جىلدىڭ ماۋسىم ايىندا 28 جاستاعى شياو لۋ جيلين پروۆينتسياسىنىڭ چاڭچۋن قالاسىنداعى ييە بازارىنىڭ تاعامدار كوشەسىندە بيىكتىكتەن لاقتىرىلعان كىرپىش باسىنا ءتيىپ، وكىنىشكە وراي قايتىس بولدى. كىرپىش لاقتىرعان جىگىت بۇعان دەيىن 5 ليترلىك ەكى بوشكە سۋ مەن اشىلماعان ءۇش بانكا كوكا-كولانى كوپقاباتتى ۇيدەن لاقتىرىپ جىبەرىپ، تاعى ەكى ادامعا تيگەن. سول جىلدىڭ 13-جەلتوقسانىندا چاڭچۋن حالىق سوتى جوۋدى ءولىم جازاسىنا كەسىپ، ونى ءومىر بويىنا ساياسي قۇقىعىنان ايىردى جانە مارقۇمنىڭ وتباسىنا جەرلەۋ شىعىندارىن قوسقاندا 40000 يۋاننان استام وتەماقى تولەۋدى بۇيىرعان.
ايتا كەتەيىك، بيىكتىكتەگى زات لاقتىرىلعان ءۇيدىڭ استىندا ادامداردىڭ وتە تىعىز اعىنى بار، ياعني تۇنگى بازارداعى جەڭىل تاعامدار كوشەسى بولعان. جوۋ 6 كۇن ىشىندە عيماراتتىڭ جوعارعى قاباتتارىنان بىرنەشە رەت كىرپىش پەن باسقا زاتتاردى لاقتىرىپ جىبەرگەن. وقيعا كەزىندە ول عيماراتتىڭ استىنا 8 كىرپىش تاستاپ، كوپتەگەن ادامنىڭ ءومىرى مەن دەنساۋلىعىنا قاۋىپ توندىرگەن.
سونداي-اق، وسى اپتادا ءولىم جازاسىنا كەسىلگەن تاعى ءبىر سوت ۇكىمى شىققانى تۋرالى اقپارات تارادى. اتاپ ايتقاندا، قىتايدىڭ «CNR» اقپارتتىق پورتالىندا «17 بالانى ساۋدالاعان ايەل ءولىم جازاسىنا كەسىلدى» دەگەن تاقىرىپتاعى اقپارات جاريالانعان بولاتىن. بۇل حاباردى قىتايدىڭ كوپتەگەن اقپارات كوزى جازدى.
2023 -جىلدىڭ قىركۇيەگىندە ءدال سول سوت يۇي حۋايىڭدى 1993-1996 -جىلدار ارالىعىندا گۋيجوۋ مەن چۋڭچيڭ قالاسىنان 11 بالانى حەبەي پروۆينتسياسىنىڭ حاندان قالاسىنا ۇرلاپ، ساتقانى ءۇشىن كىنالى دەپ تاۋىپ، ءولىم جازاسىنا كەستى. سوتتالۋشى مەن ونىڭ كەيىن قايتىس بولعان سىبايلاسى پايدا تابۋ ماقساتىندا بالالاردى ساتىپ جىبەرگەن. ۇكىم جاريالانعاننان كەيىن بىردەن ادام ۇرلاۋشى شەشىمگە شاعىمدانعان ەدى.
قىتايلىق ب ا ق-تىڭ دەرەگىنشە، 2023 -جىلدىڭ قاراشاسىندا گۋيجوۋ پروۆينتسياسىنىڭ جوعارى حالىق سوتى ايىپتالۋشىنىڭ شاعىمىنا سايكەس، 2024 -جىلدىڭ قاڭتارىندا پوليتسيا يۇي حۋايىڭنىڭ بالا ساۋداسىنىڭ باسقا دا ىستەرىنە قاتىسى بارىن انىقتاعاننان كەيىن ءىستى قايتا قاراۋدى بۇيىردى.
سودان بەرى ءىرى ادام ساۋداسىنا قاتىسى بار بالالار سانى 11-دەن 17-گە دەيىن وسكەنى انىقتالعان. بۇل بالالار 12 وتباسىنان شىققان، ولاردىڭ بەسەۋى بىردەن ەكى ۇرپاعىنان ايىرىلعان، دەپ حابارلادى سوت. سونىمەن قاتار، يۇي حۋايىڭ بارلىق جەكە مۇلكىن تاركىلەۋمەن ءومىر بويىنا ساياسي قۇقىقتارىنان ايىرىلدى.
