بەيسەنبايەۆ: قازاقستان ءوندىرىس پەن ەكسپورتتىڭ كۇردەلىلىگى جونىنەن وزبەكستان مەن گرۋزيادان دا تومەن تۇر

استانا. KAZINFORM - قازاقستان ءوندىرىس پەن ەكسپورتتاعى عىلىم مەن تەحنولوگيانىڭ ۇلەسىن سيپاتتايتىن ECI رەيتينگىسىندە وزبەكستان مەن گرۋزيادان دا تومەن ورىندا تۇر.

بۇل تۋرالى ءماجىلىس دەپۋتاتى ەلنۇر بەيسەنبايەۆ عىلىم زاڭناماسىن جەتىلدىرۋگە ارنالعان جيىندا ايتتى.

- ECI دەيتىن كورسەتكىش بار، ءوندىرىس پەن ەكسپورتتىڭ كۇردەلىلىگىن سيپاتتايدى، ياعني سىرتقا شىعاتىن تاۋارلارداعى عىلىم مەن تەحنولوگيانىڭ ۇلەسىن كورسەتەدى. مەندەگى اقپارات بويىنشا قازاقستان قازىر 84- ورىندا تۇر. ءبىزدىڭ الدىمىزدا ۋكراينا 51 -ورىندا تۇر. سوعىس بولىپ جاتقان مەملەكەت بۇل. ودان قالسا، 70 -ورىندا گرۋزيا تۇر. ءتىپتى وزبەكستان ءبىزدىڭ الدىمىزدا - 80 -ورىندا. بۇل ەندى شىنتۋايتىندا ءبىزدىڭ عىلىمنىڭ جاعدايىن كورسەتەدى، - دەدى ول.

دەپۋتات عىلىم اكادەمياسى عالىمدار ويلاپ تاپقان جاڭالىقتاردى وندىرىسپەن ۇشتاستىرۋدا سىلبىر جۇمىس ىستەپ وتىرعانىن ايتىپ سىنادى.

- ءبىز ءار ءتۇرلى كاسىپورىندارمەن كەزدەسەمىز. سوندا ولاردان سۇراعاندا عىلىم اكادەمياسى ەشبىر ۇسىنىس جاساماعانىن ايتادى. ءبىر دە ءبىر كاسىپورىن، ءبىر دە ءبىر مەكەمە عىلىم اكادەمياسى ينۆەستيتسيا سۇراپ كەلگەنىن ايتقان جوق. قازاقستاندا 1500 ونەركاسىپ كاسىپورنى بار. ونىڭ 50 پايىزى تاۋ-كەن كاسىپورىندارى. قازاقستان ەكونوميكاسىنداعى بۇكىل اقشانىڭ 50 پايىزى سول كاسىپورىنداردا شوعىرلانعان. سولارعا ءبىر دە ءبىر ۇسىنىس جوق. ينۆەستيتسيانى مەملەكەتتىك بيۋدجەتتەن عانا ىزدەۋدىڭ كەرەگى جوق. سولاردا دا ينۆەستيتسيا ىزدەۋگە بولادى، - دەدى ەلنۇر بەيسەنبايەۆ.

بۇعان دەيىن استانادا كومىر تەحنولوگياسى ۇلتتىق عىلىمي ورتالىعى اشىلۋى مۇمكىن ەكەنىن جازعان ەدىك.

اۆتور

ەسىمجان ناقتىباي