ايەلدىڭ قىلمىستىق ارەكەتتەرى سالدارىنان 12 وتباسى بالالارىنان ايىرىلعان. ءتىپتى، كەيبىرى مۇلدەم كۇيرەۋگە ۇشىراعان(كەي اتا-انالار بالالارىنىڭ جوعالعانىنا بايلانىستى اۋىر دەرتكە شالدىعىپ، قايتىس بولعان). وسى سەبەپتى سوت ءولىم جازاسىن قولدانۋ دۇرىس دەپ تاپقان.
يۇي حۋايىڭ سوت ۇستىندە شاعىم ارىز بەرەتىندىگىن ءبىلدىردى.
شەتەلدىك ب ا ق وكىلدەرى اۆتوموبيلدەردىڭ «ينتەللەكتۋالدى ءوندىرىسىن» جوعارى باعالادى - «حالىق گازەتى»
24-قازان كۇنى «ءبىر بەلدەۋ، ءبىر جول» جاستار اراسىنداعى دوستىق الماسۋ جوباسىنىڭ «شەتەلدىك ب ا ق كوك قالادا» مەديا توبىنداعى 21 شەتەلدىك ءتىلشى قىتايدىڭ حۋح-حوتوداعى ەكونوميكالىق جانە تەحنولوگيالىق دامۋ ايماعىنا جانە ىشكى موڭعولدىڭ حەلينگەل جاڭا اۋماعىنا باردى. ولار سوندا جاڭا ەنەرگەتيكالىق كوممەرتسيالىق كولىكتەر، قالالاردى سيفرلاندىرۋ جانە تومەن بيىكتىكتەگى ەكونوميكالىق دامۋ جاعدايلارىمەن تانىستى، دەپ حابارلايدى قىتايدىڭ «حالىق گازەتى» باسىلىمى.
اتالعان ب ا ق-تىڭ دەرەگىنشە، ىشكى موڭعولدىڭ Yuansu Mengtai Intelligent hydrogen-electric Commercial Vehicle كومپانياسى ينتەللەكتۋالدى سۋتەگى- ەلەكترلىك كوممەرتسيالىق كولىكتەردى وندىرۋگە باعىتتالعان. مۇنداعى تومەن كومىرتەكتى، ەكولوگيالىق تازا جانە ءتيىمدى سۋتەگىمەن جۇمىس ىستەيتىن اۋىر جۇك كولىگى تراكتورلارى مەن جۇرگىزۋشىسىز تراكتورلاردى اۋقىمدى ونەركاسىپتە، تاۋ-كەن ونەركاسىبىندە، لوگيستيكادا جانە كولىكتە پايدالانۋعا بولادى. بۇل شەتەلدىك ب ا ق وكىلدەرىنىڭ نازارىن اۋداردى.
شەتەلدىك جۋرناليستەر سۋتەگى ەنەرگياسىمەن جۇرەتىن ۇلكەن جۇك كولىگى تراكتورىن نۇسقاپ، تاڭعالعانىن جاسىرا المادى. ولاردىڭ ىشىندە قازاقستاندىق عازيزا ۇزاق ەسىمدى ءتىلشى دە بار.
تۇركى الەمىنىڭ كەزەڭى كەلدى - TRT
تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش تۇركى الەمىنىڭ دوستاستىعىنا نازار اۋداردى. تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش تۇركى الەمىنىڭ ءوزارا بىرلىك، باۋىرلاستىق پەن دوستىقتى ودان ءارى ارتتىرىپ، تىعىز ىنتىماقتاستىقتا ارەكەت ەتۋى ءسوزسىز قاجەتتىلىك ەكەنىن ايتتى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
سونىمەن قاتار ءماجىلىس ءتوراعاسى كۋرتۋلمۋش قازاقستان رەسپۋبليكاسىنىڭ رەسپۋبليكا كۇنىنە ارنالعان قابىلداۋدا سويلەگەن سوزىندە قازاقستان جانە قازاقستان حالقىن ءماجىلىس اتىنان قۇتتىقتادى.
كۋرتۋلمۋش الەم كوپ پوليارلى تارتىپكە بەت بۇرعان وسى كەزەڭدە تۇرىك الەمىنىڭ ماڭىزدى ورتالىقتاردىڭ ءبىرى بولاتىنىن ايتقان.
«قازاقستان مەن وزبەكستاننان انادولى مەن ۆەنگرياعا دەيىنگى كەڭ اۋماقتا ورنالاسقان، حالقى 300 ميلليونعا جۋىقتاعان تۇركى الەمىنىڭ كوپ پوليۋستى جاڭا الەمدىك تەڭگەرىمدەر ىشىندە كەلەشەكتە داڭقى ودان ءارى ارتىپ، الەمنىڭ ماڭىزدى ورتالىقتارىنىڭ بىرىنە اينالاتىن بولادى. تۇركى الەمىنىڭ ءوزارا بىرلىك، باۋىرلاستىق پەن دوستىقتى ودان ءارى ارتتىرىپ، تىعىز ىنتىماقتاستىقتا ارەكەت ەتۋى- بۇل ءسوزسىز قاجەتتىلىك»، - دەيدى تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش.
سونىمەن قاتار ول تۇركيا رەسپۋبليكاسىنىڭ ەكىنشى عاسىرىنا سايكەس كەلەتىن جانە بىزدەر «تۇركيا عاسىرى» دەپ اتاعان وسى كەزەڭ سونىمەن قاتار تۇركى الەمىنىڭ عاسىرى بولسىن. تۇركيا مەن قازاقستان اراسىنداعى ماڭگىلىك دوستىقتىڭ كۇننەن كۇنگە كۇشەيە بەرۋىن تىلەيمىن، دەگەن.
سامارقاند مەملەكەتتىك ۋنيۆەرسيتەتىندە قازاق ءتىلى مەن ادەبيەتى كافەدراسى اشىلدى – ءوز ا
شاراف راشيدوۆ اتىنداعى سامارقاند مەملەكەتتىك ۋنيۆەرسيتەتىندە قازاقستان رەسپۋبليكاسىنىڭ وزبەكستانداعى ەلشىلىگىنىڭ قولداۋىمەن اباي اتىنداعى عىلىم جانە مادەنيەت ورتالىعى مەن قازاق ءتىلى مەن ادەبيەتى ءبولىمى اشىلدى، دەپ جازادى وزبەكستاننىڭ «ءوز ا» اقپاراتتىق پورتالى.
وسىعان وراي وتكەن ءىس- شاراعا قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ، ەكى ەلدىڭ جوعارى ءبىلىم سالاسىنىڭ وكىلدەرى، اباي اتىنداعى ۇلتتىق پەداگوگيكالىق ۋنيۆەرسيتەتى مەن سامارقاند مەملەكەتتىك ۋنيۆەرسيتەتىنىڭ باسشىلارى قاتىستى.
«وزبەكستان مەن قازاقستان جوعارى وقۋ ورىندارى اراسىنداعى ىنتىماقتاستىق سوڭعى جىلدارى قارقىندى دامىپ كەلەدى. ەلدەرىمىز اراسىنداعى اكادەميالىق بايلانىستاردى نىعايتۋعا، تىلدەردى مەڭگەرۋگە جانە ءتىل ماماندارىنىڭ بىلىكتىلىگىن ارتتىرۋعا ارەكەت ەتىپ كەلەمىز. بۇگىنگى تاڭدا ەلىمىزدە 400 مەكتەپتە قازاق ءتىلى وقىتىلادى، قازاق تىلىندە ءبىلىم بەرەتىن 162 مەكتەپ بار. قازاق تىلىندە جوعارى ءبىلىم جانە كاسىپتىك- تەحنيكالىق ءبىلىم الۋ ءۇشىن تاشكەنت مەملەكەتتىك پەداگوگيكالىق ۋنيۆەرسيتەتى، قاراقالپاقستان رەسپۋبليكاسى ۋنيۆەرسيتەتى، گۇلىستان مەملەكەتتىك ۋنيۆەرسيتەتى، سونداي- اق نوكىس، جىزاق جانە ناۋاي مەملەكەتتىك پەداگوگيكالىق ينستيتۋتتارىندا قازاق ءتىلى مەن ادەبيەتى فاكۋلتەتتەرى جانە كافەدرالارى بار. سامارقاند مەملەكەتتىك ۋنيۆەرسيتەتىندە اشىلىپ جاتقان بۇل ورتالىق تا جاستارىمىزعا قازاق ءتىلىن ۇيرەتۋگە قىزمەت ەتەدى»، - دەپ جازادى وزبەكستاندىق ب ا ق.
ءىس-شاراعا قاتىسۋشىلار جۇمىسىن باستاعان اباي اتىنداعى عىلىم جانە مادەنيەت ورتالىعى مەن قازاق ءتىلى مەن ادەبيەتى بولىمىمەن تانىستى.
سونداي-اق وسى اپتادا «ءوز ا»-دا «قىتاي ءاندىجاندا جىلىنا 10 مىڭ جۇك كولىگىن شىعاراتىن جوبانى جۇزەگە اسىرماق» دەگەن تاقىرىپتاعى اقپارات جاريالاندى.
«ءوز ا» - نىڭ دەرەگىنشە، قىتايلىق كومپانيا ءاندىجاندا جىلىنا 10 مىڭ جۇك كولىگىن شىعاراتىن جوبانى جۇزەگە اسىرماق. وبلىس اكىمدىگىنىڭ حابارلاۋىنشا، قىتايدىڭ FAW Trucks كومپانياسى باسشىلىعى ءاندىجانعا كەلگەن.
«FAW Trucks كومپانياسىمەن سەرىكتەستىكتە ءاندىجاندا جالپى قۇنى 100 ميلليون دوللار بولاتىن جوبا باستالادى. بۇل جوبا جىلىنا 10 مىڭ جۇك تاسىمالدايتىن كولىكتى شىعارۋعا قاۋقارلى»، - دەلىنگەن حابارلامادا.
16 جاستاعى قانداسىمىز قىتايدىڭ ايەلدەر فۋتبول كومانداسىنىڭ جاتتىعۋشىلار تىزىمىنە تاڭدالدى - Harajorga
قىتاي فۋتبول قاۋىمداستىعى فۋتبولدان جاستار اراسىنداعى ۇلتتىق چەمپيوناتىنا (U-17) دايىندىق جۇمىستارىن باستاپ كەتتى. سوعان وراي جاقىندا قىتاي فۋتبول قاۋىمداستىعى 17 جاسقا دەيىنگى مەملەكەتتىك ايەلدەر فۋتبول كومانداسىنىڭ 2024 -جىلعى العاشقى جاتتىعۋشىلار ءتىزىمىن جاريالادى، دەپ حابارلايدى Harajorga.
اتالعان تىزىمگە ىلە قازاق اۆتونوميالى وبلىسىنىڭ كۇنەس اۋدانىنان كەلگەن 16 جاستاعى ماحپەر جانار قىزى تاڭدالعان. قىتايلىق ب ا ق-تىڭ دەرەگىنشە، ماحپەر بۇكىل شينجاڭ بويىنشا جاتتىعۋ تولىمدىلىعىنا يە بولعان جالعىز سپورتشى.
قىتاي فۋتبول قاۋىمداستىعىنىڭ ايەلدەر فۋتبولى جارىسىنىڭ جاتتىعۋ جوسپارىنا سايكەس، 17 جاسقا دەيىنگى ايەلدەر فۋتبول كومانداسى 2024 -جىلدىڭ 23-قازانى مەن 8-قاراشاسى ارالىعىندا يۋننان ولكەسىنىڭ يۋسي قالاسىنداعى حالىقارالىق سپورتتىق جاتتىعۋ بازاسىندا ىرىكتەۋ جاتتىعۋلارىن وتكىزەدى.
قىتايلىق ب ا ق-تىڭ مالىمەتىنشە، بۇل وقۋ- جاتتىعۋ جيىنى 2025 -جىلعى 17 جاسقا دەيىنگى ايەلدەر اراسىنداعى فۋتبولدان الەم چەمپيوناتىنىڭ فينالدىق كەزەڭىنە دايىندالۋ جانە ايەلدەر فۋتبولى ءۇشىن كورنەكتى رەزەرۆتىك تالانتتاردى ودان ءارى دامىتۋ بولىپ تابىلادى.
اۆتور
بەيسەن سۇلتان ۇلى
